କାବୁଲରୁ ଆମେରିକୀୟ ବିମାନରେ ସ୍ଥାନାନ୍ତରଣ ବେଳେ କନ୍ୟା ସନ୍ତାନ ପ୍ରସବ କଲେ ମହିଳା : ଟୁଇଟ୍ କରି ସୂଚନା ଦେଲା ୟୁଏସ ଏୟାର ମୋବିଲିଟି କମାଣ୍ଡ
ବାୟୁ ଚାପ ବୃଦ୍ଧି ପାଇଁ ବିମାନର ଉଡାଣର ଉଚ୍ଚତା କମାଇଥିଲେ କମାଣ୍ଡର; ଉଭୟ ମା ଓ ନବଜାତକ ସୁସ୍ଥ
କନକ ବ୍ୟୁରୋ : କାବୁଲ ଛାଡି ବିଦେଶକୁ ଆମେରିକୀୟ ବିମାନରେ ସ୍ଥାନାନ୍ତରଣ ବେଳେ କନ୍ୟା ସନ୍ତାନ ପ୍ରସବ କଲେ ମହିଳା । ଶନିବାର ଜର୍ମାନୀର ରାମଷ୍ଟେନ ଏୟାରବେସରେ ଅବତରଣ କରିବା କ୍ଷଣି, ବ୍ୟକ୍ତିବିଶେଷଙ୍କୁ ବିପଜ୍ଜନକ ସ୍ଥାନରୁ ସ୍ଥାନାନ୍ତରଣ କରୁଥିବା ଯୁକ୍ତରାଷ୍ଟ୍ର ଆମେରିକାର ଏକ ସାମରିକ ବିମାନରେ ଥିବା ଜଣେ ଆଫଗାନ ମହିଳା ଗୋଟିଏ କନ୍ୟା ପ୍ରସବ କରିଛନ୍ତି । ଏନେଇ ରବିବାର ଟୁଇଟ୍ କରି ଦି ୟୁଏସ ଏୟାର ମୋବିଲିଟି କମାଣ୍ଡ କହିଛି, ଯେ ତାଲିବାନମାନେ ଆଫଗାନ ଦଖଲ କରିବାରୁ ଖସି ପଳାଇ ଆସିଥିବା ମହିଳାଜଣଙ୍କ ତାଙ୍କ ଯାତ୍ରାର ଦ୍ୱିତୀୟ ପର୍ଯ୍ୟାୟରେ ସି-୧୭ ପରିବହନକାରୀ ବିମାନରେ ଯାତ୍ରା କରୁଥିବାବେଳେ ପ୍ରସବ ବେଦନା ପାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ବିମାନଟି ଆକାଶର ୨୮ ହଜାର ଫୁଟ ଉଚ୍ଚରେ ଉଡୁଥିବାବେଳେ ବିମାନରେ ନିମ୍ନ ବାୟୁଚାପ ଯୋଗୁଁ ମାଆ ହେବାକୁ ଯାଉଥିବାବେଳେ ସ୍ୱାସ୍ଥ୍ୟବସ୍ଥା ଜଟିଳ ହୋଇପଡିଥିଲା ବୋଲି ଆମେରିକୀୟ ବାୟୁସେନା କହିଛି । ତେଣୁ ବାୟୁଚାପ ବୃଦ୍ଧି ପାଇଁ ବିମାନ ଉଡାଣର ଉଚ୍ଚତା ହ୍ରାସ କରିବା ପାଇଁ ବିମାନର କମାଣ୍ଡର ସ୍ଥିର କରିଥିଲେ । ଫଳରେ ଆସନ୍ନ ପ୍ରସବାଙ୍କ ସ୍ୱାସ୍ଥ୍ୟବସ୍ଥା ସ୍ଥିର ରହିବା ସହ ଜୀବନ ରକ୍ଷା ହୋଇ ଯାଇଥିଲା । ପ୍ରସବ ପରେ ଉଭୟ ନବଜାତକ ଓ ମାଙ୍କ ନିକଟବର୍ତୀ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା । ଉଭୟ ସୁସ୍ଥ ଅଛନ୍ତି ।