ବିଜେପୁର ବିଜୟ ନେଇ ରାଜନୈତିକ ଦଳଙ୍କ ଭବିଷ୍ୟବାଣୀ ! ବିଜେଡି ଓ ବିଜେପି ଜିତିବା ନେଇ ଆଶାବାଦୀ, କଂଗ୍ରେସର ବିଜୟକୁ ନେଇ ସନ୍ଦେହ ପ୍ରକାଶ କଲେ ନିରଞ୍ଜନ ପଟ୍ଟନାୟକ
କନକ ବ୍ୟୁରୋ : ବିଜେପୁର କାହାର ? କିଏ ବନିବ ବିଜେପୁର ବାଜିଗର ? ଭୋଟ୍ ସରିବା ପରେ ଏବେ ଚାଲିଛି ଅଙ୍କକଷା । ଉଭୟ ବିଜେଡି ଓ ବିଜେପିର ଏକା ଦାବି । ଉପ-ନିର୍ବାଚନର ତାଙ୍କ ଦଳର ବିଜୟ ହେବ । ଏନେଇ ବିଜେଡି ସୁପ୍ରିମୋ ନବୀନ ପଟ୍ଟନାୟକ କହିଛନ୍ତି-ବିଜେପୁରରେ ବଡ ବ୍ୟବଧାନରେ ଦଳ ବିଜୟୀ ହେବ । ବିଜେପି ଉପ ସଭାପତି କହିଛନ୍ତି-ନବୀନଙ୍କୁ ଘାରିଛି ଧର୍ମେନ୍ଦ୍ରଙ୍କ ଭୟ । ଏପଟେ- ପୂର୍ବତନ ପିସିସି ନିରଞ୍ଜନ ପଟ୍ଟନାୟକ ବିଜେପୁରରେ କଂଗ୍ରେସର ବିଜୟ ନେଇ ସନ୍ଦେହ ପ୍ରକାଶ କରିଛନ୍ତି । ଆଉ ଏସବୁ ବୟାନବାଜି ଭିତରେ ଅପେକ୍ଷା ୨୮ ତାରିଖକୁ ।
Kanak News is now on WhatsApp
Join and get latest news updates delivered to you via WhatsApp
କିଏ ଜିତିବ ବିଜେପୁର ବାଜି?କାହା ଉପରେ ଆସ୍ଥା ରଖିଛନ୍ତି ଭୋଟର?ଏହି ପ୍ରଶ୍ନର ଉତର ଯେତିକି ଜଟିଳ, ତିନି ଦଳର ରାଜନୈତିକ ସ୍ଥିତି ପାଇଁ ସେତିକି ଗୁରୁତ୍ୱପୂର୍ଣ୍ଣ । ବୁଧବାର ଦିନ ଇଭିଏମ୍ ଖୋଲାହେଲା ବେଳେ ଜଣା ପଡିଯିବ କାହା ଉପରେ ରହିଛି ବିଜେପୁରବାସୀଙ୍କ ବିଶ୍ୱାସ ।ତେବେ ବିଜେପୁର ବାଜି ଜିତିବା ପାଇଁ ଆଶା ରଖିଛନ୍ତି ଦୁଇ ପ୍ରମୁଖ ପ୍ରତିଦ୍ୱନ୍ଦି ବିଜେପି ଓ ବିଜେଡି । ଦିଲ୍ଲୀରୁ ଫେରିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେପୁର ଜିତାପଟ ନେଇ ପୁଣି ଥରେ ଦମ୍ଭୋକ୍ତି ଦେଖାଇଛନ୍ତି । ଏପରିକି ତାଙ୍କ ପ୍ରାର୍ଥୀ ବଡ ବ୍ୟବଧାନରେ ବିଜେପୁରରେ ବିଜୟୀ ହେବ ବୋଲି ନବୀନ କହିଛନ୍ତି ।
ଗୋଟିଏ ପଟେ ନବୀନବାବୁଙ୍କ ଭାବମୂର୍ତି ଉପରେ ବିଜେଡିର ଭରସା ଓ ଅନ୍ୟପଟେ ବିଜେପୁର ଜିତିବା ନେଇ ରହିଛି ବିଜେପିର ବିଶ୍ୱାସ । ବିଜେପି କହିଛି ଗତ ତିନଟି ନିର୍ବାଚନରେ ବିଜେପୁରବାସୀ ବିଜେଡିକୁ ପ୍ରତ୍ୟାଖାନ କରିଥିଲେ । ଗରିବଙ୍କ ପାଇଁ ମୋଦିଙ୍କ ଜନକଲ୍ୟାଣ ମୂଳକ ଯୋଜନା ବିଜେପୁରରେ ବିଜେପିକୁ ବିଜୟୀ କରାଇବ । ଏପରିକି ୨୦୦୦୦ରୁ ଉଦ୍ଧ୍ୱର୍ ଭୋଟରେ ବିଜେପି ବିଜେପୁରରେ ବିଜୟୀ ହେବ ବୋଲି ଦୃଢ ସହକାରେ ଦଳ କହିଛି ।
ଦୁଇ ଦଳ ବିଜୟ ନେଇ ଆଶାବାଦୀ ରହିଥିବା ବେଳେ ଦ୍ୱନ୍ଦ୍ୱରେ ପଡିଛି କଂଗ୍ରେସ । ଅବଶ୍ୟ ପ୍ରଣୟ ସାହୁଙ୍କୁ ପ୍ରାର୍ଥୀ କରି ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ଆଡକୁ ଟାଣି ନେଇଥିଲା ଦଳ । ତେବେ ବରିଷ୍ଠ ନେତା ନିରଜଂନ ପଟ୍ଟନାୟକ କହିଛନ୍ତି , ସୁସ୍ଥ ଗଣତନ୍ତ୍ର ପାଇଁ ଯେପରି ଉଦ୍ୟମ ଦରକାର ତାହା ପାଳନ କରିଛି କଂଗ୍ରେସ । କିନ୍ତୁ ଅନ୍ୟଦଳ ଅର୍ଥବଳ, ବାହୁବଳ ଦ୍ୱାରା ଏହି ନିର୍ବାଚନ ଲଢିଛନ୍ତି । ଅର୍ଥବଳ, ବାହୁବଳ ଠାରୁ ଦୂରେରେ ଥିଲା ଦଳ । ତେଣୁ କଂଗ୍ରେସ ଜିତିବା ନେଇ ସଂଦେହ ପ୍ରକଟ କରିଛନ୍ତି ନିରଂଜନ ।
ଜିତିବା ନେଇ ଯେତେ ଦମ୍ଭୋକ୍ତି ଦେଖାନ୍ତୁ, ସବୁ ଦଳ ମଧ୍ୟରେ ରହିଛି ଦ୍ୱନ୍ଦ୍ୱ । ବିଜେପୁର ବାଜି ଜିତିବା ନେଇ ରହିଛି ଆଶଙ୍କା । ଗଣତି ଦିନ ଯେତିକି ପାଖେଇ ଆସୁଛି, ମୁଣ୍ଡିଆଳମାନଙ୍କ ଛାତି ସେତିକି ଧଡଧଡ ହେଉଛି । କାରଣ ୨୦୧୯ ନିର୍ବାଚନ ପୂର୍ବରୁ ବିଜେପୁର ଫଳାଫଳ ଦଳର ନୈତିକ ମନୋବଳକୁ ଯଥେଷ୍ଠ ପ୍ରଭାବିତ କରିବା ସମ୍ଭାବନା ରହିଛି । ୨୦୧୯ର କ୍ଷେତ୍ର ପ୍ରସ୍ତୁତ ହୋଇସାରିଛି ବିଜେପୁର ମଇଦାନରୁ । ବିଜେପୁରର ଫଳାଫଳ ଉପରେ ନିର୍ଭର କରୁଛି ପ୍ରମୁଖ ଦଳଗୁଡିକର ପରବର୍ତୀ ରଣନୀତି ।