ମହାପ୍ରଭୁଙ୍କ ରତ୍ନଭଣ୍ଡାର ଚାବି ନେବାକୁ କାହାର ସତସାହସ ନାହିଁ, ଲୋକଙ୍କୁ ଭ୍ରମିତ କରାଯାଉଛି । ବିଜେପି ସରକାରକୁ ପ୍ରତାପଙ୍କ ତୀର ।
କନକ ବ୍ୟୁରୋ : ରାଜ୍ୟରେ ନୂଆ ସରକାର ଆସିବା ପରେ ମଧ୍ୟ ରତ୍ନଭଣ୍ଡାରକୁ ନେଇ ତୁମ୍ବିତୋଫାନ ଜାରି ରହିଛି । ଗତକାଲି ସମ୍ବର୍ଦ୍ଧନା ସଭାରେ ରତ୍ନଭଣ୍ଡାର ନିଶ୍ଚୟ ଖୋଲାଯିବ ଏବଂ ମହାପ୍ରଭୁଙ୍କ ରତ୍ନରେ ଗଡବଡ ଥିଲେ ଦୋଷୀଙ୍କୁ ନିଶ୍ଚୟ ଦଣ୍ଡ ଦିଆଯିବ ବୋଲି କହିଥିଲେ ମୁଖ୍ୟମନ୍ତ୍ରୀ ମୋହନ ମାଝୀ । ଯାହାର ଆଜି ଜବାବ ରଖିଛନ୍ତି ବିରୋଧୀ ଦଳ ଉପମୁଖ୍ୟ ସଚେତକ ପ୍ରତାପ କେଶରୀ ଦେବ ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଗଣମାଧ୍ୟମରେ ପ୍ରତିକ୍ରିୟା ରଖି ପ୍ରତାପ ଦେବ କହିଛନ୍ତି, ରତ୍ନଭଣ୍ଡାର ଚାବିକୁ ନେଇ ଗଣମାଧ୍ୟମରେ ଯେଉଁ ଚର୍ଚ୍ଚା କରାଯାଉଛି ତାହାର କୌଣସି ଆବଶ୍ୟକତା ନାହିଁ । ଲୋକଙ୍କ ମନରେ ଭ୍ରାନ୍ତ ଧାରଣା ସୃଷ୍ଟି କରିବାକୁ ଏଭଳି ଉକ୍ତି ରଖାଯାଉଛି । ରତ୍ନଭଣ୍ଡାର ଖୋଲିବା ନେଇ ରାଜ୍ୟ ସରକାର ହାଇକୋର୍ଟକୁ ଯାଇଥିଲେ । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଏକ କମିଟି ଗଠନ କରାଯିବା ସହ ସଦସ୍ୟ ମଧ୍ୟ ଚୟନ କରାଯାଇଥିଲା । ସମସ୍ତ କଥା ଲୋକଙ୍କ ସାମ୍ନାରେ ହୋଇଛି । ରତ୍ନଭଣ୍ଡାର ଚାବି କିଏ ଲୁଚାଇ ନେଇଛି ବୋଲି କହି ଲୋକଙ୍କୁ ଭ୍ରମିତ କରାଯାଉଛି । ଏମିତି କାହାର ସତସାହସ ନାହିଁ ଯିଏ ମହାପ୍ରଭୁଙ୍କ ରତ୍ନଭଣ୍ଡାର ଚାବି ଲୁଚାଇ ନେଇ ପଳାଇବ । ଏଭଳି ହୀନ କାମ କେହି କରିବେନି । ରତ୍ନଭଣ୍ଡାର ନେଇ ଲୋକଙ୍କୁ ମନଗଢା କାହାଣୀ କୁହାଯାଉଛି ।
ଏହାସହ ମୁଖ୍ୟମନ୍ତ୍ରୀଙ୍କ ଅଭିଯୋଗ ଶୁଣାଣିକୁ ନେଇ ପ୍ରତାପ କହିଛନ୍ତି, ବିଜେପି କ୍ଷମତାକୁ ଆସିଛି ଏବଂ ଲୋକଙ୍କ ଅଭିଯୋଗ ଶୁଣାଯାଉଛି ଏହା ଭଲ କଥା । ବିଜେଡି ସରକାରରେ ମଧ୍ୟ ପ୍ରତ୍ୟେକ ଶନିବାର ଅଭିଯୋଗ ଶୁଣାଣି ହେଉଥିଲା । ବିଜେପିକୁ ଯେତିକି ଜାଣିଛୁ ଏମାନେ ଛୋଟ କଥାକୁ ବଡ କହି ପ୍ରଚାର କରିବେ । ଏଥିରେ କୌଣସି ନୂତନତ୍ୱ ନାହିଁ ବୋଲି କହି କଟାକ୍ଷ କରିଛନ୍ତି ପ୍ରତାପ ଦେବ ।