ବାଚସ୍ପତିଙ୍କ ଚେୟାରକୁ ପ୍ୟାକେଟ ପ୍ୟାକେଟ ଡାଲି ପକାଇବାକୁ ନିନ୍ଦା କଲା ବିଜେଡି । ପ୍ରଶାନ୍ତ କହିଲେ ବିଧାନସଭା ନ ଚଲାଇ ଦେବାକୁ ସଂକଳ୍ପ ନେଇଛନ୍ତି ବିରୋଧୀ ।
କନକ ବ୍ୟୁରୋ : ବାଚସ୍ପତିଙ୍କ ପୋଡିୟମ ଉପରକୁ ବିଜେପି ବିଧାୟକଙ୍କ ଡାଲି ପକାଇବା ଘଟଣାକୁ ନେଇ ଶାସକ ଦଳ ଜବାବ ରଖିଛି । ଶାସକ ଦଳର ମୁଖ୍ୟ ସଚେତକ ପ୍ରଶାନ୍ତ ମୁଦୁଲି କହିଛନ୍ତି, ବିରୋଧୀ ବିଧାନସଭା ଚଲାଇ ନ ଦେବାକୁ ସଂକଳ୍ପ ନେଇଛନ୍ତି । ବିଧାନସଭା ଆରମ୍ଭ ପରଠାରୁ ବିରୋଧୀ ଦଳର ଭୂମିକାରେ ପରିବର୍ତ୍ତନ ଦେଖିବାକୁ ମିଳୁଛି । ଗତକାଲି ଯେଉଁ ଘଟଣା ଘଟିଛି ତାହା ବିଧାନସଭା ଇତିହାସରେ କଳଙ୍କିତ ଅଧ୍ୟାୟ ହୋଇ ରହିବ । ବାଚସ୍ପତିଙ୍କ ଆସନ କାହାର ବ୍ୟକ୍ତିଗତ ପଦବୀ ନୁହେଁ ତାହା ଏକ ସାମ୍ବିଧାନିକ ଆସନ । ତେଣୁ ଏହି ଆସନକୁ ସମ୍ମାନ ଜଣାଇବା ପ୍ରତ୍ୟେକ ସଦସ୍ୟଙ୍କ କର୍ତ୍ତବ୍ୟ । ନାରାବାଜି କରିବା ସହ ଗୃହରେ ବିରୋଧୀ ହଟ୍ଟଗୋଳ କରିବାରେ କୌଣସି ବାଧକ ନାହିଁ । କିନ୍ତୁ ବାଚସ୍ପତିଙ୍କ ଚେୟାରକୁ ପ୍ୟାକେଟ ପ୍ୟାକେଟ କରି ଡାଲି ଫୋପାଡ଼ିବା ଏକ ହିଂସ୍ର ଆଚରଣ । ତାକୁ ବିଜେଡ଼ି ନିନ୍ଦା କରୁଥିବା କହିଛନ୍ତି ପ୍ରଶାନ୍ତ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ପ୍ରଶାନ୍ତ କହିଛନ୍ତି, ବିଜୁ ଜନତା ଦଳ ଶାସନ କ୍ଷମତାକୁ ଆସିବା ଦିନ ଠାରୁ ସଂଖ୍ୟା ଗରିଷ୍ଠତା ପାଇ ଆସୁଛି । ଆମେ କେବେ ଅହଙ୍କାର ଦେଖାଇ ନାହୁଁ। ଆମେ ଅହଂକାର ଦେଖାଇ ଥିଲେ ଲୋକେ ଆମକୁ ଭୋଟ ଦେଇ ନଥାନ୍ତେ । ବିରୋଧୀ ଦଳ ଭିତରେ ଅହଙ୍କାର ଭରି ରହିଛି । ଏହାଛଡା ମୁଖ୍ୟମନ୍ତ୍ରୀ ଧମକାଉଥିବାର ବିରୋଧୀ ଦଳ ନେତା ଯେଉଁ ଅଭିଯୋଗ ଆଣୁଛନ୍ତି ତାହା ସମ୍ପୂର୍ଣ୍ଣ ଭୁଲ କଥା । ମୁଖ୍ୟମନ୍ତ୍ରୀଙ୍କ ଆଚରଣ ଓ ଉଚ୍ଚାରଣ ସମସ୍ତେ ଭଲ ଭାବେ ଅବଗତ । ମୁଖ୍ୟମନ୍ତ୍ରୀଙ୍କ ସରଳତା ଓ ଶିଷ୍ଟାଚାର ବାବଦରେ ସମସ୍ତେ ଅବଗତ ଅଛନ୍ତି । ତେଣୁ ଏଠି କେହି କାହାକୁ ଧମକେଇବାର ପ୍ରଶ୍ନ ଉଠୁନାହିଁ । କିନ୍ତୁ ବିରୋଧୀ ଦଳର ଆଚରଣ ଅତ୍ୟନ୍ତ ଦୁଭାଗ୍ୟଜନକ ବୋଲି କହିଛନ୍ତି ପ୍ରଶାନ୍ତ ।