ବିଜେପୁର ମୈଦାନକୁ ଓହ୍ଲାଇଲା କଂଗ୍ରେସ ! ବିଜେଡି ଓ ବିଜେପିକୁ ମାତ୍ ଦେଇ ନିଜ ଗଡ ରକ୍ଷା କରିବାକୁ ପ୍ରୟାସ
କନକ ବ୍ୟୁରୋ : ସୁବଳ ସାହୁଙ୍କ ପରେ ବିଜେପୁରରେ କିଏ ନେବ କଂଗ୍ରେସ ଭୋଟ୍ ? ବିଜେପୁରର କଂଗ୍ରେସ ଭୋଟର କାହାକୁ ସମର୍ଥନ କରିବେ ? ଏନେଇ ଅଙ୍କ କଷା ଆରମ୍ଭ ହୋଇଯାଇଛି । କାରଣ ସ୍ୱର୍ଗତ ସୁବଳ ସାହୁଙ୍କ ବିୟୋଗ ପରେ କଂଗ୍ରେସର ଗଡ କୁହାଯାଉଥିବା ବିଜେପୁରର କଂଗ୍ରେସ ସମର୍ଥକଙ୍କୁ ନିଜ ଆଡକୁ ନେବାକୁ ଚେଷ୍ଟା କରୁଛନ୍ତି ଉଭୟ ବିଜେପି ଓ ବିଜେଡି । ତେବେ ବିଜେପୁରକୁ ନେଇ ଦୀର୍ଘଦିନର ନିରବତା ଭଙ୍ଗ କରିଛି କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ବିଜେଡି କହୁଛି କଂଗ୍ରେସ ଭୋଟ ତାଙ୍କ ସପକ୍ଷରେ ଯିବ କାରଣ ସୁବଳଙ୍କ ପରିବାର ବିଜେଡିରେ ଯୋଗଦେଇଛନ୍ତି ଏବଂ ତାଙ୍କ ପତ୍ନୀ ରୀତା ସାହୁଙ୍କୁ ବିଜେପୁରରୁ ପ୍ରାର୍ଥୀ କରି ଏହି ଚାଲ ଖେଳିଛି ବିଜେଡି । ସେପଟେ ବିଜେପି କହୁଛି କଂଗ୍ରେସ ଭୋଟର ମୋଦି ମୁଁହା ହେଲେଣି । ତେଣୁ କଂଗ୍ରେସ ଭୋଟ ଯିବ ବିଜେପି ଆଡକୁ । ଏପରିକି ରୀତା ସାହୁ ବିଜେଡିରେ ମିଶିବା ପରେ କଂଗ୍ରେସ ଦଳ ଭିତରେ ଫାଟ ସୃଷ୍ଟି ହୋଇଛି । ତେଣୁ ଏହାର ଫାଇଦା ନେବ ବିଜେପି । ତେବେ ଏ ସବୁ ଭିତରେ ଆଜି ଦୀର୍ଘ ଦିନର ନୀରବତା ପରେ ମୁଁହ ଖୋଲିଛନ୍ତି ରାଜ୍ୟ କଂଗ୍ରେସ ସଭାପତି ପ୍ରସାଦ ହରିଚନ୍ଦନ । ନିଜ ଦମ୍ରେ କଂଗ୍ରେସ ବିଜେପୁରରେ ବିଜୟୀ ହେବ ବୋଲି ଦୃଢୋକ୍ତି ବାଢିଛନ୍ତି । ପୂର୍ବରୁ ବିଜେପୁରକୁ ନେଇ ବରିଷ୍ଠ କଂଗ୍ରେସ ନେତା ନିରଞ୍ଜନ ପଟ୍ଟନାୟକ ମୁହଁ ଖୋଲିଥିଲେ । ସେ କହିଥିଲେ ବିଜେଡି ଓ ବିଜେପି ଦଳରେ ପ୍ରାର୍ଥୀ ନଥିବାରୁ ଅନ୍ୟ ଦଳରୁ ପ୍ରାର୍ଥୀ ଖୋଜୁଛନ୍ତି । କିନ୍ତୁ କଂଗ୍ରେସ ଦଳରେ ଏବେ ମଧ୍ୟ ଉପଯୁକ୍ତ ପ୍ରାର୍ଥୀ ଅଛନ୍ତି ଏବଂ ବିଜେପୁରରେ ଦଳ ବିଜୟୀ ହେବ ବୋଲି ସେ ଦୃଢୋକ୍ତି ପ୍ରକାଶ କରିଥିଲେ ।
କିନ୍ତୁ ବିଜେପୁର ଇତିହାସ ଉପରେ ଯଦି ଆମେ ନଜର ପକାଇବା ତେବେ ଦୀର୍ଘ ୧୩ ବର୍ଷ ଧରି ଏହା କଂଗ୍ରେସର ଗଡ ରହି ଆସିଛି । ରାଜ୍ୟରେ ବିଜେଡି ଓ ଦେଶରେ ମୋଦିଙ୍କ ହାୱା ସତ୍ତେ୍ୱ ମଧ୍ୟ ଏଠାରେ ସାଧାରଣ ନିର୍ବାଚନରେ କଂଗ୍ରେସ ମାତ ଦେଇଥିଲା ବିଜେଡିକୁ । ୨୦୧୪ ସାଧାରଣ ନିର୍ବାଚନରେ ବିଜେପୁରକୁ କ୍ରମାଗତ ତୃତୀୟ ଥର ପାଇଁ ହାତେଇଥିଲା କଂଗ୍ରେସ । ଦିବଂଗତ ବିଧାୟକ ସୁବଳ ସାହୁ ୫୩ ହଜାର ୨ଶହ ୯୦ ଭୋଟ ପାଇ ବିଜେଡି ନେତା ପ୍ରସନ୍ନ ଆଚାର୍ଯ୍ୟଙ୍କୁ ମାତ୍ର ୪ଶହ ୫୮ ଭୋଟରେ ପରାସ୍ତ କରିଥିଲେ । ବିଜେପି ପ୍ରାର୍ଥୀ ପାଇଥିଲେ ମାତ୍ର ୩୦ ହଜାର ଭୋଟ ।
୨୦୦୪ରେ ଏହି ଆସନରୁ ଲଢିଥିଲେ ୮ ଜଣ ପ୍ରାର୍ଥୀ । ସେତେବେଳେ ରାଜ୍ୟରେ ଥିଲା ବିଜେଡି-ବିଜେପି ମେଂଟ । କଂଗ୍ରେସ ଟିକେଟରୁ ଲଢିଥିଲେ ସୁବଳ ସାହୁ । ଆଉ ବିଜେଡିର ପ୍ରାର୍ଥୀ ହୋଇଥିଲେ ଅଶୋକ କୁମାର ପାଣିଗ୍ରାହୀ । ସୁବଳ ସାହୁ ପାଇଥିଲେ ୬୬ ହଜାର ୪୦୭ ଭୋଟ ଆଉ ବିଜେଡି ପ୍ରାର୍ଥୀ ପାଇଥିଲେ ୪୪ ହଜାର ୪୮୯ ଭୋଟ । ବିଜେଡି ପ୍ରାର୍ଥୀଙ୍କୁ ପରାସ୍ତ କରି ବିଧାନସଭାରେ ପ୍ରବେଶ କରିଥିଲେ ସୁବଳ ସାହୁ ।
୨୦୦୯ରେ ଏହି ଆସନରୁ ଲଢିଥିଲେ ୭ ଜଣ ପ୍ରାର୍ଥୀ । ଏହି ସମୟ ବେଳକୁ ଭାଙ୍ଗିଯାଇଥିଲେ ବିଜେଡି ବିଜେପି ମେଂଟ । କଂଗ୍ରେସରୁ ପ୍ରାର୍ଥୀ ହୋଇଥିଲେ ସୁବଳ ସାହୁ, ବିଜେଡିରୁ ପ୍ରଭାତ ଆଦିତ୍ୟ ମିଶ୍ର ଓ ବିଜେପିରୁ ମହମ୍ମଦ ରଫିକ୍ । ହେଲେ ପୁଣି ଚାଲିଥିଲା ସୁବଳ ସାହୁଙ୍କ ଯାଦୁ । ସୁବଳ ପାଇଥିଲେ ୫୬ ହଜାର ୮୬୪ ଭୋଟ । ବିଜେଡି ପାଇଥିଲା ୪୭ ହଜାର ୮୯୩ ଓ ବିଜେପି ପାଖକୁ ଯାଇଥିଲା ୧୯ ହଜାର ୪୯୩ ଭୋଟ । ବିଜେଡି ଓ ବିଜେପିକୁ ମାତ ଦେଇ ଦ୍ୱିତୀୟ ଥର ପାଇଁ ବିଧାନସଭା ଆସିଥିଲେ ସୁବଳ ସାହୁ ।ତେଣୁ ସୁବଳଙ୍କ ପରେ ଏବେ ବିଜେପୁର ରାଜନୀତିରେ କଂଗ୍ରେସର ପାରମ୍ପରିକ ଭୋଟ ବ୍ୟାଙ୍କ ଉପରେ ସମସ୍ତଙ୍କ ନଜର । ଏବଂ ସମସ୍ତେ ଧରି ନେିଛନ୍ତି କଂଗ୍ରେସ ଦୁର୍ବଳ ହୋଇଯାଇଛି । ତେଣୁ ସେହି ଭୋଟ ଉପରେ ଅଙ୍କ କଷୁଛନ୍ତି ।
ସୁବଳ ସାହୁଙ୍କ ଦେହାନ୍ତ ପରେ ବିଜେପୁର ନିର୍ବାଚନ ପାଇଁ ପ୍ରଥମେ ସାମ୍ନାକୁ ଆସିଥିଲା ବିଜେଡି । ସୁବଳଙ୍କ ପତ୍ନୀ ଓ ପରିବାରବର୍ଗଙ୍କୁ ଦଳରେ ମିଶାଇ କଂଗ୍ରେସ ଭୋଟ ହାତେଇବାକୁ ଲକ୍ଷ୍ୟ ରଖିଛି ବିଜେଡି । ଏପରିକି ଖାଲି ରୀତା ସାହୁ ନୁହେଁ କଂଗ୍ରେସର ପୂର୍ବତନ ଅଧ୍ୟକ୍ଷ ଓ କାଉନସିଲରଙ୍କୁ ମଧ୍ୟ ଦଳରେ ମିଶାଇ ବିଜେପୁର ଦଖଲ ଅଭିଯାନରେ ଜୋର ଲଗାଇଛି ବିଜେଡି । ତେବେ ବିଜେଡିକୁ କାଉଣ୍ଟର କରିବାକୁ ବିଜେପି ମଧ୍ୟ ସମାନ ରାସ୍ତା ଆପଣାଇଥିଲା । ବିଜେଡିର ପୂର୍ବତନ ବିଧାୟକ ଅଶୋକ ପାଣିଗ୍ରାହୀଙ୍କ ହାତରେ ପଦ୍ମ ଫୁଲ ଦେଇ ବିଜେପି କ୍ୟାମ୍ପରେ ସାମିଲ କରିଥିଲା ଦଳ । ବିଜେଡି ଭୋଟକୁ ଭାଗ କରିବା ସହ କଂଗ୍ରେସ ଭୋଟକୁ ହାତେଇପାରିଲେ ଦଳର ବିଜୟ ସୁନିଶ୍ଚିତ ବୋଲି ଦଳର ନେତୃବୃନ୍ଦ ଆଶା ବାନ୍ଧି ବସିଛନ୍ତି । ତେବେ ଏସବୁ ଭିତରେ ଆଜି କଂଗ୍ରେସ ଦଳ ବିଜେପୁର ଲଢେଇରେ ସାମିଲ ହୋଇଛି । ପିସିସି ଅଧ୍ୟକ୍ଷ ପ୍ରସାଦ ଆଜି ବିଜେପୁରକୁ ନେଇ ଦଳର ଆଭିମୁଖ୍ୟ ସ୍ପଷ୍ଟ କରିଛନ୍ତି । କଂଗ୍ରେସ ସହ ବିଜେପୁରବାସୀ ପୂର୍ବରୁ ରହିଥିଲେ ଏବେ ମଧ୍ୟ ଅଛନ୍ତି ତେଣୁ ବିଜେପୁରରେ ଦଳର ବିଜୟ ସୁନିଶ୍ଚିତ ବୋଲି ସେ କହିଛନ୍ତି ।
ବିଜେପୁର ପାଇଁ ବିଜେଡି ପ୍ରାର୍ଥୀ ଘୋଷଣା କରି ରେସରେ ସବୁଠାରୁ ଆଗରେ ରହିଛି । ବିଜେପି ମଧ୍ୟ ଅଶୋକ ପାଣିଗ୍ରାହୀଙ୍କୁ ପ୍ରାର୍ଥୀ କରିବା ଏକ ପ୍ରକାର ସୁନିଶ୍ଚିତ । କିନ୍ତୁ ପ୍ରାର୍ଥୀ ଖୋଜା ଲଢେଇରେ ସବୁଠାରୁ ପଛରେ ରହିଛି କଂଗ୍ରେସ । ଦଳ ପକ୍ଷରୁ କାହାକୁ ପ୍ରାଥୀ ର୍ କରାଯିବ ସେ ନେଇ କିଛି ଠିକ୍ ହୋଇନଥିବା ବେଳେ ନେତୃବୃନ୍ଦଙ୍କ ମଧ୍ୟରେ ତୁ ତୁ ମେଁ ମେଁ ଆରମ୍ଭ ହୋଇଯାଇଛି । ବିଜେପୁର ପାଇଁ ପ୍ରାର୍ଥୀ ପ୍ରସାଦ ଠିକ୍ କରିବେନି ବରଂ ରାହୁଲ ଠିକ୍ କରିବେ ବୋଲି ତାରା କହିଛନ୍ତି ।
ସେପଟେ ବିଜେପୁର ନିର୍ବାଚନ ନେଇ ମାମଲା ହାଇକୋର୍ଟରେ ଗଡୁଥିବା ବେଳେ ସୋମବାର ସ୍ୱର୍ଗତ ସୁବଳ ସାହୁଙ୍କ ମୃତ୍ୟୁ ପ୍ରମାଣ ପତ୍ରକୋର୍ଟରେ ଦାଖଲ କରାଯାଇଛି ।ଏହି ମାମଲା ଫଇସଲା ନହେବାଯାଏଁ ଉପ ନିର୍ବାଚନ କରାଯାଇପାରିବ ନାହିଁ । ଆସନ୍ତା ଗୁରୁବାର ଦିନ ପରବର୍ତୀ ଶୁଣାଣି ପରେ ମାମଲାର ପରବର୍ତି ଦିଗ ସାମ୍ନକୁ ଆସିବ ।