ମାସକ ମଧ୍ୟରେ ବଦଳିଗଲା ଚିତ୍ର ଚରିତ୍ର ! ମାସକ ପୂର୍ବରୁ ନିର୍ବାଚନ ପାଇଁ ଟିକେଟ ମାଗୁଥିଲେ, ଏବେ ଅଣଦେଖା ବାହାନା ଦେଖାଇ କଂଗ୍ରେସ ଛାଡି ବିଜେପିରେ ସାମିଲ ହେଲେ ପ୍ରକାଶ ।
କନକ ବ୍ୟୁରୋ : ରାଜନୀତିରେ ପ୍ରତି ମୁହୂର୍ତ୍ତରେ ଚିତ୍ର ଓ ଚରିତ୍ର ବଦଳିଥାଏ । ପୂର୍ବରୁ ଏହାର ଅନେକ ନଜିର ରହିଛି । ଆଉ ଏହି ତାଲିକାରେ ଏବେ ପ୍ରକାଶଙ୍କ ନାଁ ଯୋଡି ହୋଇଯାଇଛି । ପଦ୍ମ ଧରିବା ପରେ ପ୍ରକାଶଙ୍କ ଦୋମୁହାଁ ନୀତି ଏବେ ପଦାରେ ପଡିଛି । ରାଜନୀତିରେ ସବୁ ସମ୍ଭବ ଏହାକୁ ପ୍ରମାଣିତ କରିଛନ୍ତି ପ୍ରକାଶ । କାରଣ ଏହାପୂର୍ବରୁ ପ୍ରକାଶ ଗତକାଲି କଂଗ୍ରେସରୁ ଇସ୍ତଫା ଦେଇଥିବା ବେଳେ ଦଳ ବିରୋଧରେ ଲମ୍ବା ଅଭିଯୋଗଫର୍ଦ୍ଦ ରଖିଥିଲେ । ଏପରିକି କଂଗ୍ରେସ ନେତୃତ୍ୱ ତାଙ୍କୁ ବାରମ୍ବାର ଅପମାନିତ କରି ଆସିଛନ୍ତି । କଟକ ଜିଲ୍ଲା ସଭାପତି ପଦରୁ ହଟାଯିବା ସହ ପିସିସି ସଭାପତି ତାଙ୍କ କଥା ଶୁଣୁନଥିଲେ ବୋଲି ସଙ୍ଗୀନ ଅଭିଯୋଗ ଆଣିଥିଲେ ପ୍ରକାଶ । ୨୦ ବର୍ଷ ଧରି କଂଗ୍ରେସ ପାଇଁ କାମ କରିବା ପରେ ଦଳ ମୋତେ ଅବହେଳା କଲା । ଯେଉଁଥିପାଇଁ ସେ ଦଳକୁ ବାଏ ବାଏ କଲେ ବୋଲି ଇସ୍ତଫାପତ୍ରରେ ଲେଖିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ ବିଜେପିରେ ମିଶିବାର ଠିକ୍ ମାସକ ପୂର୍ବରୁ ପ୍ରକାଶ ପିସିସି ସଭାପତିଙ୍କୁ ଯେଉଁ ଚିଠି ଲେଖିଥିଲେ ତାହା ତାଙ୍କର ଦୋମୁହାଁ ନୀତିକୁ ପଦାରେ ପକାଇଛି । ଗତ ଫେବ୍ରୁଆରୀ ୧୫ ତାରିଖରେ ପ୍ରକାଶ ପିସିସି ସଭାପତିଙ୍କ ନିକଟକୁ ଚିଠି ଲେଖିବା ସହ ସାଲେପୁର ପାଇଁ ତାଙ୍କୁ ଟିକେଟ ଦେବାକୁ ଅନୁରୋଧ କରିଥିଲେ । ଦୀର୍ଘ ୨୦ ବର୍ଷ ଧରି ନିର୍ବାଚନମଣ୍ଡଳୀବାସୀଙ୍କ ସହ ଥିବାରୁ ତାଙ୍କୁ କଂଗ୍ରେସ ଟିକେଟ ମିଳୁ ବୋଲି ରାଜ୍ୟ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକଙ୍କୁ ଚିଠି ଲେଖି ଜଣାଇଥିଲେ । ତେବେ ଏହାର ବହୁ ଦିନ ଆଗରୁ କଂଗ୍ରେସ ପକ୍ଷରୁ ମଧ୍ୟ ୨୦୧୪ରେ ବିଜୟୀ ହୋଇଥିବା ସମସ୍ତ ବିଧାୟକଙ୍କୁ ଟିକେଟ ଦେବା ନେଇ ଘୋଷଣା କରାଯାଇଥିଲା । ଯେଉଁ ତାଲିକାରେ ପ୍ରକାଶଙ୍କ ନାଁ ମଧ୍ୟ ରହିଥିଲା । ତେବେ ଏହାପରେ ମଧ୍ୟ ପ୍ରକାଶ ଅନେକ ସମୟରେ ଏଭଳି କାର୍ଯ୍ୟ କରିଥିଲେ ଯାହା ଦଳ ବିରୋଧୀ ଥିଲା । ବିନା ଦଳୀୟ ବ୍ୟାନରରେ ପଦଯାତ୍ରା କରିବା ପରେ ମଧ୍ୟ ଦଳ ପ୍ରକାଶଙ୍କ ହାତ ଛାଡିନଥିଲା ।
ପିସିସି ସଭାପତିଙ୍କୁ ନିଜ ଟିକେଟ ପାଇଁ ପ୍ରକାଶ ଚିଠି ଲେଖିବାର ଗୋଟିଏ ମାସ ପରେ ବଦଳିଛି ସାଲେପୁର ରାଜନୀତିର ଚିତ୍ର । ପ୍ରକାଶ ଏବେ ବିଜେପି କ୍ୟାମ୍ପରେ । ତେବେ ପ୍ରଶ୍ନ ଉଠୁଛି ପ୍ରକାଶଙ୍କ ଟିକେଟ ଏକ ପ୍ରକାର ନିଶ୍ଚିତ ହୋଇଥିବା ବେଳେ ଗୋଟିଏ ମାସ ମଧ୍ୟରେ କାହିଁକି ପଲଟିଯାଇଛନ୍ତି ପ୍ରକାଶ । ଏହାଛଡା ଦଳ ଓ ପିସିସି ସଭାପତିଙ୍କ ବିରୋଧରେ ପ୍ରକାଶ ଯେଉଁ ଅଭିଯୋଗ ଆଣିଛନ୍ତି ସେଥିରେ କେତେ ସତ୍ୟତା ରହିଛି । କାରଣ ପ୍ରକାଶଙ୍କୁ ଟିକେଟ ମିଳିବା ନେଇ କଂଗ୍ରେସ ଶିବିରରୁ ପୂର୍ବରୁ ଗ୍ରୀନ୍ ସିଗନାଲ ମିଳିସାରିଥିଲା ବୋଲି ଦଳର ଅନ୍ଦରମହଲରେ ଚର୍ଚ୍ଚା ହେଉଥିଲା । କିନ୍ତୁ ନିଜର ରାଜନୈତିକ ଫାଇଦା ପାଇଁ ପ୍ରକାଶ ଅଣଦେଖାକୁ ପ୍ରସଙ୍ଗ କରି କଂଗ୍ରେସରୁ ଇସ୍ତଫା ଦେଇଥିବା ଚର୍ଚ୍ଚା ହେଉଛି । ଏପରିକି ଏଭଳି କରି ପ୍ରକାଶ ସୁବିଧାବାଦୀ ରାଜନୀତି କରୁଛନ୍ତି ବୋଲି କଂଗ୍ରେସ ଶିବିରରେ ଶୁଣିବାକୁ ମିଳୁଛି । ବାରମ୍ବାର ନିର୍ବାଚନ ହାରୁଥିଲେ ମଧ୍ୟ ଦଳ ପ୍ରକାଶଙ୍କ ଉପରେ ଭରସା ତୁଟାଇନଥିଲା । ଲଗାତାର ୩ ଥର ପରାଜିତ ହେବା ପରେ ମଧ୍ୟ କଂଗ୍ରେସ ଟିକେଟରୁ ଚତୁର୍ଥ ଥରରେ ବିଜୟ ଲାଭ କରିଥିଲେ ପ୍ରକାଶ । କିନ୍ତୁ ଦଳ ଯେତେବେଳେ ପ୍ରକାଶଙ୍କୁ ନେଇ ନିର୍ବାଚନ ବୈତରଣୀ ପାର ହେବାକୁ ଲକ୍ଷ୍ୟ ରଖିଥିଲା ସେତେବେଳେ ପ୍ରକାଶ ନିଜର ରାଜନୈତିକ ଫାଇଦା ପାଇଁ କଂଗ୍ରେସର ହାତ ଛାଡିବାକୁ ମଧ୍ୟ ପଛାଇନାହାନ୍ତି ବୋଲି ଦଳୀୟ ନେତା କହିଛନ୍ତି ।