ନାଥୁରାମ ଗଡସେଙ୍କୁ ଦେଶଭକ୍ତ କହିବା ପ୍ରଜ୍ଞା ଠାକୁରଙ୍କୁ ପଡିଲା ମହଙ୍ଗା । ପ୍ରତିରକ୍ଷା କମିଟିରୁ ବିଦା ହେଲେ, ବିଜେପିରୁ ହୋଇପାରନ୍ତି ବହିଷ୍କାର!
କନକ ବ୍ୟୁରୋ : ନାଥୁରାମ ଗଡସେଙ୍କୁ ଦେଶଭକ୍ତ କହିବା ବିଜେପି ସାଂସଦ ପ୍ରଜ୍ଞା ଠାକୁରଙ୍କୁ ମହଙ୍ଗା ପଡିଛି । ମହାତ୍ମା ଗାନ୍ଧୀଙ୍କ ହତ୍ୟାକାରୀ ଗଡସେଙ୍କୁ ସଂସଦରେ ଦେଶଭକ୍ତ କହିବା ପରେ ପ୍ରଜ୍ଞା ଠାକୁରଙ୍କ ଉପରେ କଡା କାର୍ଯ୍ୟାନୁଷ୍ଠାନ ନିଆଯାଇଛି । ପ୍ରତିରକ୍ଷା ମନ୍ତ୍ରାଳୟର ସଂସଦୀୟ କମିଟିରୁ ପ୍ରଜ୍ଞା ଠାକୁରଙ୍କୁ ହଟାଯାଇଛି । ଏହାଛଡା ଚଳିତ ଅଧିବେଶନରେ ବିଜେପିର ସଂସଦୀୟ ଦଳ ବୈଠକରେ ପ୍ରଜ୍ଞା ଠାକୁରଙ୍କୁ ଉପସ୍ଥିତ ନ ରହିବାକୁ ଦଳ ପକ୍ଷରୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ, ଦଳୀୟ ଅନୁଶାସନ ସମିତି ମଧ୍ୟ ପ୍ରଜ୍ଞା ଠାକୁରଙ୍କ ବିରୋଧରେ ବଡ କାର୍ଯ୍ୟାନୁଷ୍ଠାନ ନେଇପାରେ ବୋଲି ସୂଚନା ମିଳିଛି । ଏପରିକି ଦଳରୁ ତାଙ୍କୁ ବହିଷ୍କାର ମଧ୍ୟ କରାଯାଇପାରେ । ବିଜେପିର କାର୍ଯ୍ୟକାରୀ ଅଧ୍ୟକ୍ଷ ଜେପି ନଡ୍ଡା ପ୍ରଜ୍ଞା ଠାକୁରଙ୍କ ବୟାନକୁ ନିନ୍ଦା କରିବା ସହ ଦଳ ଏହାକୁ ସମର୍ଥନ କରୁନାହିଁ ବୋଲି ସ୍ପଷ୍ଟ କରିଛି ।
ଗତକାଲି ଲୋକସଭାରେ ଏସପିଜି ସଂଶୋଧନ ବିଲ ସମୟରେ ଡ଼ିଏମକେ ସାଂସଦ ଏ ରାଜା ନିଜ ରାୟ ରଖିଥିଲେ । ଏ ରାଜା ଗଡସେଙ୍କ ଏକ ବୟାନକୁ ଆଧାର କରି କହିଥିଲେ ଯେ ଗଡସେ କାହିଁକି ମହାତ୍ମା ଗାନ୍ଧୀଙ୍କୁ ହତ୍ୟା କରିଥିଲେ। ଯେତେବେଳେ ଏ ରାଜା କହୁଥିଲେ ସେହି ସମୟରେ ପ୍ରଜ୍ଞା ଠାକୁର ବିତର୍କ ମଝିରେ କହିଥିଲେ ଯେ ଆପଣ ଜଣେ ଦେଶ ଭକ୍ତଙ୍କ ଉଦାହରଣ ଦେଇପାରିବେ ନାହିଁ । ଆଉ ପ୍ରଜ୍ଞା ଠାକୁରଙ୍କୁ ଏହି ବୟାନକୁ ନେଇ ସଂସଦରେ ହଟ୍ଟଗୋଳ ଦେଖିବାକୁ ମିଳିଥିଲା ।