ପ୍ରଧାନମନ୍ତ୍ରୀ ଆବାସ ଯୋଜନାରେ ପଛରେ ପଡ଼ିଛି ଭୁବନେଶ୍ୱର : ନୀତି ଆୟୋଗଙ୍କ ରିପୋର୍ଟରେ ପ୍ରକାଶ ପାଇଛି ତଥ୍ୟ
ମଂଜୁରୀ ପ୍ରାପ୍ତ ପ୍ରକଳ୍ପର ସରିଛି ମାତ୍ର ୨୫%
କନକ ବ୍ୟୁରୋ : ପ୍ରଧାନମନ୍ତ୍ରୀ ଆବାସ ଯୋଜନାରେ ପଛରେ ପଡିଛି ଭୁବନେଶ୍ୱର । ବିଭାଗୀୟ ସମନ୍ୱୟ ଅଭାବ ସାଙ୍ଗକୁ କରୋନା ମହାମାରୀ ପ୍ରକଳ୍ପକୁ ପଛକୁ ଠେଲି ଦେଇଛି । ୨୦୨୨ ସୁଦ୍ଧା କେନ୍ଦ୍ର ସରକାର ‘ହାଉସିଂ ଫର୍ ଅଲ’ ଲକ୍ଷ୍ୟ ରଖିଥିବା ବେଳେ ଏବେ ସୁଦ୍ଧା ମଞ୍ଜୁର ପାଇଥିବା ସଂଖ୍ୟାର ମାତ୍ର ୨୫ ପ୍ରତିଶତ ନିର୍ମାଣ ଶେଷ ହୋଇଛି । ଏନେଇ ନୀତି ଆୟୋଗଙ୍କ ରିପୋର୍ଟ ପ୍ରକାଶ ପାଇବା ସହ ଓଡିଶା ଗସ୍ତରେ ଥିବା ଗୃହନିର୍ମାଣ ଓ ନଗର ବ୍ୟାପାର ମନ୍ତ୍ରାଳୟ ସଚିବ ମଧ୍ୟ ପ୍ରକଳ୍ପର ମନ୍ଥରତାକୁ ନେଇ ପ୍ରଶ୍ନ ଉଠାଇଛନ୍ତି । ପୂର୍ବରୁ ରାଜୀବ ଆବାସ ଯୋଜନା ପରିବର୍ତ୍ତିତ ହୋଇ ପିଏମ୍ଏୱାଇ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଯୋଜନାରେ ‘ପ୍ରତ୍ୟେକଙ୍କୁ ଘର” ଲକ୍ଷ୍ୟରେ କେବଳ ବସ୍ତି ବାସିନ୍ଦା ନୁହଁନ୍ତି, ବରଂ ସହରୀ ଗରିବଙ୍କୁ ବି ପକ୍କା ଘର ଦିଆଯାଉଛି । ଯେଉଁ ବସ୍ତିବାସିନ୍ଦାଙ୍କ ନିଜର ଜମି ନାହିଁ ସେମାନଙ୍କୁ ଚିହ୍ନଟ କରି ସ୍ୱତନ୍ତ୍ର ଘର ତିଆରି କରିଦିଆଯାଉଛି । ଯେଉଁ ମାନଙ୍କ ଜାଗା ଅଛି, ହେଲେ ଘର ନାହିଁ କିମ୍ବା କଚ୍ଚା ଘର ଅଛି, ସେମାନଙ୍କୁ ପକ୍କାଘର ତିଆରିପାଇଁ ୨ ଲକ୍ଷ ଟଙ୍କା ଯୋଗାଇ ଦିଆଯାଉଛି । ପ୍ରାଥମିକ ପର୍ଯ୍ୟାୟରେ ୯୬୦ ଜଣଙ୍କୁ ଚିହ୍ନଟ କରାଯାଇ ଆର୍ଥିକ ଅନୁଦାନ ଯୋଗଇ ଦିଆଯିବାକୁ ଯୋଜନା ହୋଇଥିଲା । ହେଲେ ବିଭିନ୍ନ କାରଣରୁ ବର୍ତ୍ତମାନ ସୁଦ୍ଧା ଶତପ୍ରତିଶତଙ୍କୁ ଘର ଯୋଗଇ ଦିଆଯାଇପାରିନାହିଁ । କେତେକ ଜାଗାରେ ଆର୍ଥିକ ଅନୁଦାନ ଦିଆସାରିଥିଲେ ମଧ୍ୟ ଘର ତିଆରି ପାଇଁ ଏହି ଅନୁଦାନ ନିଅଣ୍ଟ ହୋଇଛି । ଫଳରେ ପ୍ରକଳ୍ପ ଏକପ୍ରକାର ଫେଲ ମାରିଛି ।