ବିଜେଡିରୁ ବହିଷ୍କାର ପରେ ଗଣମାଧ୍ୟମ ଆଗରେ ସଫେଇ ରଖିଲେ ପ୍ରଦୀପ ପାଣିଗ୍ରାହୀ । ପାଠକ ବାପାପୁଅଙ୍କୁ ଅତିଭଦ୍ରଲୋକ ବୋଲି ଦେଲେ ସାର୍ଟିଫିକେଟ, ଟାଟାର ଚିଠି ଦେଖାଇଲେ ସାମ୍ବାଦିକ
କନକ ବ୍ୟୁରୋ : ପାଠକ ବାପା ପୁଅଙ୍କ ଅମାପ ସମ୍ପତି କଥା, ସାରା ଓଡିଶାରେ ହଇଚଇ ସୃଷ୍ଟି କରିବା ପରେ ଧୀରେ ଧୀରେ ସେହି ଜାଲ ଭିତରେ ଛନ୍ଦି ହୋଇଯାଉଛନ୍ତି ପୂର୍ବତନ ମନ୍ତ୍ରୀ ତଥା ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ । କାରଣ ପୁଅ ଆକାଶ ପାଠକଙ୍କ ସହ ବିଧାୟକଙ୍କ ଝିଅ ବାହାଘର ହେବାର ଥିଲା । ଆଉ ରବିବାର ପତ୍ନୀ ସୁଜାତା ପାଣିଗ୍ରାହୀଙ୍କ ସହ ସିଧା ଆସିଥିଲେ ଗଣମାଧ୍ୟମକୁ ଉତର ଦେବା ପାଇଁ ।
Kanak News is now on WhatsApp
Join and get latest news updates delivered to you via WhatsApp
ଆକାଶ ପାଠକଙ୍କ ପାଇଁ ଓକିଲାତି କରୁଥିବା ବେଳେ ବିଧାୟକ ପ୍ରଦୀପ ପାଣିଗ୍ରାହୀଙ୍କୁ ଟାଟା କମ୍ପାନୀ ଦେଇଥିବା ଚିଠିକୁ ଦେଖାଇଥିଲେ ସାମ୍ବାଦିକ । ଟାଟା କମ୍ପାନୀର ଚିଠିରେ ଲେଖାଥିଲା, ଆକାଶ ଟାଟା କମ୍ପାନୀର କର୍ମଚାରୀ ନୁହଁନ୍ତି,ସେ ଏମଡି କହି, ଲୋକଙ୍କ ଠାରୁ ଟଙ୍କା ଆଦାୟ କରୁଥିଲେ । ଏହି ଚିଠି ଦେଖିବା ପରେ ପ୍ରଦୀପ ଆଉ ବୁଝିପାରିନଥିଳେ, କଣ କହିବେ ।
ରାଜସ୍ଥାନର ଉଦୟପୁରରେ, ଏକ ବିଳାସପୂର୍ଣ୍ଣ ହୋଟେଲରେ ଡିସେମ୍ବର ୧୧ ତାରିଖରେ ପ୍ରଦୀପଙ୍କ ଝିଅ ଓ ଆକାଶଙ୍କ ବିବାହ ହେବାର ଥିଲା । କିନ୍ତୁ ଏହା ଭିତରେ ଭିଜିଲାନ୍ସ ଓଡିଶା ଇତିହାସର ସବୁଠାରୁ ବଡ ରେଡ ମାରିଲା । ଆଇଏଫଏସ ଅଭୟକାନ୍ତ ପାଠକ ଓ ପୁଅ ଆକାଶ ପାଠକଙ୍କ ଏମିତି ସମ୍ପତି ବାହାରିଲା ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଲା । ଏହି ଘଟଣା ପରେ ରବିବାର ହଠାତ ବିଜେଡି କାର୍ଯ୍ୟାଳୟକୁ ଏକ ପ୍ରେସ ରିଲିଜ ଆସିଲା । ଯେଉଁଥିରେ ଲେଖାଥିଲା ଜନବିରୋଧୀ କାର୍ଯ୍ୟ ପାଇଁ ପ୍ରଦୀପଙ୍କୁ ଦଳରୁ ବହି୍େକାର କରାଗଲା ।
ପତ୍ନୀ ସୁଜାତାଙ୍କ ସହ ପ୍ରଦୀପ ପାଣିଗ୍ରାହୀ ଗଣମାଧ୍ୟମ ସମ୍ମୁଖରେ ପ୍ରାୟ ୨ ଘଂଟା ଧରି ସଫେଇ ରଖିଥିଲେ । ସେ କହିବାକୁ ଚାହୁଁଥିଲେ, ବିଜେଡି ତାଙ୍କ ଉପରେ ଆକ୍ରୋଶ ରଖି ଏବଂ ତାଙ୍କ ଝିଅ ବାହାଘର ଭଣ୍ଡୁର କରିବା ପାଇଁ ଏ ସବୁ ଷଡଯନ୍ତ୍ର କରିଛି । ସେପଟେ ଏହି ଘଟଣାକୁ ତଦନ୍ତ କରୁଛି ଏସଆଇଟି । ତେଣୁ ଆଗକୁ ଘଟଣା କୁଆଡେ ଯାଉଛି, ତା ଉପରେ ନଜର ।