ପାର୍ବଣରେ ପୋଷ୍ଟର ୱାର । ରାଜଧାନୀରେ ଛାଇଯାଇଛି ନେତାଙ୍କ ପୋଷ୍ଟର । ରାଜନୈତିକ ପ୍ରଚାର ପାଇଁ ସହର ସାରା ଲାଗିଛି ହୋର୍ଡିଂ, କାନ୍ଥରେ ଲେଖା ହୋଇଛି ନାରା ।
କନକ ବ୍ୟୁରୋ: ରାଜଧାନୀରେ ପୋଷ୍ଟର ୱାର । ମୁହାଁମୁହିଁ ବିଜେପି-ବିଜେଡି । କାନ୍ଥବାଡ଼ରେ ପୋଷ୍ଟର ଲଗାଇ ଚାଲିଛି ରାଜନୈତିକ ପ୍ରତିଦ୍ୱନ୍ଦିତା । ଦୁଇ ପ୍ରମୁଖ ରାଜନୈତିକ ଦଳ ମଧ୍ୟରେ ଛକାପଞ୍ଝା । ଯେଉଁଠି ବିଜେପିର ଦଳୀୟ ଚିହ୍ନ ରହିଛି ସେଠି ଲେଖା ଯାଇଛି- ଆଉ ଥରେ ଅପରାଜିତା । ଆଉ ଯେଉଁଠି ବିଜେଡିର ଦଳୀୟ ଚିହ୍ନ ରହିଛି ସେଠି ଲେଖା ରହିଛି- ଆମ ଚିହ୍ନ ଶଙ୍ଖ ଚିହ୍ନ । ପୂର୍ବରୁ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀଙ୍କ ସମର୍ଥକ ରାଜଧାନୀର ବିଭିନ୍ନ କାନ୍ଥରେ ‘ପୁଣି ଅପରାଜିତା’ ଲେଖୁଥିଲେ । ଏବେ ବିଜେଡି ମଧ୍ୟ କାନ୍ଥରେ ପୋଷ୍ଟର ମାରିବା ଆରମ୍ଭ କରିଛି । ବିଭିନ୍ନ ସ୍ଥାନରେ ବିଜେଡି କର୍ମୀମାନେ ‘ଶଙ୍ଖ ବିକାଶର ଚିହ୍ନ’ ଓ ‘ଆମ ଚିହ୍ନ ଶଙ୍ଖ ଚିହ୍ନ’ ଲେଖାଥିବା ପୋଷ୍ଟର ଲଗାଉଛନ୍ତି । ଯାହାକୁ ନେଇ ଆରମ୍ଭ ହୋଇଛି ପୋଷ୍ଟର ୱାର ।
Kanak News is now on WhatsApp
Join and get latest news updates delivered to you via WhatsApp
ବିଜେପି ନାରାକୁ କାନ୍ଥରୁ ଲିଭାଉଛି କିଏ?
ବିଜେଡି ବିରୋଧରେ ଅଭିଯୋଗ ଆଣିଲା ବିଜେପି
ସାଂସଦ ଅପରାଜିତା ଷଡଙ୍ଗୀଙ୍କ ପୋଷ୍ଟର ତଥା କାନ୍ଥରେ ଥିବା ନାରାକୁ ବିଜେଡି ଜାଣିଶୁଣି ନଷ୍ଟ କରୁଥିବା ବିଜେପି ଅଭିଯୋଗ କରିଛି । ଦଳ କହିଛି, ବିଜେଡି ଏବେ ବିଜେପି ଓ ସାଂସଦଙ୍କୁ ଦେଖି ଭୟଭୀତ ହୋଇପଡ଼ିଛି । ଫଳରେ ପ୍ରଶାସନିକ ବଳ ଲଗାଇ ଦେଇଛି । ଆଗାମୀ ଦିନରେ ଭୁବନେଶ୍ୱରବାସୀ ଓ ରାଜ୍ୟବାସୀ ଏହାର ଜବାବ ଦେବେ । ସେପଟେ ବିଜେପିର ଅଭିଯୋଗ ଉପରେ ପ୍ରତିକ୍ରିୟା ରଖିଛି ବିଜେଡି । ଦଳ କହିଛି, ବିଜେଡି ପୋଷ୍ଟର ଲଢେଇରେ ବିଶ୍ୱାସ କରେ ନାହିଁ । ଲୋକଙ୍କ ମନ ଜିତିବାରେ ବିଶ୍ୱାସ କରେ । ବିଜେଡି ଲୋକଙ୍କ ସହ ରହିଛି, ଆଗକୁ ମଧ୍ୟ ରହିବ ।
ନିର୍ବାଚନର ଢ଼େର ଆଗରୁ ଭୁବନେଶ୍ୱରରେ ଯେଉଁ ଭଳି ଢ଼ଙ୍ଗରେ ରାଜନୈତିକ ପ୍ରତିଦ୍ୱନ୍ଦିତା ଆରମ୍ଭ ହୋଇଗଲାଣି, ଏଥିରୁ ହୁଏତ ଗୋଟିଏ କଥା ସ୍ପଷ୍ଟ ଯେ, ୨୦୨୪ରେ ବଡ଼ ଧରଣର ଲଢ଼େଇ ଦେଖିପାରେ ରାଜଧାନୀ ଭୁବନେଶ୍ୱର ।