ବ୍ରହ୍ମପୁରରେ ନିର୍ବାଚନ ପରବର୍ତ୍ତୀ ହିଂସା । ପରାଜିତ ପ୍ରାର୍ଥୀଙ୍କ ଘର ଆଗରେ ରାତି ଅଧରେ ଦୁର୍ବୃତଙ୍କ ଆତଙ୍କରାଜ ।

କନକ ବ୍ୟୁରୋ : ବ୍ରହ୍ମପୁରରେ ନିର୍ବାଚନ ପରବର୍ତୀ ହିଂସା । ଗୋଷାଣୀନୂଆଁ ଥାନା ଅନ୍ତର୍ଗତ ବ୍ରିଟ କଲୋନୀରେ ପରାଜିତ ପ୍ରାର୍ଥୀଙ୍କ ଘର ଆଗରେ ରାତି ଅଧରେ ଆତଙ୍କ ଖେଳାଇଲେ ଦୁର୍ବୃତ । ପରାଜିତ ପ୍ରାର୍ଥୀଙ୍କ ଘର ଉପରକୁ ଆକ୍ରମଣ କରିବା ସହ ବାଇକ ଭାଙ୍ଗି ଚୁରମାର ହୋଇଯାଇଛି । ପୂର୍ବତନ କର୍ପୋରେଟର ତଥା ଏଥର ୧୨ ନମ୍ବର ୱାର୍ଡର ସ୍ୱାଧୀନ ପ୍ରାର୍ଥୀ ବିରେନ ପଟ୍ଟନାୟକ ଓ ତାଙ୍କ ପତ୍ନୀ ତଥା ୧୪ ନମ୍ବର ୱାର୍ଡର ବିଜେପି ପ୍ରାର୍ଥୀ ସସ୍ମିତା ଦାସ ଏଥର ନିର୍ବାଚନ ଲଢୁଥିଲେ ।

ଉଭୟ ଗତକାଲି ନିର୍ବାଚନ ଫଳାଫଳରେ ପରାଜିତ ହୋଇଛନ୍ତି । ଏମାନେ ଗତକାଲି ରାତିରେ ଶୋଇଥିବାବେଳେ ସେମାନଙ୍କ ଘର ଆଗରେ ଆତଙ୍କରାଜ ଚଳାଇଥିଲେ ଦୁର୍ବୃତ । ଏମାନେ କାରରେ ଆସି ବିରେନଙ୍କ ଘର ଦାଣ୍ଡରେ ଥିବା ବାଇକକୁ ପଥରରେ ଭାଙ୍ଗିଥିଲେ । ପରାଜିତ ପ୍ରାର୍ଥୀ ପାଟିତୁଣ୍ଡ ଶୁଣିବା ପରେ ବାହାରକୁ ଆସି ନିଜ ମୋବାଇଲରେ ଭିଡିଓ ଉତୋଳନ କରିଥିଲେ । ବ୍ରହ୍ମପୁର ମହାନଗର ନିର୍ବାଚନରେ ବିରେନଙ୍କୁ ଦଳୀୟ ଟିକେଟ ନ ମିଳିବାରୁ ସ୍ୱାଧାନ ପ୍ରାର୍ଥୀ ହୋଇଥିଲେ । ଏହାକୁ ନେଇ ଏକ ନିର୍ଦ୍ଦିଷ୍ଟ ରାଜନୈତିକ ଦଳର ଲୋକ ଅସନ୍ତୁଷ୍ଟ ଥିଲେ । ତେବେ ଘଟଣାପଛରେ କେଉଁମାନେ ଅଛନ୍ତି ତାହା ସ୍ପଷ୍ଟ ହୋଇନାହିଁ ।