ପ୍ରଥମ ଥର ପାଇଁ ଦ୍ୱିତୀୟ ଲହରରେ ୩ ପ୍ରତିଶତ ତଳକୁ ଖସିଲା ରାଜ୍ୟର ସଂକ୍ରମଣ ହାର । ଏପଟେ ନୟାଗଡ଼ ଓ ମୟୂରଭଞ୍ଜର ଟିପିଆର ୫ ପ୍ରତିଶତରୁ ଅଧିକ
ସକ୍ରିୟ ସଂକ୍ରମଣରେ ରେଡ୍ ଜୋନରେ ରହିଛନ୍ତି ଖୋର୍ଦ୍ଧା ଓ କଟକ
କନକ ବ୍ୟୁରୋ: ମେ’ ମାସରେ ଓଡ଼ିଶାରେ ଦୈନିକ କରୋନା ଆକ୍ରାନ୍ତଙ୍କ ସଂଖ୍ୟା ଯେମିତି ବଢୁଥିଲା, ସେମିତି ବଢୁଥିଲା ସଂକ୍ରମଣ ହାର । ପ୍ରତି ୪-୫ ଜଣ କରୋନା ପରୀକ୍ଷା କରୁଥିବା ବେଳେ ଜଣେ ଆକ୍ରାନ୍ତ ଚିହ୍ନଟ ହେଉଥିଲେ । ଦ୍ୱିତୀୟ ଲହରର ଶୀର୍ଷ ସ୍ତରରେ ପହଁଚିଥିଲା ସଂକ୍ରମଣ । ତେବେ ଜୁନ ମାସ ଆରମ୍ଭରେ ସଂକ୍ରମଣ ହାରରେ ବ୍ରେକ ଲାଗିଥିଲା ।
Kanak News is now on WhatsApp
Join and get latest news updates delivered to you via WhatsApp
ଜୁନ୍ ୧ ତାରିଖରେ ଟିପିଆର ୧୪.୦୨ ପ୍ରତିଶତ ରହିଥିଲାଏବଂ ଜୁନ ୧୧ ତାରିଖରେ ଏହା ୭.୯୭ ପ୍ରତିଶତକୁ ଖସି ଆସିଥିଲା । ଏହାପରେ ଜୁନ ୨୧ ତାରିଖରେ ୫ ପ୍ରତିଶତ ତଳକୁ ଖସିଥିଲା ସଂକ୍ରମଣ ହାର । ଏହାପରେ ଟିପିଆର ସାମାନ୍ୟ ଉପର ତଳ ହୋଇ ଗତି କରିଥିଲା । ପ୍ଲାଟ୍ୟୁ ସ୍ତରରେ ରହିଥିଲା ରାଜ୍ୟର କରୋନା ସଂକ୍ରମଣ । ତେବେ ଜୁଲାଇ ୧୧ରେ ୨.୯ ପ୍ରତିଶତକୁ ଖସି ଆସିଛି ସଂକ୍ରମଣ ହାର ।
ଓଡ଼ିଶା କରୋନା ମିଟର
ତାରିଖ ସଂକ୍ରମଣ ହାର
- ମେ’ ୨୧ ୨୦.୩୦%
- ଜୁନ ୧ ୧୪.୦୨%
- ଜୁନ ୧୧ ୭.୯୭%
- ଜୁନ ୨୧ ୪.୯୭%
- ଜୁଲାଇ ୧ ୪.୧୭%
- ଜୁଲାଇ ୧୧ ୨.୯୦%
ସାମଗ୍ରିକ ଭାବେ ରାଜ୍ୟର ସଂକ୍ରମଣ ହାର ୩ ପ୍ରତିଶତ ତଳକୁ ଖସିଥିଲେ ବି ଉପକୂଳ ଓ ଉତ୍ତର ଓଡ଼ିଶାର କିଛି ଜିଲ୍ଲାରେ ଏବେ ବି ସଂକ୍ରମଣ ହାର ଉଦବେଗଜନକ ରହିଛି । ନୟାଗଡ଼ ଓ ମୟୂରଭଞ୍ଜରେ ଟିପିଆର ବା ଟେଷ୍ଟ ପଜିଟିଭ ରେଟ୍ ୫ ପ୍ରତିଶତ ଉପରେ ରହିଛି । କଟକ ଓ ଖୋର୍ଦ୍ଧାରେ ସଂକ୍ରମଣ ହାର ୫ ପ୍ରତିଶତରୁ ସାମାନ୍ୟ କମ୍ ରହିଛି । ବାଲେଶ୍ୱର ଓ ଯାଜପୁରରେ ମଧ୍ୟ ୪ ପ୍ରତିଶତ ପାଖାପାଖି ରହିଛି ସଂକ୍ରମଣ ହାର ।
ଓଡ଼ିଶା କରୋନା ମିଟର
ଜିଲ୍ଲା ସଂକ୍ରମଣ ହାର
- ନୟାଗଡ଼ ୫.୮%
- ମୟୂରଭଞ୍ଜ ୫.୫%
- କଟକ ୪.୯%
- ଖୋର୍ଦ୍ଧା ୪.୮%
- ବାଲେଶ୍ୱର ୪.୧%
- ଯାଜପୁର ୩.୯%
ଓଡ଼ିଶାର ଟିପିଆର ମ୍ୟାପରେ ଏବେ କୌଣସି ଜିଲ୍ଲା ରେଡ୍ ଜୋନରେ ନାହିଁ । କେବଳ ନୟାଗଡ଼ ଓ ମୟୂରଭଞ୍ଜର ସଂକ୍ରମଣ ହାର ୟେଲୋ ଜୋନରେ ରହିଛି । ତେବେ ଅନ୍ୟ ସମସ୍ତ ଜିଲ୍ଲାରେ ଟିପିଆର ୫ ପ୍ରତିଶତ ତଳେ ଥିବାରୁ ଏଗୁଡିକୁ ଗ୍ରୀନ୍ ଜୋନରେ ରଖିଛି ସ୍ୱାସ୍ଥ୍ୟ ବିଭାଗ ।
ଅନ୍ୟପଟେ ଏବେ ସକ୍ରିୟ ଆକାନ୍ତଙ୍କୁ ନେଇ ସ୍ୱାସ୍ଥ୍ୟ ବିଭାଗ ଜାରି କରିଥିବା କରୋନା ମ୍ୟାପରେ ଏବେ ବି ଖୋର୍ଦ୍ଧା ଓ କଟକ ରେଡ୍ ଜୋନରେ ରହିଛି । ଖୋର୍ଦ୍ଧାରେ ୪,୯୨୮ ସକ୍ରିୟ ଆକ୍ରାନ୍ତ ଥିବା ବେଳେ କଟକରେ ୩,୭୯୧ ଆକ୍ରାନ୍ତ ଏବେ ବି ଚିକିତ୍ସିତ ହେଉଛନ୍ତି । ପୁରୀ, ଯାଜପୁର, ଭଦ୍ରକ, ବାଲେଶ୍ୱର, ମୟୂରଭଂଜ ଜିଲ୍ଲା ୟେଲୋ ଜୋନରେ ରହିଛି । ଗ୍ରୀନ ଜୋନରେ ଥିବା ୨୩ ଜିଲ୍ଲାରେ ହଜାରେ ତଳେ ରହିଛନ୍ତି ସକ୍ରିୟ ସଂକ୍ରମଣ ।