କନକ ବ୍ୟୁରୋ : ରାହୁଲ ଦ୍ରାବିଡ ମୁଖ୍ୟ କୋଚ୍ ଦାୟିତ୍ୱ ନେବା ପରେ ଟିମ୍ ଇଣ୍ଡିଆ ନ୍ୟୁଜିଲାଣ୍ଡ ପ୍ରଥମ ଟି-୨୦ରେ ବିଜୟ ହାସଲ କରିଛି । ଆଉ ଆଗକୁ ମଧ୍ୟ ଏହି ବିଜୟଧାରାରେ ବ୍ରେକ ନ ଲାଗୁ ଏହା ଚାହୁଁଛନ୍ତି ଭାରତୀୟ କ୍ରିକେଟପ୍ରେମୀ । ଦ୍ରାବିଡଙ୍କ ଦିଗଦର୍ଶନରେ ଟିମ୍ ଇଣ୍ଡିଆ ଏବେ ଆଗକୁ ବଢିବାକୁ ଲକ୍ଷ୍ୟ ରଖିଛି । ଆଉ ଏସବୁ ଭିତରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ତଥା ବିଶ୍ୱବିଜେତା କ୍ୟାପଟେନ ରିକି ପଣ୍ଟିଂ ମୁହଁ ଖୋଲିଛନ୍ତି । ପଣ୍ଟିଂ କହିଛନ୍ତି, ଆଇପିଏଲ ଖେଳାଯାଉଥିବା ସମୟରେ ଭାରତୀୟ ପୁରୁଷ ଟିମର ମୁଖ୍ୟ କୋଚ ପାଇଁ ମୋତେ ଅଫର ଦିଆଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଟିମ୍ ଇଣ୍ଡିଆର ମୁଖ୍ୟ କୋଚ ପଦରୁ ରବି ଶାସ୍ତ୍ରୀ ବିଦାୟ ନେବା ପରେ ଏହି ସ୍ଥାନରେ ରିକି ପଣ୍ଟିଂଙ୍କୁ ଦାୟିତ୍ୱ ଦେବାକୁ ଚାହୁଁଥିଲେ ବିସିସିଆଇର ଅଧିକାରୀ । କିନ୍ତୁ ପଣ୍ଟିଂ ଏହି ଅଫରକୁ ଗ୍ରହଣ କରିନଥିଲେ । ଆଇପିଏଲ ଫ୍ରାଞ୍ଚାଇଜ ଓ ଚ୍ୟାନେଲ-୭ ସହ ଯୋଡି ହୋଇ ରହିଥିବାରୁ ମୁଖ୍ୟ କୋଚ୍ ପଦ ଅଫରକୁ ଗ୍ରହଣ କରିନଥିବା କହିଛନ୍ତି ପଣ୍ଟିଂ । ଏହାସହ ପଣ୍ଟିଂ କହିଛନ୍ତି, ଯଦି ମୁଁ ଏହି ପ୍ରସ୍ତାବକୁ ସ୍ୱୀକାର କରିଥାନ୍ତି ତେବେ ଆଇପିଏଲ ଓ ଚ୍ୟାନେଲ-୭ ଠାରୁ ଅଲଗା ହେବାକୁ ପଡିଥାନ୍ତା । କିନ୍ତୁ ଏପରି କରିବାକୁ ମୁଁ ଚାହୁଁନଥିଲି, ଯେଉଁଥିପାଇଁ ଏହି ଅଫରକୁ ମନା କରିଥିଲି ।
ପଣ୍ଟିଂ ଏବେ ଆଇପିଏଲରେ ଦିଲ୍ଲୀ କ୍ୟାପିଟାଲ୍ସର ମୁଖ୍ୟ କୋଚ୍ ଭାବେ କାର୍ଯ୍ୟ କରୁଛନ୍ତି । ଆଉ ପଣ୍ଟିଂଙ୍କ ପ୍ରଶିକ୍ଷଣରେ ଦିଲ୍ଲୀ ଲଗାତାର ୩ ଥର ପ୍ଲେ-ଅଫରେ ପ୍ରବେଶ କଲାଣି । ଏପରିକି ୨୦୨୦ରେ ଫାଇନାଲ ଖେଳିଛି ଦିଲ୍ଲୀ । ତେଣୁ ଦିଲ୍ଲୀ ଦଳ ମଧ୍ୟ ପଣ୍ଟିଂକୁ ସହଜରେ ଛାଡିବାକୁ ଚାହୁଁନାହିଁ ।
ଏସବୁ ଭିତରେ ଟିମ୍ ଇଣ୍ଡିଆର ମୁଖ୍ୟ କୋଚ ହେବାକୁ ଦ୍ରାବିଡ ରାଜି ହୋଇଥିବା ବେଳେ ଏଭଳି ନିଷ୍ପତ୍ତିକୁ ନେଇ ଆଶ୍ଚର୍ଯ୍ୟ ହୋଇଛନ୍ତି ପଣ୍ଟିଂ । ସେ କହିଛନ୍ତି, ଦ୍ରାବିଡ କିଭଳି ଏଭଳି ପ୍ରସ୍ତାବକୁ ସ୍ୱୀକାର କରିଲେ । ଭାରତୀୟ ଜୁନିୟର ଦଳ ପାଇଁ ଦ୍ରାବିଡ ଯେଉଁ ଭୂମିକାରେ ଥିଲେ ତାହାକୁ ନେଇ ବାରମ୍ବାର ଚର୍ଚ୍ଚା ହୋଇଛି । କିନ୍ତୁ ଏହି ଦାୟିତ୍ୱ ମିଳିବା ପରେ ନିଜ ପରିବାରକୁ ସମୟ ଦେବା କଷ୍ଟକର ହୋଇପଡିବ । ଏହାସତ୍ତେ୍ୱ ମଧ୍ୟ ଦ୍ରାବିଡ ମୁଖ୍ୟ କୋଚ୍ ପଦ ପାଇଁ ହଁ ଭରିଛନ୍ତି ।