ପରବର୍ତ୍ତୀ ଉପରାଷ୍ଟ୍ରପତି ବିଜେପିରୁ ! ବିଦେଶ ଗସ୍ତରୁ ମୋଦୀ ଫେରିଲେ ବାଜିବ ମୋହର

କନକ ବ୍ୟୁରୋ : ଧନଖଡ଼ଙ୍କ ଇସ୍ତଫା ପରେ, ଖୁବ୍‌ଶୀଘ୍ର ଉପରାଷ୍ଟ୍ରପତି ପଦ ପାଇଁ ନିର୍ବାଚନ ହେବ । ଏହି ଦୌଡ଼ରେ ଜେଡିୟୁ ନେତା ରାମନାଥ ଠାକୁରଙ୍କ ନାମ ଆଗରେ ଥିଲା, କିନ୍ତୁ ଏବେ ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଛି ବିଜେପି । ଉପ-ରାଷ୍ଟ୍ରପତି ପ୍ରାର୍ଥୀ ବିଜେପିରୁ ଆସିବେ ମେଣ୍ଟରୁ ନୁହେଁ ଦଳୀୟ ସୂତ୍ରରୁ ସୂଚନା ମିଳିଛି ।

ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ଇସ୍ତଫା ପରେ ଭାରତୀୟ ଜନତା ପାର୍ଟି ବିଜେପିର ନେତାଙ୍କୁ ହିଁ ପ୍ରାର୍ଥୀ ବାଛିବ ବୋଲି କହିଛି । ବିହାରର ମୁଖ୍ୟମନ୍ତ୍ରୀ ନୀତୀଶ କୁମାର, କେନ୍ଦ୍ର ମନ୍ତ୍ରୀ ରାମନାଥ ଠାକୁରଙ୍କୁ ନେଇ କଳ୍ପନାଜଳ୍ପନା ଲାଗି ରହିଥିଲା । କିନ୍ତୁ ବିଜେପି ସୂତ୍ରରୁ ଜଣାପଡ଼ିଛି, ନୀତିଶ ଏହି ଦୌଡ଼ରେ ନାହାନ୍ତି । ବିଜେପି ଜଣେ ଏମିତି ନେତାଙ୍କୁ ଚାହୁଛି, ଯିଏ ଦଳର ମୂଳ ଆଦର୍ଶ ଓ ମୂଲ୍ୟବୋଧରେ ଦୃଢ଼ ରହିଥିବେ ଏବଂ ମେଣ୍ଟରୁ ନୁହେଁ ବିଜେପି ଦଳରୁ ହିଁ ବଛାଯିବ ପ୍ରାର୍ଥୀ ।

ଧନଖଡ଼ ସୋମବାର ସ୍ୱାସ୍ଥ୍ୟଗତ କାରଣ ଦର୍ଶାଇ ଇସ୍ତଫା ଦେଇଥିଲେ, ଯାହା ରାଜନୈତିକ ମହଲରେ ଆଲୋଡ଼ନ ସୃଷ୍ଟି କରିଛି । ବିହାରରେ ଆସନ୍ତା ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କେତେକ ବିଜେପି ନେତା ନୀତୀଶଙ୍କ ନାମ ପ୍ରସ୍ତାବ କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଦେଶ ଗସ୍ତରୁ ଫେରିବା ପରେ ଉପରାଷ୍ଟ୍ରପତି ପ୍ରାର୍ଥୀଙ୍କ ନାମ ଘୋଷଣା ହେବ । ବିଜେପି ଜଣେ ଏମିତି ନେତାଙ୍କୁ ଚୟନ କରିବାକୁ ଚାହୁଛି, ଯିଏ ଦଳର ଆଦର୍ଶ ସହ ସଂସଦୀୟ କାର୍ଯ୍ୟବିଧିରେ ଅଭିଜ୍ଞ ହୋଇଥିବେ । ଏନ୍‌ଡିଏର ଲୋକସଭା ଓ ରାଜ୍ୟସଭାରେ ସଂଖ୍ୟାଗରିଷ୍ଠତା ଥିବାରୁ ବିଜେପି ପ୍ରାର୍ଥୀଙ୍କ ନିର୍ବାଚନ ନିଶ୍ଚିତ ମନେ ହେଉଛି ।

ବିଜେପି ଉପରାଷ୍ଟ୍ରପତି ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଦେଇଛି । ଦଳ ଏପରି ଜଣେ ବ୍ୟକ୍ତିଙ୍କୁ ପ୍ରାର୍ଥୀ କରିବ ଯିଏ ପାଞ୍ଚ ବର୍ଷର କାର୍ଯ୍ୟକାଳ ପୂରଣ କରିପାରିବେ । ପ୍ରାର୍ଥୀ ଚୟନ କରିବା ସମୟରେ ଦଳ ଅନେକ କାରଣକୁ ବିଚାର କରିବ । ଜନତା ଦଳ ୟୁନାଇଟେଡ୍ (ଜେଡିୟୁ) ଏବଂ ତେଲୁଗୁ ଦେଶମ ପାର୍ଟି (ଟିଡିପି) ସମେତ ସମସ୍ତ ସହଯୋଗୀ ଦଳ ଭାରତୀୟ ଜନତା ପାର୍ଟି ସହିତ ଅଛନ୍ତି । ଜେଡିୟୁ ନେତା ରାମନାଥ ଠାକୁରଙ୍କ ନାମ ଉପରାଷ୍ଟ୍ରପତି ଦୌଡ଼ରେ ସାମିଲ ଥିଲା, କିନ୍ତୁ ବର୍ତ୍ତମାନର ରିପୋର୍ଟ ଅନୁଯାୟୀ, ରାମନାଥ ଦୌଡ଼ରୁ ବାଦ୍ ପଡିଛନ୍ତି ।