କନକ ବ୍ୟୁରୋ: ୩ ଦିନ ହେଲାଣି ସରଗରମ ରାଜ୍ୟ ରାଜନୀତି । କାରଣ ବିରୋଧୀ ସରକାରଙ୍କ ବିରୋଧରେ ବଡ଼ ଜୋରସୋରରେ ଗର୍ଜନତର୍ଜନ କରୁଛନ୍ତି । ଖାଲି ଗର୍ଜୁଛନ୍ତି ତାହା ନୁହେଁ ବରଂ ସରକାରକୁ ଭାଙ୍ଗିବାକୁ ବଳ କଷୁଛନ୍ତି । ହେଲେ ଏ ବଳରେ କେତେ ଦମ୍‌ ଅଛି ତାହାକୁ ନେଇ ଜୋରଦାର ଚର୍ଚ୍ଚା ହେଉଛି । କାରଣ ରାଜ୍ୟର ମୁଖ୍ୟ ବିରୋଧୀ ଦଳ ବିଜେଡି ପାଖରେ ୫୧ ବିଧାୟକ ଥିବା ବେଳେ କଂଗ୍ରେସ ପାଖରେ ଅଛନ୍ତି ମାତ୍ର ୧୪ । ଦୁହେଁ ଯଦି ମିଶିବେ ତେବେ ୬୫ ହେଉଛି । ତେବେ ଏତିକି ବିଧାୟକରେ ସରକାର କେମିତି ଗଠନ ହେବ ତାହାକୁ ନେଇ ବି ଚର୍ଚ୍ଚା ହେଉଛି । 

Advertisment

ହଠାତ୍‌ କାହିଁକି ଉଠିଲା ଅନାସ୍ଥା 
ଅନାସ୍ଥା ଆସିଲେ ସରକାର ଚିନ୍ତିତ ହେବେ କି ?
ସରକାର ଭାଙ୍ଗିବାକୁ ଭକ୍ତଙ୍କ କସରତ୍‌
ବିଜେଡି ହାଉଲେ ହାଉଲେ ଦେଉଛି ପ୍ରତିକ୍ରିୟା

ବାଲେଶ୍ୱର ଏଫ୍‌ଏମ୍‌ କଲେଜ ଛାତ୍ରୀ ଆତ୍ମାହୁତି ଘଟଣାରେ ରାଜ ରାସ୍ତାକୁ ଓହ୍ଲାଇଥିଲେ ଉଭୟ ବିରୋଧୀ ବିଜେଡି ଓ କଂଗ୍ରେସ । ପ୍ରଥମେ ବିଜେଡି ବାଲେଶ୍ବର ବନ୍ଦ ଡାକରା ଦେଇଥିଲା । ପରଦିନ ଅର୍ଥାତ୍‌ ଜୁଲାଇ ୧୭ ତାରିଖରେ କଂଗ୍ରେସ ଓଡ଼ିଶା ବନ୍ଦ ଡାକରା ଦେଇଥିଲା । ଆଉ ପୁଣି ଥରେ ବଳଙ୍ଗା ଛାତ୍ରୀ ପୋଡ଼ି ଘଟଣା ଆସିବା ପରେ ପୂରା ରାଜ୍ୟରେ ଚାଞ୍ଚଲ୍ୟ ଖେଳିଯାଇଥିଲା । କାହିଁକି ହଠାତ୍‌ ଏମିତି କାଣ୍ଡ ଘଟିଲା ରାଜ୍ୟରେ ତାହାକୁ ନେଇ ରାଜନୀତି ଜୋର ଧରିଥିବା ବେଳେ ଛାତ୍ର କଂଗ୍ରେସ ନେତା ଉଦିତ୍‌ ପ୍ରଧାନ ଦୁଷ୍କର୍ମ ମାମଲାରେ ବନ୍ଧା ହେବା ପରେ ରାଜନୀତି ଆହୁରି ତେଜିଥିଲା । ଏମିତିକି ଭୁବନେଶ୍ବରରେ ରାହୁଲ ଓ ଉଦିତ୍‌ଙ୍କ ସହ ଭକ୍ତଙ୍କ ଫଟୋ ବି ଲାଗିଥିଲା । ପରେ ପରେ ଭକ୍ତଦାସ ରାଗିପାଚି ଲାଲ୍‌ ହୋଇଥିଲେ । ଖାଲି ରାଗିଥିଲେ ତାହା ନୁହେଁ ବରଂ ଏ ରାଜ୍ୟ ସରକାର ବଦଳିବା ଦରକାର ବୋଲି କହିଥିଲେ । ସେଇଥି ଲାଗି ତ ଅନସ୍ଥା ପ୍ରସ୍ତାବ ଆସିବ ବୋଲି ସେ ଦୃଢୋକ୍ତି ପ୍ରକାଶ କରିଥିଲେ । 

ଭକ୍ତଙ୍କ ଆହ୍ବାନ…
ମୌସୁମୀ ଅଧିବେଶନରେ ଆସିବ ଅନାସ୍ଥା
ଆମେ ଆଣିଲେ ବିଜେଡି ଦେଉ ସମର୍ଥନ
ବିଜେଡି ଯଦି ଆଣିବ ଆମେ ଦେବୁ ସମର୍ଥନ

ଆଗାମୀ ଦିନରେ ବିଧାନସଭାର ମୌସୁମୀ ଅଧିବେଶନ ବସିବାକୁ ଯାଉଛି । ରାଜ୍ୟରେ ବଢିଥିବା ଆଇନଶୃଙ୍ଖଳା ପରିସ୍ଥିତି, ବାଲେଶ୍ବର ଛାତ୍ରୀ ଆତ୍ମାହୁତି, ବଳଙ୍ଗା, ଯାଜପୁର, ମାଲକାନଗିରି, ରଥଯାତ୍ର ବିଭ୍ରାଟ, ମୋଦକ ଚୋରି ଆଦି ମାଳମାଳ ପ୍ରସଙ୍ଗ ରହିଛି ବିରୋଧୀଙ୍କ ପାଖରେ । ହେଲେ ହଠାତ୍‌ କାହିଁକି ଭକ୍ତ ଅନାସ୍ଥା ପ୍ରସ୍ତାବ କଥା ଉଠାଇଲେ ତାହା ଚର୍ଚ୍ଚାର ବିଷୟ ହୋଇଛି । ପ୍ରକୃତରେ ରାଜନୈତିକ ଗଣିତକୁ ତର୍ଜମା କଲେ ସ୍ପଷ୍ଟ ଭାବରେ ଜଣାପଡୁଛି କି, ଅନାସ୍ଥା ଆସିଲେ ବି ସରକାରଙ୍କ କୌଣସି ଅସୁବିଧା ହେବ ନାହିଁ । କିନ୍ତୁ ଏହାପରେ ବି କାହିଁକି ଅନସ୍ଥା କଥା ଉଠିଲା ଏବଂ ଏଥିରେ ସୂତ୍ରଧର କିଏ ତାହା କିନ୍ତୁ ସ୍ପଷ୍ଟ ହୋଇନି । 

ଭକ୍ତଙ୍କ ଅନାସ୍ଥା ପ୍ରସଙ୍ଗ
ଦେବୀ କହିଲେ ବିଜେଡି ବିରୋଧୀ ଦଳ କାମ କରୁଛି

ବିଜେଡି-ବିଜେପିର ମିଳିତ ସରକାର ଓଡ଼ିଶାରେ ରହିଥିଲା । ଏମିତିକି ରାଜ୍ୟରେ ମେଣ୍ଟ ଭାଙ୍ଗିବା ପରେ କେନ୍ଦ୍ରର ଅନେକ ବିଲ୍‌ରେ ବିଜେଡି ସମର୍ଥନ ଦେଉଥିଲା । ହେଲେ ଏବେ କଂଗ୍ରେସ ସହ ମିଶି ସରକାରଙ୍କ ବିରୋଧରେ ଅନସ୍ଥା ପ୍ରସ୍ତାବ ଆଣିବ କି ନାହିଁ ସେନେଇ କୌଣସି ସ୍ପଷ୍ଟ ପ୍ରତିକ୍ରିୟା ଦେଇନି । ହେଲେ ବି ଦଳର ବରିଷ୍ଠ ନେତା ଦେବୀ ମିଶ୍ର କହିଛନ୍ତି, ରାଜ୍ୟରେ ଏବେ ମୁଖ୍ୟ ବିରୋଧୀ ଦଳ ବିଜେଡି । ବିରୋଧୀ ଦଳ ହିସାବରେ ଯାହା କାମ କରିବାର କଥା ଆମେ କରୁଛୁ । ମୋଟ୍‌ ଉପରେ ବିଧାନସଭାର ମୌସୁମୀ ଅଧିବେଶନ ନେଇ ଏଯାଏଁ ବିଜ୍ଞପ୍ତି ଜାରି ହୋଇନି । ତେଣୁ ଏବେଠୁ କାହିଁକି ଅନାସ୍ଥା କଥା ଆଲୋଚନା ହେଉଛି ତାହାକୁ ନେଇ ଚର୍ଚ୍ଚା ହେଉଛି ।