କନକ ବ୍ୟୁରୋ : ଓଡ଼ିଶାରେ ଆରମ୍ଭ ହୋଇଛି ଅନୁସୂଚିତ ଜାତି ଓ ଜନଜାତି ଜାତୀୟ ସମ୍ମିଳନୀ । ବିଭିନ୍ନ ରାଜ୍ୟରୁ ଆସିଥିବା ୨୪୦ ଜଣ ପ୍ରତିନିଧି ସମ୍ମିଳନୀରେ ସାମିଲ ହୋଇ ଜନଜାତିଙ୍କ ବିକାଶ ପାଇଁ ମତ ରଖିଛନ୍ତି । ହେଲେ ଜନଜାତିଙ୍କ ବିକାଶ ହେବ କେମିତି ? ଯେତେବେଳେ ଏସସି ଏସଟି ବର୍ଗଙ୍କ ପାଇଁ ହେଉଥିବା ଯୋଜନା ବାବଦରେ ଜାଣୁନାହାନ୍ତି ଜନପ୍ରତିନିଧି ।

Advertisment

ଅନୁସୂଚିତ ଜାତି ଓ ଜନଜାତି ବର୍ଗର ସାମଜିକ, ଆର୍ଥିକ ବିକାଶ ପାଇଁ ଅଣ୍ଟା ଭିଡ଼ିଛନ୍ତି ଡବଲ ଇଞ୍ଜିନ ସରକାର । ପ୍ରଥମଥର ପାଇଁ ଓଡ଼ିଶାରେ ହେଉଥିବା ଏସସି ଏସଟି ଜାତୀୟ ସମ୍ମିଳନୀରେ ଏନେଇ ନୀଳନକ୍ସା ପ୍ରସ୍ତୁତ ହୋଇଛି । ଲୋକସଭା ବାଚସ୍ପତି ଓମ୍ ବିର୍ଲା ସମ୍ମିଳନୀର ଉଦଘାଟନ କରିବା ସହ ଯେଉଁ ଦିଗକୁ ସାମ୍ନାକୁ ଆଣିଛନ୍ତି ତାହା ବେଶ ଉଦବେଗଜନକ । କହିଛନ୍ତି, ଅନୁସୂଚିତ ଜାତି ଓ ଜନଜାତି ପାଇଁ ଆବଣ୍ଟିତ ବଜେଟ୍ କାର୍ଯ୍ୟକାରୀ ହେଉନି । ତୃଣମୂଳସ୍ତରରେ ବିଧାୟକ ଓ ସାଂସଦ ଯୋଜନା ବାବଦରେ ଜାଣୁନାହାନ୍ତି । ଯାହା ଜନପ୍ରତିନିଧିଙ୍କ କାର୍ଯ୍ୟଶୈଳୀକୁ ପ୍ରଶ୍ନଘେରରେ ଛିଡ଼ା କରିଛି ।

ଓଡ଼ିଶାରେ ଥିବା ୨୪ ପ୍ରତିଶତ ଜନଜାତିଙ୍କର ବିକାଶ ନହେଲେ ଓଡ଼ିଶାର ବିକାଶ ଅସମ୍ଭବ । ଯାହାକୁ ଅନୁଭବ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ଆଦିବାସୀ ପରିବାରରୁ ଆସିଥିବାରୁ ଜନଜାତିଙ୍କ ହାତପାହାନ୍ତାରେ ବିକାଶର ସ୍ପର୍ଶ ଦେବାକୁ ଅଣ୍ଟା ଭିଡିଛନ୍ତି ମୁଖ୍ୟମନ୍ତ୍ରୀ । ଏଥିପାଇଁ ବଜେଟ୍ ପରିମାଣ ୬୮ ହଜାର ୮୮୧ କୋଟିରେ ପହଞ୍ଚିଛି । ମିଲେଟ୍ ମିସନରେ ଆଦିବାସୀଙ୍କୁ ସର୍ବାଧିକ ଫାଇଦା ମିଳିଛି । ୧୫ ଏକଲବ୍ୟ ମଡେଲ ବିଦ୍ୟାଳୟ ସହ ୫ ଲକ୍ଷ ଛାତ୍ରଛାତ୍ରୀଙ୍କ ପାଇଁ ହଷ୍ଟେଲ ବ୍ୟବସ୍ଥା କରିଛନ୍ତି ସରକାର । ସମସ୍ତ ଜନଜାତି ଭାଷାରେ ଶିକ୍ଷାଦାନ ପାଇଁ  ନିଷ୍ପତ୍ତି ହୋଇଛି । ୨ ଦିନିଆ ସମ୍ମିଳନୀରେ ବିଭିନ୍ନ ପ୍ରସ୍ତାବ ଓ ପରାମର୍ଶକୁ ନେଇ ଜନଜାତିଙ୍କ ପାଇଁ ନୂଆ ନୀତି ଆଣିବାକୁ ସଂକେତ ଦେଇଛନ୍ତି ମୁଖ୍ୟମନ୍ତ୍ରୀ । ଅନ୍ୟପଟେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଆଦିବାସୀଙ୍କ ଶିକ୍ଷାଦାନ ଉପରେ ଗୁରୁତ୍ୱ ଦେଇଛନ୍ତି ।

ଅନୁସୂଚିତ ଜାତି ଓ ଜନଜାତିଙ୍କ ବିକାଶ ପାଇଁ କେଉଁ ରାଜ୍ୟ କଣ ପଦକ୍ଷେପ ନେଇଛି ସେନେଇ ଏହି ସମ୍ମିଳନୀରେ ୩୬୦ ଡିଗ୍ରୀରେ ଆଲୋଚନା ହୋଇଛି । ହେଲେ ଜନପ୍ରତିନିଧି ଜନଜାତିଙ୍କ ବିକାଶ ପାଇଁ କେବେ ତତ୍ପରତା ଦେଖାଇବେ ? ତାହା ସବୁଠୁ ବଡ ପ୍ରଶ୍ନ ।