Bihar Politics : ବିହାର ରାଜନୀତିକୁ ଗୋଟିଏ ପରେ ଗୋଟିଏ ଦଳ ଡେଇଁବାରେ ଲାଗିଲେଣି । ଗତ କିଛିଦିନ ପୂର୍ବରୁ ଉତ୍ତର ପ୍ରଦେଶର ଭୀମ ସେନା ମୁଖ୍ୟ ଚନ୍ଦ୍ର ଶେଖର ଆଜାଦଙ୍କ ଦଳ ଆଜାଦ ସମାଜ ପାର୍ଟି ନିର୍ବାଚ ଲଢ଼ିବା ନେଇ ଘୋଷଣା କରିଥିବାବେଳେ ଆଜି ପୁଷ୍ପମ ପ୍ରିୟା ଚୌଧୁରୀଙ୍କ 'ଦି ପ୍ଲୁରାଲ୍ସ ପାର୍ଟି' ବିହାର ନିର୍ବାଚନ ମୈଦାନକୁ ଓହ୍ଲାଇବାକୁ ଯାଉଛନ୍ତି । ପୁଷ୍ପମ ପ୍ରିୟାଙ୍କ ଏହା ପ୍ରଥମ ନିର୍ବାଚନ ନୁହେଁ । ୨୦୨୦ରେ ବି 'ଦି ପ୍ଲୁରାଲ୍ସ ପାର୍ଟି' ବିହାରରେ ନିର୍ବାଚନ ଲଢ଼ି ସାରିଛି । 

Advertisment

୨୦୨୦ ବିହାର ବିଧାନସଭା ନିର୍ବାଚନରେ ବିଫଳ ହେବା ପରେ, ପୁଷ୍ପମ ପ୍ରିୟା ଚୌଧୁରୀ ଏବେ ୨୦୨୫ ପାଇଁ ପ୍ରସ୍ତୁତି କରୁଛନ୍ତି । 'ଦି ପ୍ଲୁରାଲ୍ସ ପାର୍ଟି' ଏଥର ବିହାରର ସମସ୍ତ ୨୪୩ ଆସନରେ ପ୍ରତିଦ୍ୱନ୍ଦ୍ୱିତା କରିବ । ନିର୍ବାଚନ ପାଇଁ ସିମ୍ବଲ ମଧ୍ୟ ମିଳିସାରିଛି । ୨୦୨୦ରେ ତାଙ୍କ ଦଳକୁ ଚେସ୍ ସିମ୍ବଲ ମିଳିଥିବାବେଳେ ଏଥର ହ୍ୱିସିଲ୍ ମିଳିଛି । 

୫୦ ପ୍ରତିଶତ ସିଟ୍ ମହିଳାଙ୍କ ପାଇଁ ସଂରକ୍ଷିତ 
ଦଳର ରାଜ୍ୟ ମୁଖପାତ୍ର କୁମାର କନହୈୟା କହିଛନ୍ତି, ଆଜି ପୁଷ୍ପମ ପ୍ରିୟା ଏକ ହୋଟେଲରେ ଏକ ସାମ୍ବାଦିକ ସମ୍ମିଳନୀ କରିବେ। ସେ ଆଗାମୀ ବିହାର ବିଧାନସଭା ନିର୍ବାଚନ ଉପରେ ତାଙ୍କର ମତାମତ ଦେବେ । ସେ କହିଛନ୍ତି ଯେ ଏଥର ଦଳ ସମସ୍ତ ୨୪୩ ଆସନରେ ପ୍ରାର୍ଥୀ ଦେବ । ପୁଷ୍ପମ ପ୍ରିୟା ଏହି ନିର୍ବାଚନ ପାଇଁ ଏକ ନୂତନ ଫର୍ମୁଲା ପ୍ରସ୍ତୁତ କରିଛନ୍ତି । ୫୦ ପ୍ରତିଶତ ଆସନ ମହିଳାଙ୍କ ପାଇଁ ସଂରକ୍ଷିତ ରହିବ । 
ଗତ ଥର ମଧ୍ୟ ସମସ୍ତ ୨୪୩ଟି ଆସନରେ ପ୍ରାର୍ଥୀ ଦିଆଯାଇଥିଲା କିନ୍ତୁ ଅନ୍ୟ ଆସନରେ ନାମାଙ୍କନ ବାତିଲ କରାଯାଇଥିଲା । କନହୈୟା କୁମାର କହିଛନ୍ତି ଯେ ବର୍ତ୍ତମାନ ଆମେ ସମସ୍ତ ଆସନରେ ଲଢ଼ିବା ପାଇଁ ସମ୍ପୂର୍ଣ୍ଣ ପ୍ରସ୍ତୁତ । ଆମ କର୍ମୀମାନେ ଘର ଘର ବୁଲୁଛନ୍ତି, ଲୋକଙ୍କ ନିକଟତର ହେବାକୁ ପ୍ରୟାସ କରୁଛନ୍ତି । ସମସ୍ତ ଆସନରେ ପ୍ରାର୍ଥୀ ମଧ୍ୟ ଚୟନ କରାଯାଇଛି । 

କେଉଁଠୁ ଲଢ଼ିବେ ପୁଷ୍ପମ ପ୍ରିୟା? 
ପୁଷ୍ପମ ପ୍ରିୟା ଚୌଧୁରୀଙ୍କ ବିଷୟରେ କହିବାକୁ ଗଲେ, ସେ ୨୦୨୦ ବିଧାନସଭା ନିର୍ବାଚନରେ ବିସ୍ଫି ଏବଂ ବାଙ୍କିପୁର ବିଧାନସଭା ଆସନରୁ ପ୍ରତିଦ୍ୱନ୍ଦ୍ୱିତା କରିଥିଲେ, କିନ୍ତୁ ଗୋଟିଏ ବି ଆସନରେ ଜିତିପାରିନଥିଲେ । ଏଥର ସେ କେବଳ ଗୋଟିଏ ଆସନ, ଦରଭଙ୍ଗା ଟାଉନରୁ ପ୍ରତିଦ୍ୱନ୍ଦ୍ୱିତା କରିବେ । ଏହା ତାଙ୍କର ନିଜ ନିର୍ବାଚନମଣ୍ଡଳୀ ମଧ୍ୟ । 

ରାଜ୍ୟ ମୁଖପାତ୍ର କହିଛନ୍ତି ଯେ ଗତ ଥର ପୁଷ୍ପମ ପ୍ରିୟା ବାଙ୍କିପୁରରୁ ପ୍ରାୟ ୧୦ ହଜାର ଭୋଟ ପାଇଥିଲେ, କିନ୍ତୁ ସବୁଠାରୁ ବଡ଼ କଥା ହେଉଛି ଗତ ଥର କରୋନା ଥିଲା । ବହୁତ କମ୍ ସମୟ ଥିଲା । ପ୍ରସ୍ତୁତି ଠିକ୍ ଭାବରେ ହୋଇପାରିଲା ନାହିଁ । ଏଥର ସମ୍ପୂର୍ଣ୍ଣ ପ୍ରସ୍ତୁତି ଅଛି ।