କନକ ବ୍ୟୁରୋ: କଂଗ୍ରେସରେ ବିଭୀଷଣ ମନ୍ତବ୍ୟକୁ ନେଇ ବିବାଦ ତେଜିବା ପରେ ସଫେଇ ରଖିଛନ୍ତି ପିସିସି ସଭାପତି ଭକ୍ତ ଦାସ । କହିଲେ, ଗଣମାଧ୍ୟମରେ ଯାହା ଚର୍ଚ୍ଚା ହେଉଛି ତାହା ସମ୍ପୂର୍ଣ୍ଣ ଠିକ୍ ନୁହେଁ । ମୁଁ ଯାହା କୁହେ ଖୋଲା ଖୋଲି କୁହେ ଲୁଚିକି କୁହେ ନାହିଁ । ସବୁ କଂଗ୍ରେସ ନେତାଙ୍କୁ ଅପିଲ୍ ବାଦ ବିବାଦରୁ ବାହାରି କଂଗ୍ରେସ ଦଳକୁ ଏକାଠି କରିବାର ସମୟ ଆସିଛି । ଯଦି ମୁଁ ଶୃଙ୍ଖଳା ଭଙ୍ଗ କରିଛି ବୋଲି କିଛି ନେତା କହୁଛନ୍ତି ତାହେଲେ ମୁଁ ନିଜର  ସମୀକ୍ଷା କରିବି । ଯଦି କାହାର ଅସୁବିଧା ଅଛି ମୋ ସହ ଆସି ସିଧା ଆଲୋଚନା କରନ୍ତୁ । ହେଲେ ପିସିସି ସଭାପତି କାହା ଗୁଲାମ ହୋଇ କାହା ପକେଟରେ ରହି ପାରିବିନି କାହା ଇଙ୍ଗିତରେ କାମ କରିପାରିବେନି ।

Advertisment

ସେପଟେ ବରିଷ୍ଠ ନେତା ସୁରେଶ ରାଉତରାୟ କହିଛନ୍ତି, କଂଗ୍ରେସରେ ବିଭୀଷଣ, ରାବଣ ଅଛନ୍ତି । ସୁଗ୍ରୀବର ବି ଆବଶ୍ୟକ ଅଛି । କଂଗ୍ରେସରେ ସବୁ ପ୍ରକାରର ଲୋକ ଅଛନ୍ତି । ଦଳର ଖୁବଶୀଘ୍ର ଏକ ବନ୍ଧୁ ମିଳନ ହେବ । ସମସ୍ତଙ୍କୁ ଏକାଠି କରିବା ପାଇଁ ଡାକିଲେ ସୁରେଶ ରାଉତରାୟ । ଦଳରେ ବିବାଦ ସୃଷ୍ଟି କରୁଥିବା ନେତାଙ୍କ ଉପରେ ବର୍ଷିଲେ ସୁର ରାଉତରାୟ । କହିଲେ, କଂଗ୍ରେସରେ ଏକତାର ଆବଶ୍ୟକତା ରହିଛି, ବିବାଦର ନୁହେଁ ।

ଆହୁରି ପଢ଼ନ୍ତୁ : କର୍ଣ୍ଣାଟକ ନେତୃତ୍ବ ପରିବର୍ତ୍ତନ ଚର୍ଚ୍ଚା ଉପରେ ବିରାମ : ବଦଳିବନି କ୍ୟାବିନେଟ

ସୂଚନାଯୋଗ୍ୟ ଯେ, ପିସିସି ସଭାପତି ଭକ୍ତ ଦାସଙ୍କୁ ମହଙ୍ଗା ପଡ଼ିଛି ‘ବିଭୀଷଣ’ ପ୍ରସଙ୍ଗ । ନୂଆପଡ଼ା ଉପନିର୍ବାଚନରେ ପରାଜୟ ପରେ ଭକ୍ତ ବିଭୀଷଣ କଥା କହିବା ପରେ ପ୍ରଥମେ ବରିଷ୍ଠ ଆଉ ଏବେ ଯୁବ ନେତା ବିଷ ଉଗାରିଛନ୍ତି । କଂଗ୍ରେସରେ ଯଦି ବିଭୀଷଣ ଅଛନ୍ତି, ତେବେ ରାବଣ କିଏ ବୋଲି ପ୍ରଶ୍ନ କରିଛନ୍ତି । ପିସିସି ସଭାପତି ଭକ୍ତ ଦାସଙ୍କ ଏହି ‘ବିଭୀଷଣ’ ଉପାଖ୍ୟାନକୁ ନେଇ ଏବେ କଂଗ୍ରେସରେ ଝଡ଼ । ନୂଆପଡ଼ା ଉପନିର୍ବାଚନରେ ପରାଜୟ ପରେ କିଛି ବରିଷ୍ଠ ନେତା ମୁହଁ ଖୋଲିଥିଲେ ।

ଏବେ ଯୁବ ନେତାମାନେ ଗଣମାଧ୍ୟମ ଆଗରେ ଭକ୍ତଙ୍କ ବିରୋଧରେ ବିଷୋଦ୍‌ଗାର କରିଛନ୍ତି । ଯଦି ଦଳରେ ବିଭୀଷଣ ଅଛନ୍ତି, ତେବେ ରାବଣ କିଏ ? ବୋଲି ପିସିସି ସଭାପତିଙ୍କୁ ପ୍ରଶ୍ନ କରି, ପରୋକ୍ଷରେ ଭକ୍ତଙ୍କ ଆଡକୁ ଅଙ୍ଗୁଳି ଉଠାଇଛନ୍ତି ଦଳର ଯୁବ ନେତୃତ୍ବ । ବ୍ୟକ୍ତିଗତ ସ୍ବାର୍ଥ ପାଇଁ ଦଳୀୟ ସ୍ବାର୍ଥକୁ ପିସିସି ସଭାପତି ଜଳାଞ୍ଜଳି ଦେଉଥିବା ସିଧା ସିଧା ଅଭିଯୋଗ ଆଣିଛନ୍ତି ।