ରାଜନୀତିରେ ଜୁନାଗଡ଼ ଦୁଷ୍କର୍ମ ଘଟଣା ! ବିଜେପି କହିଲା ଦୁଷ୍କର୍ମକାରୀ ସହିତ ରହିଛି ବିଜେଡି ନେତାଙ୍କ ଲିଙ୍କ୍ । ଖଣ୍ଡନ କରି ମନ୍ତ୍ରୀ କହିଲେ, ଘଟଣାର ତଦନ୍ତ ହେଉଛି ରାଜନୀତିକରଣ କରାନଯାଉ
କନକ ବ୍ୟୁରୋ: ପଲିଟିକ୍ସରେ କଳାହାଣ୍ଡି ଗଣଦୁଷ୍କର୍ମ ଓ ଭିଡିଓ ଭାଇରାଲ ଘଟଣା । ରାଜ୍ୟ ରାଜନୀତିରେ ହଟଚମଟ ସୃଷ୍ଟି କରିଥିବା ଏହି ଘଟଣାକୁ ନେଇ ବିଜେପି-ବିଜେଡି ମଧ୍ୟରେ ଚାଲିଛି ଆରୋପ ପ୍ରତ୍ୟାରୋପ । ବିଜେପି ରାଜ୍ୟ ସାଧାରଣ ସମ୍ପାଦିକା ଲେଖାଶ୍ରୀ ବିଜେଡି ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି । ଆଉ କହିଛନ୍ତି, ଜିଲ୍ଲାର ଜଣେ ବିଜେଡି ନେତାଙ୍କ ବସ୍ ଡ୍ରାଇଭର ଲଳିତେନ୍ଦୁ ଶବର ଏହି ଦୁଷ୍କର୍ମ ମାମଲାର ମୁଖ୍ୟ ଖଳନାୟକ । ତେବେ ଏନେଇ କାହିଁକି ଚୁପ୍ ବସିଛନ୍ତି ଗୃହମନ୍ତ୍ରୀ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ।
Kanak News is now on WhatsApp
Join and get latest news updates delivered to you via WhatsApp
ଏପରିକି ଜୁନାଗଡ ଘଟଣାରେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର ଉତର ନରଖିବା ମୁଖ୍ୟ ଖଳନାୟକ ଲଳିତେନ୍ଦୁକୁ ସୁରକ୍ଷା ଦେବା ସହ ସମାନ । ତେଣୁ ଏହି ଘଟଣା ମନ୍ତ୍ରୀ ଦିବ୍ୟଶଙ୍କର ଉତ୍ତର ରଖନ୍ତୁ ବୋଲି ଦାବି କରିଛି ବିଜେପି । ଆଉ ମୁଖ୍ୟ ଅଭିଯୁକ୍ତକୁ ଧରିବା ବଦଳରେ ପୋଲିସର ତଦନ୍ତ ବାଟଣାରଣା ହୋଇଛି । ଅଭିଯୁକ୍ତକୁ କାହା ଚାପରେ ଛଡାଯାଇଛି ବୋଲି ଦଳ ପ୍ରଶ୍ନ କରିଛି ବିଜେପି ।
ସେପଟେ ଜୁନାଗଡ ଦୁଷ୍କର୍ମ ମାମଲାରେ ପ୍ରତିକ୍ରିୟା ରଖିଛନ୍ତି ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର । ସେ କହିଛନ୍ତି, ଘଟଣାର ତଦନ୍ତ ହେଉଛି । ଯେ କୌଣସି ବ୍ୟକ୍ତି ଏଭଳି କାଣ୍ଡ ଭିଆଇଛି ସେ ଦୋଷୀକୁ ଛଡାଯିବନି । ଆଉ ବିଜେପି ଏଭଳି ଅଭିଯୋଗ ସମ୍ପୂର୍ଣ୍ଣ ମିଥ୍ୟା ଏବଂ ଭିତ୍ତିହୀନ ବୋଲି କହି ଅଭିଯୋଗକୁ ଖଣ୍ଡନ କରିଛନ୍ତି ମନ୍ତ୍ରୀ । ଏବଂ ଏଭଳି ଘଟଣାକୁ ନେଇ ରାଜନୀତିକରଣ କରାନଯାଉ ବୋଲି ଅନୁରୋଧ କରିଛନ୍ତି ଗୃହମନ୍ତ୍ରୀ ଦିବ୍ୟଶଙ୍କର ।
ଅନ୍ୟପଟେ ଦିନକୁ ଦିନ ନୂଆ ମୋଡ଼ ନେଉଥିବା ଘଟଣାରେ ପୋଲିସର ରାଜସାକ୍ଷୀ ପାଲଟିଥିବା ଡ୍ରାଇଭର ଲଳିତେନ୍ଦୁ ଶବର ହିଁ ମୁଖ୍ୟ ଖଳନାୟକ ବୋଲି କହିଛନ୍ତି ପୀଡିତା । ପୀଡିତା କହିଛନ୍ତି, ଗତ ୧୪ ତାରିଖ ଦିନ ସେ ଭବାନୀପାଟଣା ଡାକ୍ତରଖାନାକୁ ଚିକିତ୍ସା ପାଇଁ ଯାଇଥିଲେ । ସେଠାରୁ ବସଷ୍ଟାଣ୍ଡକୁ ଆସିବା ସମୟରେ ବସ୍ ଡ୍ରାଇଭର ଲଳିତେନ୍ଦୁଙ୍କ ସହ ତାଙ୍କର ଦେଖା ହୋଇଥିଲା । ସେ ବାଇକରେ ତାଙ୍କୁ ଲିଫ୍ଟ ଦେଇଥିଲା । ଲଳିତେନ୍ଦୁ ତାଙ୍କୁ ବାଇକରେ ଜୁନାଗଡ ନେଇଥିଲେ । ବାଟରେ ଲଳିତେନ୍ଦୁଙ୍କ ଫୋନ ଆସିଥିଲା । ବନମାଳୀପୁର ଛକ ନିକଟରେ ସେ ବାଇକକୁ ଧିମା କରିବା ପରେ ୬ ଜଣ ଯୁବକ ଆସି ତାଙ୍କୁ ନିକଟସ୍ଥ ଜଙ୍ଗଲକୁ ଉଠାଇନେଇଥିଲେ । ପରେ ଡ୍ରାଇଭର ଓ ୬ ଜଣ ଦୁଷ୍କର୍ମ କରି ଭିଡିଓ ତିଆରି କରିଥିଲେ । ଲଳିତେନ୍ଦୁ ଓ ଅନ୍ୟ ୬ ଦୁଷ୍କର୍ମକାରୀଙ୍କୁ ଫାଶୀ ନ ଦେଲେ ଆତ୍ମହତ୍ୟା କରିବେ ବୋଲି ଧମକ ଦେଇଛନ୍ତି । ସୂଚନା ମୁତାବକ ଲଳିତେନ୍ଦୁ ଦୁଷ୍କର୍ମ କରିଥିବା କଥା ପୀଡିତା ଏତଲାରେ ଦର୍ଶାଇନଥିଲେ । ତେଣୁ ତାଙ୍କୁ ରାଜସାକ୍ଷୀ କରାଯାଇଥିଲା ।