ରାଜନୀତିରେ ରେଳଯାତ୍ରା । ପ୍ରବାସୀ ଶ୍ରମିକଙ୍କୁ ଟିକଟ ଭଡା ଦେବାକୁ ସୋନିଆ ଗାନ୍ଧିଙ୍କ ଘୋଷଣା ପରେ ତେଜିଲା ରାଜନୀତି । ବିଜେପି କହିଲା, ରାଜନୀତି ନକରୁ କଂଗ୍ରେସ, ଅନ୍ୟବାଟରେ କରିହେବ ସହାୟତା
କନକ ବ୍ୟୁରୋ; ଶ୍ରମିକଙ୍କ ଟ୍ରେନ ଯାତ୍ରାକୁ ନେଇ ରାଜନୀତି । ଟ୍ରେନ ଯାତ୍ରା ଭଡା ଦେବ କିଏ ? ସାରା ଦେଶ କରୋନା ସହିତ ଲଢେଇ କରୁଥିବା ବେଳେ, ବିଭିନ୍ନ ରାଜ୍ୟରେ ଫଶି ରହିଥିବା ଶ୍ରମିକମାନେ କିପରି ସୁବିଧାରେ ନିଜ ନିଜ ଘରେ ପହଂଚିପାରିବେ ସେନେଇ ଚାଲିଛି ପ୍ରକ୍ରିୟା । ଏହାରି ଭିତରେ ଏଣିକି ଶ୍ରମିକଙ୍କ ଯାତ୍ରା ଭଡା କଂଗ୍ରେସ ବହନ କରିବ ବୋଲି କଂଗ୍ରେସ ସଭାପତି ସୋନିଆ ଗାନ୍ଧି କହିବା ପରେ ବିବାଦ ତେଜିଛି । କଂଗ୍ରେସର ଅଭିଯୋଗ ହେଲା, ବିଦେଶରୁ ଯାତ୍ରୀମାନଙ୍କୁ ଆଣିବା ପାଇଁ ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିବା ବେଳେ ଶ୍ରମିକଙ୍କ କ୍ଷେତ୍ରରେ ମାଗଣା ଯାତ୍ରା ଘୋଷଣା କରୁନାହାନ୍ତି କାହିଁକି ।
Kanak News is now on WhatsApp
Join and get latest news updates delivered to you via WhatsApp
ନିିକଟରେ ଆମେରିକା ରାଷ୍ଟ୍ରପତି ଡୋନାଲ ଟ୍ରମ୍ଫଙ୍କ ଗୁଜରାଟ ଗସ୍ତ ସମୟରେ ଶହେ କୋଟି ଟଙ୍କା ଖର୍ଚ୍ଚ କରିଥିଲେ କେନ୍ଦ୍ର ସରକାର । ଆଉ ଏବେ ଶ୍ରମିକଙ୍କ କଥା ଯେତେବେଳେ ଉଠୁଛି କାହିଁକି ସରକାର ସେମାନଙ୍କ ଟ୍ରେନ ଯାତ୍ରାକୁ ମାଗଣା କରୁନାହାନ୍ତି ବୋଲି ପ୍ରଶ୍ନ ଉଠାଇଛି କଂଗ୍ରେସ ।
ଅନ୍ୟପକ୍ଷରେ ରେଳ ମନ୍ତ୍ରାଳୟ ଏହାର ଜବାବ ରଖିଛି । ଜଣେ ଶ୍ରମିକଙ୍କ ଟ୍ରେନ ଯାତ୍ରାରେ ଖର୍ଚ୍ଚ ହେଉଥିବା ଅର୍ଥରାଶିର ୮୫ ପ୍ରତିଶତ ରେଳବାଇ ପକ୍ଷରୁ ଖର୍ଚ୍ଚ କରାଯାଉଛି । ବାକି ୧୫ ପ୍ରତିଶତ ଅର୍ଥ ରାଜ୍ୟ ସରକାରମାନେ ବହନ କରୁଛନ୍ତି । ତେଣୁ ଯାହାର ସାହାଯ୍ୟ କରିବାର ଅଛି ସେଥିପାଇଁ ଅଲଗା ବାଟ ରହିଛି । ଏପରି ସଂକଟ ସମୟରେ ରାଜନୀତି ନ କରାଯାଉ ବୋଲି କହିଛି ବିଜେପି ।
ତେବେ ନିକଟରେ ଗୁଜରାଟର ସୁରତରୁ ଓଡିଶା ଫେରିଥିବା ପ୍ରବାସୀ ଓଡିଆ ଶ୍ରମିକ ୭୧୦ ଟଙ୍କାରେ ଟିକେଟ କିଣି ଓଡିଶା ଫେରିଛନ୍ତି । ସେପଟେ ୮୫ ପ୍ରତିଶତ ରେଳ ମନ୍ତ୍ରାଳୟ ଓ ୧୫ ପ୍ରତିଶତ ରାଜ୍ୟ ସରକାର ଦେଉଥିବା କଥାର ସତ୍ୟତା ଏଯାଏଁ ସ୍ପଷ୍ଟ ହୋଇନାହିଁ ।