ସମ୍ବଲପୁରରେ ହୋଇପାରେ ବଡ ରାଜନୈତିକ ଲଢ଼େଇ । ବିଜେଡି ସାଂଗଠନିକ ସମ୍ପାଦକ ପ୍ରଣବ ଦାସଙ୍କ ଗସ୍ତକୁ ନେଇ ବଢ଼ିଲା ଚର୍ଚ୍ଚା । ପୂର୍ବରୁ ସଂଗଠନ ଚଳାଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
କନକ ବ୍ୟୁରୋ: ଆସୁଛି ଲୋକସଭା ନିର୍ବାଚନ । ମଝିରେ ଆଉ ମାତ୍ର ଦୁଇ ମାସ । ନିର୍ବାଚନ ପାଖେଇ ଆସୁଥିବାରୁ କେଉଁ ନିର୍ବାଚନ ମଣ୍ଡଳୀରୁ କିଏ ପ୍ରାର୍ଥୀ ହେବେ, ସେ ନେଇ ଚର୍ଚ୍ଚା ବଢ଼ିବାରେ ଲାଗିିଛି । ଏଭଳି ସମୟରେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ, ସମ୍ବଲପୁର ଗସ୍ତ ସୂଚୀ ରାଜନୈତିକ ଉଷ୍ଣତାକୁ ବଢ଼ାଇ ଦେଇଛି । ସମ୍ବଲପୁର ଲୋକସଭା କ୍ଷେତ୍ରରୁ କେଉଁ ଦଳରୁ କିଏ ପ୍ରାର୍ଥୀ ହେବେ ତାହା ସ୍ପଷ୍ଟ ହୋଇନାହିଁ । ହେଲେ, ଏଥର ବଡ ଲଢ଼େଇ ହେବ ବୋଲି ଆଲୋଚନା ହେଉଛି । କାରଣ ସମ୍ବଲପୁରରୁ ବିଜେପିରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରାର୍ଥୀ ହେବା ନେଇ ଚର୍ଚ୍ଚା ହେଉଥିବାବେଳେ ବିଜେଡି ସାଂଗଠନିକ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ଗସ୍ତ ସୂଚୀ ଚର୍ଚ୍ଚାକୁ ଖୋରାକ ଯୋଗାଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ହେଲାଣି ସମ୍ବଲପୁରକୁ ବାରମ୍ବାର ଗସ୍ତ କରୁଥିବା, ୫ରୁ ମାରାଥନ ଗସ୍ତ ସୂଚୀ ରଖିଛନ୍ତି ପ୍ରଣବ । ୫ରେ ଦେବଗଡ, କୁଚିଣ୍ଡା ଓ ରେଙ୍ଗାଲି ବିଧାନସଭା କ୍ଷେତ୍ରରେ ୨ଟି, ସମ୍ବଲପୁର ବିଧାନସଭା କ୍ଷେତ୍ରରେ ଗୋଟିଏ, ୬ତାରିଖରେ ପୁଣି ରେଢ଼ାଖୋଲ, ରେଂଗାଲି ବିଧାନସଭା କ୍ଷେତ୍ରରେ ଗୋଟିଏ ଲେଖାଏଁ ଏବଂ କୁଚିଣ୍ଡା ବିଧାନସଭା କ୍ଷେତ୍ରରେ ୩ଟି ଜାଗାରେ ଦଳୀୟ କର୍ମୀ ଓ ସମର୍ଥକଙ୍କୁ ଭେଟିବା କାର୍ଯ୍ୟକ୍ରମ ରଖିଛନ୍ତି । ୧୦ତାରିଖ ରେ ରେଢ଼ାଖୋଲ ବିଧାନସଭା କ୍ଷେତ୍ରରେ ୪ଟି ଏବଂ ଦେବଗଡ ବିଧାନସଭା କ୍ଷେତ୍ରରେ ଗୋଟିଏ ଏବଂ ୧୧ତାରିଖରେ ଦେବଗଡ ବିଧାନସଭା କ୍ଷେତ୍ରରେ ୫ଟି କାର୍ଯ୍ୟକ୍ରମ ରହିଛି । ତେବେ ବେଶ୍ କିଛି ଦିନ ହେଲା ସମ୍ବଲପୁରରେ ଧର୍ମେନ୍ଦ୍ର ପ୍ରଧାନ ସକ୍ରିୟ ଥିବାରୁ ଓ ସଂଗଠନକୁ ଦୃଢ଼ କରୁଥିବାରୁ, ଆଗାମି ନିର୍ବାଚନରେ ଏହି ଆସନରେ ବଡ ଲଢ଼େଇ ହେବ ବୋଲି କୁହାଯାଉଛି ।