କନକ ବ୍ୟୁରୋ: ଉଠିଲା ଧାନ, ପଦ୍ମପୁରରେ କମ୍ପନ । ବିଳମ୍ବରେ ହେଲେ ସୁଦ୍ଧା ବରଗଡ ଜିଲ୍ଲାରେ ଧାନ ସଂଗ୍ରହ ଆରମ୍ଭ ହୋଇଥିବାବେଳେ ଏହାକୁ ନେଇ ବଡ ଧରଣର ରାଜନୀତି ମୁଣ୍ଡ ଟେକିଛି । ନିର୍ବାଚନକୁ ଦୃଷ୍ଟିରେ ରଖି ବାରମ୍ବାର ଧାନ ସଂଗ୍ରହର ତାରିଖ ପରିବର୍ତ୍ତନ କରାଯାଇଥିବା ଅଭିଯୋଗ କରିଛି ବିଜେପି । ସେହିପରି ବିଭାଗୀୟ ଧାନ ଉଠାର ତଦାରଖ କରିବା ବଦଳରେ ନିର୍ବାଚନ ପ୍ରଚାର କରୁଛନ୍ତି ବୋଲି ଦଳ ଅଭିଯୋଗ କରିଛି । ବିଜେପିର ଏହି ଅଭିଯୋଗର କଡା ଜବାବ ରଖିଛି ବିଜେଡି । କହିଛି, ଚାଷୀଙ୍କୁ କେନ୍ଦ୍ର ସରକାର ଦେଇଥିବା ପ୍ରତିଶ୍ରୁତି କୁଆଡେ ଗଲା?
Kanak News is now on WhatsApp
Join and get latest news updates delivered to you via WhatsApp
ତେବେ ଚାଷ ଏବଂ ଚାଷୀକୁ ନେଇ ରାଜନୀତି ଓଡ଼ିଶାରେ ନୂଆ ନୁହେଁ । ଆଉ ଯେତେବେଳେ ନିର୍ବାଚନ ଆସେ, ରାଜନୈତିକ ଦଳ ଗୁଡ଼ିକର ଦରଦ ଚାଷୀଙ୍କ ପ୍ରତି ହୁଏତ ଅଧିକ ଦେଖିବା ମିଳେ । ଯାହା ଏବେ ପଦ୍ମପୁର ଉପ-ନିର୍ବଚନ ସମୟରେ ଦେଖିବାକୁ ମିଳୁଛି । ଚାଷୀଙ୍କ ନାଁରେ ବିଜେଡି ପଦ୍ମପୁରରେ ଭୋଟ୍ ମାଗୁଛି । ଚାଷୀଙ୍କ ସ୍ୱାର୍ଥ କଥା କହି ବିଜେପି ଭୁବନେଶ୍ୱରରେ ସତ୍ୟାଗ୍ରହ କରୁଛି ।
- ଧାନ ଉଠାକୁ ନେଇ ବଡ଼ ରାଜନୀତି
- ରାଜ୍ୟ ସରକାରଙ୍କୁ ଘେରିଲା ବିଜେପି
ବିଳମ୍ବରେ ହେଲେ ସୁଦ୍ଧା ବରଗଡ଼ ଜିଲ୍ଲାରେ ଆରମ୍ଭ ହୋଇଛି ଧାନ ସଂଗ୍ରହ ଅଭିଯାନ । ବରଗଡ଼ ସହ ଗୋଡ଼ଭଗା, ଅତାବିରା ସମେତ ନିର୍ବାଚନ ହେବାକୁ ଥିବା ୩ ବ୍ଳକ୍, ପଦ୍ମପୁର, ପାଇକମାଳ ଏବଂ ଝାରବନ୍ଧରେ ବି ଧାନ ସଂଗ୍ରହ ଆରମ୍ଭ ହୋଇଛି । ଆଉ ଏହି ଧାନ ସଂଗ୍ରହ ସମୟ ଓ ରାଜ୍ୟ ସରକାରଙ୍କ ନୀତିକୁ ନେଇ ଟାର୍ଗେଟ୍ କରିଛି ଭାରତୀୟ ଜନତା ପାର୍ଟି । ବିଜେପି ଅଭିଯୋଗ କରିଛି…
- ନିର୍ବାଚନକୁ ଦୃଷ୍ଟିରେ ରଖି ଜିଲ୍ଳା ପ୍ରଶାସନ ଧାନ ସଂଗ୍ରହ ତାରିଖକୁ ବାରମ୍ବାର ପରିବର୍ତ୍ତନ କରିଛି
- ବିଭାଗୀୟ ମନ୍ତ୍ରୀ ଧାନ ସଂଗ୍ରହର ତଦାରଖ କରିବା ବଦଳରେ ନିର୍ବାଚନ ପ୍ରଚାରରେ ମାତିଛନ୍ତି
- ରାଜ୍ୟ ସରକାର ଚାଷୀଙ୍କ ବଦଳରେ ମିଲର୍ସଙ୍କ ପଛରେ ଛିଡ଼ା ହୋଇଛନ୍ତି
- ନିର୍ବାଚନକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ୨୦୦ କୋଟିର ଇନପୁଟ ସବସିଡି ଘୋଷଣା କରିଛନ୍ତି
- ମରୁଡ଼ି ଘୋଷଣା ନକରି ଇନପୁଟ ସବସିଡି କେମିତି ଦିଆଯାଉଛି
- ସୋହେଲାରେ ମୁଖ୍ୟମନ୍ତ୍ରୀ ଘୋଷଣା କରିଥିବା ସବସିଡି କୁଆଡ଼େ ଗଲା ବୋଲି ବିଜେପି ପ୍ରଶ୍ନ କରିଛି
ବିଜେପିର ଏକାଧିକ ଅଭିଯୋଗ ଭିତରେ ଶାସକ ବିଜେଡି ପାଲଟା ଆକ୍ରମଣ କରିଛି । ପ୍ରେସ ରିଲିଜ୍ ଜରିଆରେ ଅଭିଯୋଗର ଏକ ଲମ୍ବା ଚଉଡ଼ା ତାଲିକା ରଖିଛି । ବିଜେଡି ଅଭିଯୋଗ କରିଛି…
- ୨୦୧୪ ନିର୍ବାଚନୀ ଇସ୍ତାହାରରେ ବିଜେପି ସର୍ବନିମ୍ନ ସହାୟକ ମୂଲ୍ୟ ଦେଢ଼ ଗୁଣା ବଢ଼ିବାକୁ କୁହାଯାଇଥିଲା । ଯାହା ବିଜେପି ପୂରଣ କରିନାହିଁ
- ଚାଷୀଙ୍କ ଆୟ ଦୁଇ ଗୁଣା କରିବାକୁ ପ୍ରତିଶ୍ରୁତି ଦେଇ ଚାଷୀଙ୍କୁ ଭୂଆଁ ବୁଲାଯାଇଛି
- ବିଜେପି ସରକାର ଚାଷୀ ବିରୋଧୀ କୃଷି ଆଇନ ଆଣିଥିଲେ । ଯାହାର ପ୍ରତିବାଦ କରି ୬୦୦ ଚାଷୀଙ୍କ ମୃତ୍ୟୁ ହୋଇଛି
- ଧାନର ସର୍ବନିମ୍ନ ମୂଲ୍ୟ ୨ ହଜାର ୯୩୦ ଟଙ୍କା କରିବାକୁ ବିଧାନସଭାରେ ପ୍ରସ୍ତାବ ଗୃହିତ ହୋଇଥିଲା । ଏହି ପ୍ରସ୍ତାବ ନେଇ ବିଜେପି ଚୁପ ରହିଛି
- କେନ୍ଦ୍ରର ବିଜେପି ସରକାର ଓଡ଼ିଶାର ଚାଷୀଙ୍କୁ ସାର ଯୋଗାଇବାରେ ବିଫଳ ରହିଛି
- ମୁଖ୍ୟମନ୍ତ୍ରୀ ବାରମ୍ବାର ଚିଠି ଲେଖିବା ସତ୍ୱେ ଓଡ଼ିଶାର ଚାଷୀଙ୍କୁ ଫସଲ ବୀମା ମିଳିପାରିନି
- ଚାଷୀଙ୍କୁ ୨୦୦ କୋଟି ଇନପୁଟ ସବସିଡି ଘୋଷଣା କରିବା ପରେ ବିଜେପି ଆଚରଣ ବିଧିର ଉଲଂଘନ ବୋଲି ଅଭିଯୋଗ କରିଛି
ଏହି ଆରୋପ ପ୍ରତ୍ୟାରୋପରୁ ଗୋଟିଏ କଥା ସ୍ପଷ୍ଟ ଯେ, ପଦ୍ମପୁର ଉପ-ନିର୍ବାଚନରେ ଚାଷୀଙ୍କ ଭୋଟ କେତେ ଗୁରୁତ୍ୱ ରଖୁଛି ।