ଗାଁ ଗାଁରେ ଖୋଲିବ ମଦ ଦୋକାନ ! ସରକାରଙ୍କ ଚିଠି ପରେ ଦୋକାନ ଖୋଲାକୁ ପ୍ରବଳ ବିରୋଧ । କଂଗ୍ରେସ କହିଲା, ଗାଁ ଗଣ୍ଡାରେ ସୃଷ୍ଟି ହେବେ ମଦୁଆ
କନକ ବ୍ୟୁରୋ: ମଦକୁ ନେଇ ନିଇତି ହେଉଛି ମହାଭାରତ । ସବୁଦିନ କେଉଁଠି ନା କେଉଁଠି ମଦ ବିରୋଧରେ ଆନ୍ଦୋଳନ ତେଜୁଛି । ଦେଶୀ ହେଉ ବା ବିଦେଶୀ ମଦ ନାଁ ଶୁଣିଲେ ଚିହିଁଙ୍କି ଉଠୁଥିବା ମହିଳା ଭାଟି ଭାଙ୍ଗିବାକୁ ବି ପଛାଉ ନାହାନ୍ତି । ତେବେ ନିଶାମୁକ୍ତ ସମାଜ ଗଢିବାକୁ ଆଉ ମହାତ୍ମା ଗାନ୍ଧୀଙ୍କ ସ୍ୱପ୍ନକୁ ସାକାର କରିବାକୁ ପ୍ରାୟ ସ୍ଥାନରେ ମଦ ଉପରେ କଟକଣା ଲାଗିଥିବା ବେଳେ ଓଡିଶାରେ କିନ୍ତୁ ମଦକୁ ପ୍ରୋତ୍ସାହନ ଦେଉଛନ୍ତି ସରକାର । ବିଦେଶୀ ମଦ ଦୋକାନ ଖୋଲିବାକୁ ପ୍ରକ୍ରିୟା ଆରମ୍ଭ ହୋଇଥିବା ଜଣାପଡିଛି । ଅବକାରୀ ବିଭାଗ ଜିଲ୍ଲାର ବିଭିନ୍ନ ଅବକାରୀ ଅଧିକାରୀଙ୍କୁ ଜାଗା ଚିହ୍ନଟ କରି ଜଣାଇବାକୁ କହିଥିବା ସୂଚନା ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ମଦ ଦୋକାନ ବନ୍ଦ ବଦଳରେ ଗାଁ ଗାଁରେ ମଦ ଦୋକାନ ଖୋଲିବାକୁ ଯୋଜନା ରଖିଛନ୍ତି ରାଜ୍ୟ ସରକାର । ଅଧିକ ରାଜସ୍ୱ ଆଶାରେ ସରକାର ଅଧିକରୁ ଅଧିକ ମଦ ଦୋକାନ ଖୋଲିବାକୁ ନିଷ୍ପତ୍ତି ନେଇଥିବା ବେଳେ ଛକ ଛକରେ ମଦ ଦୋକାନ ଖୋଲିବା ନେଇ ସରକାରଙ୍କ ନିଷ୍ପତ୍ତିକୁ ପ୍ରବଳ ବିରୋଧ ହୋଇଛି । ଆଉ ଏହି ମଦକୁ ନେଇ ଆରମ୍ଭ ହୋଇଛି ମହାରାଜନୀତି ।
ସରକାରଙ୍କ ନିଷ୍ପତ୍ତିକୁ ସମାଲୋଚନା କରିବାକୁ ଯାଇ ବିରୋଧୀ କଂଗ୍ରେସ କହିଛି ଯେ,ଏହା ଦ୍ୱାରା ଗାଁ ଗଣ୍ଡାରେ ପ୍ରବଳ ମଦୁଆ ସୃଷ୍ଟି ହେବେ । ଗୋଟିଏ ପଟେ ମହାତ୍ମାଗାନ୍ଧୀ ଅହିଂସା ଓ ନିଶା ନିବାରଣ କଥା କହୁଥିବା ବେଳେ ଏ ସରକାର କେମିତି ନିଶାକୁ ପ୍ରଶୟ ଦେଉଛନ୍ତି ବୋଲି ପିସିସି ସଭାପତି ନିରଂଞ୍ଜନ ପଟ୍ଟନାୟକ ପ୍ରଶ୍ନ କହିଛନ୍ତି । ଏମିତି କଲେ ରାଜ୍ୟରେ ଆହୁରି ଅପ୍ରୀତିକର ପରିସ୍ଥିତି ସୃଷ୍ଟି ହେବ ବୋଲି କହିଛନ୍ତି ନିରଂଜନ ।
ସେହିପରି ତାରା ବାହିନୀପତି କହିଛନ୍ତି, ଏହା ଦ୍ୱାରା ମହିଳା ସଶକ୍ତୀକରଣ ଉଦ୍ଦେଶ୍ୟ ବାଟବଣା ହେବ । ସରାକର ଯେଉଁ ମାଆକୁ ସମ୍ମାନ କଥା କହୁଛନ୍ତି ତାହା ଭୁଲ ପ୍ରମାଣିତ ହେବ । ବିଜେଡି ବିଧାୟକ ସୌମ୍ୟରଂଜନ ପଟ୍ଟନାୟକ ମଦରୁ ରାଜସ୍ୱ ଲାଭକ୍ଷତି କଥା କହିଛନ୍ତି । ଗତ ବିଧାନସଭା ପୂର୍ବରୁ ସରକାରଙ୍କୁ ନିବେଦନ କରିଥିଲେ କି ଗୋଟେ ତର୍ଜମା କରାଯାଉ ଯେ ମଦ ବନ୍ଦ କଲେ କେତେ ପରିମାଣରେ ରାଜସ୍ୱ କ୍ଷତି ହେଉଛି ଆଉ ମଦ ଚାଲିଲେ କି କ୍ଷତି ହେଉଛି । ଅଧିକ ମଦ ଦୋକାନ ଖୋଲିଲେ ଲାଭ କେତେ ହେବ କ୍ଷତି କେତେ ହେବ, ସେ ନେଇ ତର୍ଜମା କରାଯାଉ ବୋଲି ସୌମ୍ୟରଂଜନ କହିଛନ୍ତି ।
ବିଜେପି ବିଧାୟକ ବିଷ୍ଣୁ ସେଠୀ ସରକାରଙ୍କ ଏ ନିଷ୍ପତ୍ତିକୁ ସମାଲୋଚନା କରିଛନ୍ତି । ସରକାର ରାଜ୍ୟରେ ମଦର ବନ୍ୟା କରିବାକୁ ଚାହୁଁଛନ୍ତି କି ବୋଲି ସେ ପ୍ରଶ୍ନ କରିବା ଆଳରେ ତାଚ୍ଛଲ୍ୟ କରିଛନ୍ତି । ତେବେ ରାଜ୍ୟରେ ଅଧିକରୁ ଅଧିକ ମଦ ଦୋକାନ ଖୋଲିବା ପୂର୍ବରୁ ଅଧିକ ବଢିଛି ମଦ ରାଜନୀତି ।