ରାଜ୍ୟ ରାଜନୀତିକୁ ଉଷୁମ କଲା ଇଣ୍ଡିଆ ଟୁଡେର ସର୍ଭେ । ରିପୋର୍ଟ କହିଲା, ରାଜ୍ୟରେ ଅକ୍ଷୁର୍ଣ୍ଣ ରହିଛି ନବୀନଙ୍କ ଲୋକପ୍ରିୟତା, ହେଲେ ଦିଲ୍ଲୀଗାଦି ପାଇଁ ମୋଦୀ ହିଁ ପ୍ରଥମ ପସନ୍ଦ
କନକ ବ୍ୟୁରୋ: ରାଜ୍ୟରେ ଅତୁଟ ରହିଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା । ୫୯ ପ୍ରତିଶତ ଓଡିଶାବାସୀ ଚାହୁଁଛନ୍ତି, ପୁଣି ଥରେ ମୁଖ୍ୟମନ୍ତ୍ରୀ ହୁଅନ୍ତୁ , ନବୀନ । ସେହିପରି ୫୪ ପ୍ରତିଶତ, ନରେନ୍ଦ୍ର ମୋଦିଙ୍କୁ ପୁଣିଥରେ ପ୍ରଧାନମନ୍ତ୍ରୀ ଭାବେ ଦେଖିବାକୁ ଚାହାଁନ୍ତି । ୨୦୧୯ ସାଧାରଣ ନିର୍ବାଚନ ପୂର୍ବରୁ କିଛି ଏଭଳି ତଥ୍ୟ ଦେଇଛି ଇଣ୍ଡିଆ ଟୁଡେର ସର୍ଭେ ରିପୋର୍ଟ । ଯାହାକୁ ନେଇ ରାଜନୀତି ସରଗରମ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନ ନେଇ ଅବଗଣନା ଆରମ୍ଭ ହୋଇଯାଇଥିବା ବେଳେ ଆସିଛି ଇଣ୍ଡିଆ ଟୁଡେ ପଲିଟିକାଲ ଷ୍ଟକ ଏକ୍ସଚେଂଜର ସର୍ଭେ ରିପୋର୍ଟ । ସର୍ଭେ ରିପୋର୍ଟ କହୁଛି ଓଡ଼ିଶାର ୫୯ ପ୍ରତିଶତ ଭୋଟର ଚାହୁଁଛନ୍ତି ପୁଣି ଥରେ ମୁଖ୍ୟମନ୍ତ୍ରୀ ହୁଅନ୍ତୁ ନବୀନ । ଅର୍ଥାତ୍ ୪ ଥର କ୍ରମାଗତ ୪ ଥର ମୁଖ୍ୟମନ୍ତ୍ରୀ ରହିଥିବା ସତ୍ୱେ ରାଜ୍ୟରେ ଅକ୍ଷୁର୍ଣ୍ଣ ରହିଛି ନବୀନ ପଟ୍ଟନାୟକଙ୍କ ଲୋକପ୍ରିୟତା । ଆଉ ଏହି ସର୍ଭେରେ ଦ୍ୱିତୀୟ ସ୍ଥାନରେ ଅଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ୨୧ ପ୍ରତିଶତ ଲୋକ ଧର୍ମେନ୍ଦ୍ରଙ୍କ ସପକ୍ଷରେ ମତ ଦେଇଛନ୍ତି ।
ଟେଲିଫୋନ ଜରିଆରେ ୨୧ଟି ସଂସଦୀୟ କ୍ଷେତ୍ରର ୮ ହଜାର ୨ଶହ ୩୨ ଜଣଙ୍କ ମତାମତ ନିଆଯାଇ ଏହି ସର୍ଭେ ରିପୋର୍ଟ ପ୍ରସ୍ତୁତ କରାଯାଇଛି । ସର୍ଭେରେ ସାମିଲ ହୋଇଥିବା ୫୧% ଭୋଟର ପାନୀୟ ଜଳ ସଂକଟକୁ ମୁଖ୍ୟ ପ୍ରସଙ୍ଗ କହିଛନ୍ତି । ସେହିପରି ୩୫% ଲୋକ କୃଷି ସମସ୍ୟା, ୩୧% ଲୋକ ସ୍ୱାସ୍ଥ୍ୟ ସମସ୍ୟାକୁ ପ୍ରସଙ୍ଗ କରିଛନ୍ତି । ୨୨% ଲୋକଙ୍କ ମତରେ ବେକାରୀ ସମସ୍ୟାକୁ ଦୂର କରିବା ପାଇଁ ବିଫଳ ହୋଇଛନ୍ତି ସରକାର । ତେବେ ୪୪ ପ୍ରତିଶତ ଲୋକ ନବୀନ ସରକାରଙ୍କ ସଫଳତାକୁ ନେଇ ସନ୍ତୁଷ୍ଟ ରହିଥିବା ବେଳେ ମାତ୍ର ୧୯ ପ୍ରତିଶତ ଲୋକ ସରକାରଙ୍କ ସଫଳତାକୁ ନେଇ ଅସନ୍ତୁଷ୍ଟ ରହିଥିବା ସର୍ଭେ ରିପୋର୍ଟରେ ପ୍ରକାଶ ପାଇଛି ।
ଓଡିଶାରେ ନବୀନଙ୍କ ସ୍ଥିତି ସୁଦୃଢ ଥିଲେ ବି ମୋଦୀଙ୍କ ପ୍ରତି ବିପୁଳ ସମର୍ଥନ ରହିଥିବା ଜଣାପଡୁଛି । କାରଣ ସର୍ଭେରେ ୫୪ ପ୍ରତିଶତ ଭୋଟର ଚାହାଁନ୍ତି ପ୍ରଧାନମନ୍ତ୍ରୀ ହୁଅନ୍ତୁ ନରେନ୍ଦ୍ର ମୋଦୀ । କେବଳ ୧୨ ପ୍ରତିଶତ ଲୋକ ହିଁ ମୋଦୀ ସରକାରଙ୍କ କାମରେ ଅସନ୍ତୋଷ ପ୍ରକାଶ କରିଥିବା କହିଛି ଇଣ୍ଡିଆ ଟୁଡେର ସର୍ଭେ ।