କନକ ବ୍ୟୁରୋ: ପଞ୍ଜାବ ବିଧାନସଭା ନିର୍ବାଚନ ପାଇଁ କଂଗ୍ରେସ ନିଜର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ବର୍ତ୍ତମାନର ମୁଖ୍ୟମନ୍ତ୍ରୀ ଚରଣଜିତ ସିହ ଚନ୍ନିଙ୍କ ନାଁରେ ମାରିଛି ମୋହର । ପଞ୍ଜାବରେ କଂଗ୍ରେସ ପକ୍ଷରୁ କିଏ ହେବେ ମୁଖ୍ୟମନ୍ତ୍ରୀ ପ୍ରାର୍ଥୀ ତାକୁ ନେଇ କିଛି ଦିନ ଧରି ଲାଗି ରହିଥିବା ସସପେନ୍ସକୁ ରବିବାର ଶେଷ କରିଥିଲେ କଂଗ୍ରେସ ନେତା ରାହୁଲ ଗାନ୍ଧୀ । ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନୀ ଓ ପଞ୍ଜାବ ପ୍ରଦେଶ କଂଗ୍ରେସ ସଭାପତି ନବଜୋତ ସିଂ ସିଦ୍ଧୁଙ୍କ ଭିତରେ ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ ଟଣାଓଟରା ଚାଲିଥିବାବେଳେ ଶେଷରେ ବାଜି ମାରିଛନ୍ତି ମୁଖ୍ୟମନ୍ତ୍ରୀ ଚନ୍ନି । କ୍ଷମତାର ଲଢେଇର ୨ ଜଣ ନେତୃତ୍ୱ ନେଇପାରିବେନି ବୋଲି ରାହୁଲ ପୂର୍ବରୁ ସଫା ସଫା କହିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଗୋଟେ ପଟେ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣା କରିବା ପରେ ଲାଗୁଥିଲା କି ପଞ୍ଜାବ କଂଗ୍ରେସ କନ୍ଦଳ ଶାନ୍ତ ପଡିବ କିନ୍ତୁ ଠିକ ଏହି ସମୟରେ ଦଳର ବରିଷ୍ଠ ନେତା ସୁନୀଲ ଜାଖଡ଼ ବଡ ଘୋଷଣା ଦଳକୁ ଝଟକା ଦେଇଛି । ରବିବାର ଜାଖଡ଼ କହିଛନ୍ତି କି ସେ ସକ୍ରିୟ ନିର୍ବାଚନୀ ରାଜନୀତିରୁ ଦୂରେଇ ରହିବେ । ଅର୍ଥାତ ନା ସେ ପ୍ରାର୍ଥୀ ଭାବେ ଛିଡା ହେବେ ନାହିଁ କୌଣସି ପ୍ରଚାରରେ ସାମିଲ ହେବେ । ଏଥିସହ ଚନ୍ନିଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରାଯିବା ପରେ ନିଜ ପ୍ରତିକ୍ରିୟାରେ ଜାଖଡ କହିଛନ୍ତି କି ମୁଖ୍ୟମନ୍ତ୍ରୀ ପ୍ରାର୍ଥୀ ପାଇଁ ଦଳର ଅନେକ ଯୋଗ୍ୟ ଚେହେରା ଅଛନ୍ତି ।
କଂଗ୍ରେସ ଚନ୍ନିଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରିବା ପରେ ବିଭିନ୍ନ ରାଜନୈତିକ ଦଳ ଭିନ୍ନ ଭିନ୍ନ ମତପୋଷଣ କରୁଛନ୍ତି । ପଂଜାବରେ କଂଗ୍ରେସର ମୁଖ୍ୟ ପ୍ରତିଦ୍ୱନ୍ଦୀ ଶିରୋମଣୀ ଅକାଳୀଦଳ କହିଛି ବାଲି ମାଫିଆଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରି ବଡ ଭୁଲ କରିଛି କଂଗ୍ରେସ ।
କଂଗ୍ରେସ ମୁଖ୍ୟମନ୍ତ୍ରୀ ପ୍ରାର୍ଥୀଙ୍କ ନାଁ ଘୋଷଣାର ଠିକ କିଛି ସମୟ ପୂର୍ବରୁ ୟୁ-ଟର୍ଣ୍ଣ ନେଇଥିଲେ ସିଦ୍ଧୁ । ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ ବୋଲି ଅଡି ବସିଥିବା ସିଦ୍ଧୁ ମୁଣ୍ଡ ନୁଆଁଇବା ସହ ହାଇକମାଣ୍ଡ ନିଷ୍ପତି ମାନିବେ ବୋଲି କହିଥିଲେ । ଏପରିକି ମଂଚ ଉପରେ ଚନ୍ନିଙ୍କ ହାତ ଧରି ବସିବା ସହ ନାଁ ଘୋଷଣା ପରେ ଚନ୍ନିଙ୍କ ଆଲିଙ୍ଗନ କରି ଶୁଭେଚ୍ଛା ଜଣାଇଥିଲେ । ବିଜେପିକୁ ଟାର୍ଗେଟ କରି ରାହୁଲ ଗାନ୍ଧୀଙ୍କୁ ପ୍ରଂଶସାରେ ପୋତିଥିଲେ ସିଦ୍ଧୁ । ତେବେ ଏହି ସବୁ ରାଜ୍ୟରାଜନୀତିର ତାତି ଭିତରେ ଏବେ ସିଦ୍ଧୁଙ୍କ ଆଗାମୀ ପଦକ୍ଷେପ ଉପରେ ସମସ୍ତଙ୍କ ନଜର । ପ୍ରକୃତରେ ପଞ୍ଜାବ ପ୍ରଦେଶ କଂଗ୍ରେସ ସଭାପତି ନିଜ କଥା ଅନୁସାରେ କାମ କରିବେ ନା ପୁଣି ସ୍ୱର ବଦଳାଇ କିଛି ନୂଆ ବିବାଦକୁ ଟାଣିବେ ତା ଉପରେ ନଜର ରହିଛି ।