କନକ ବ୍ୟୁରୋ : ସରିଲା ନିର୍ବାଚନ, ଚାଲିଛି ଆକଳନ । କାହା ହାତକୁ ଯିବ ଓଡିଶା ଶାସନ ? ୨୧ ଲୋକସଭା ଓ ୧୪୬ ବିଧାନସଭା ଆସନ ଲାଗି ରାଜ୍ୟରେ ୪ଟି ପର୍ଯ୍ୟାୟରେ ଶେଷ ହୋଇଛି ମତଦାନ । ଇଭିଏମରେ ସିଲ ହୋଇ ରହିଛି ପ୍ରାର୍ଥୀମାନଙ୍କ ଭାଗ୍ୟ । ମେ ୨୩ ତାରିଖରେ ଖୋଲିବ ଭାନୁମତୀ ପେଡି, ଆଉ ଜଣାପଡିବ କାହା ମୁଣ୍ଡରେ ସୁନା କଳସୀ ଢାଳିଛନ୍ତି ଜନତା । ଦୀର୍ଘ ୧୯ ବର୍ଷ ହେଲା ରାଜ୍ୟରେ କ୍ଷମତାରେ ଥିବା ବିଜେଡି ପାଇଁ ଏହି ନିର୍ବାଚନ ଯେତିକି ଗୁରୁତ୍ୱପୂର୍ଣ୍ଣ । କ୍ଷମତାରୁ ଦୂରେଇ ରହିଥିବା ଦୁଇଟି ଜାତୀୟ ଦଳ ବିଜେପି ଓ କଂଗ୍ରେସ ପାଇଁ ମଧ୍ୟ ସେତିକି ଗୁରୁତ୍ୱ ରଖୁଛି ।
Kanak News is now on WhatsApp
Join and get latest news updates delivered to you via WhatsApp
ବାପା ବିଜୁ ବାବୁଙ୍କ ନାଁରେ ଆଂଚଳିକ ଦଳ ଗଢି ୧୯ ବର୍ଷ ତଳେ ଓଡିଶାରେ ରାଜନୈତିକ ସଫଳତା ପାଇବା ନବୀନଙ୍କ ପାଇଁ ହୁଏତ ବିଶେଷ କଷ୍ଟକର ନଥିଲା । କିନ୍ତୁ ଏହାପରେ ନିଜକୁ ଜଣେ ନିର୍ବିବାଦୀୟ ନେତା ଭାବରେ ପ୍ରତିଷ୍ଠା କରିବା ଓ ଲଗାତର କ୍ଷମତାରେ ତିଷ୍ଠି ରହିବା ପାଇଁ ନବୀନଙ୍କୁ ଅନେକ କସରତ କରିବାକୁ ପଡିଛି ।
ସ୍ୱଚ୍ଛ ଭାବମୂର୍ତି ଓ ଲୋକାଭିମୁଖୀ ଯୋଜନା ନବୀନଙ୍କୁ ଲୋକପ୍ରିୟତାର ଶୀର୍ଷରେ ରଖିଆସିଛି । ଯେଉଁଥିପାଇଁ ଭୋଟରଙ୍କ ଭିତରେ ପ୍ରତିପକ୍ଷ ଶିବିରର କେହି ଜଣିଏ ହେଲେ ବି ନେତା ଲୋକପ୍ରିୟତାର ଏହି ଅଭେଦ୍ୟ ଗଡକୁ ଭେଦିପାରି ନାହାନ୍ତି । ଟଙ୍କିକିଆ ଚାଉଳ, ୫ଟଙ୍କାରେ ଆହାର, କୃଷକଙ୍କ ପାଇଁ କାଳିଆ ଓ ମହିଳାଙ୍କ ପାଇ ମିଶନ୍ ଶକ୍ତି କାର୍ଯ୍ୟକ୍ରମ ଜରିଆରେ ଦୀର୍ଘବର୍ଷ ହେଲା ରାଜ୍ୟରେ ଦୁଇଟି ଜାତୀୟ ଦଳକୁ ଚେକ୍ ଦେଇଆସୁଛନ୍ତି ବିଜେଡି ସୁପ୍ରିମୋ । ହେଲେ ଏଥର ପରିସ୍ଥିତି ସାମାନ୍ୟ ବଦଳିଛି ।
୨୦୧୪ରେ ମୋଦି ମ୍ୟାଜିକ କାମ କରିନଥିଲା । କାରଣ ଗୁଜରାଟରୁ ଆସି ଦେଶର ପ୍ରଧାନମନ୍ତ୍ରୀ ପଦରେ ବସିବାକୁ ଅନେକ ସ୍ୱପ୍ନ ଦେଖାଇଥିଲେ ମୋଦି, ଯାହାକୁ ଗ୍ରହଣ କରିପାରିନଥିଲେ ଓଡିଶାବାସୀ । ହେଲେ ଏଥର ନିର୍ବାଚନ ବେଳକୁ କେନ୍ଦ୍ରରେ ୫ବର୍ଷ କ୍ଷମତାରେ ରହିସାରିଥିଲେ ମୋଦି । ଭୋଟରଙ୍କୁ ପ୍ରଭାବିତ କରିବା ପାଇଁ କେନ୍ଦ୍ରୀୟସ୍ତରରେ ପ୍ରଚଳିତ ଯୋଜନାକୁ ପୁଞ୍ଜି କରି ରାଜ୍ୟରେ ପଟ୍ଟ ପରିବର୍ତ୍ତନର ନାରା ଦେଇଛି ବିଜେପି । ଯାହାକୁ କାଉଂଟର କରି କ୍ଷମତା ବଜାୟ ରଖିବା ବିଜେଡି ଓ ସୁପ୍ରିମୋ ନବୀନ ପଟ୍ଟନାୟକଙ୍କ ପାଇଁ ବଡ ଚ୍ୟାଲେଞ୍ଜ ।
୨୦୧୪ରେ ଓଡିଶାକୁ ବାଦ ଦେଇ ସାରା ଦେଶରେ ଚାଲିଥିଲା ମୋଦିଙ୍କ ମ୍ୟାଜିକ୍ । ହେଲେ ୨୦୧୭ ପଂଚାୟତ ନିର୍ବାଚନରେ ରାଜ୍ୟର ଗ୍ରାମାଂଚଳ ଭୋଟର ବିଜେପିକୁ ଯେଭଳି ପସନ୍ଦକଲେ ତାହା ବିଜେଡି ଶିବିରରେ ଛନକା ଭରିଦେବାକୁ ଯଥେଷ୍ଟ ଥିଲା । ବିଜେପି ମଧ୍ୟ ନୂଆ ଜୋଶ ସହ ମିଶନ୍ ୧୨୦ ପ୍ଲସର ରଣନୀତି ନେଇ ଆଗକୁ ବଢିଥିଲା । ରାଜ୍ୟରେ ସଂଗଠନକୁ ସଜାଡି କ୍ଷମତାକୁ ଆସିଲେ ନୂତନ ଓଡିଶା ଗଠନର ପ୍ରତିଶ୍ରୁତି ଦେଇ ପ୍ରଚାରକୁ ଜୋରଦାର କରିଥିଲା । କେନ୍ଦ୍ରରେ ମୋଦି ସରକାରଙ୍କ ସଫଳତା ଓ ରାଜ୍ୟରେ ନବୀନ ସରକାରଙ୍କ ୧୯ ବର୍ଷର ବିଫଳତାକୁ ବିଜ୍ଞାପିତ କରିଥିଲା । ରାଜ୍ୟ ବିଜେପିର ଶୀର୍ଷ ନେତା ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ଆହୁରି ସଂଗଠିତ ହୋଇ ଜୋରଦାର ମୁକାବିଲା ପାଇଁ ପ୍ରସ୍ତୁତି କରିଥିଲା ଦଳ । ତେଣୁ ସଫଳତା ରାଜ୍ୟ ବିଜେପି ଓ ଏହାର ନେତାଙ୍କ ପାଇଁ ସମ୍ମାନର ପ୍ରଶ୍ନ ।
୧୯୯୯ରେ ମହାବାତ୍ୟାର ମୁକାବିଲା କରିବାରେ ବିଫଳତା କଂଗ୍ରେସ ସରକାରଙ୍କ ପତନର କାରଣ ହେଲା ବୋଲି କୁହାଯାଏ । ନୂଆ କରି ରାଜ୍ୟ ରାଜନୀତିରେ ଅଭ୍ୟୁଦୟ ହୋଇଥିବା ବିଜେଡିକୁ ବିକଳ୍ପ ଭାବେ ବାଛିଲେ ଓଡିଶାର ଭୋଟର । ଏହାପରଠାରୁ ଆଉ ରାଜ୍ୟରେ କ୍ଷମତାକୁ ଫେରି ପାରିନାହିଁ କଂଗ୍ରେସ । ଜାତୀୟ ରାଜନୀତିରେ କଂଗ୍ରେସ ନେତୃତ୍ୱାଧୀନ ୧୦ ବର୍ଷର ଶାସନ ସତ୍ୱେ ଓଡିଶାରେ କଂଗ୍ରେସକୁ ବାରମ୍ବାର ପ୍ରତ୍ୟାଖ୍ୟାନ କରିଛନ୍ତି ଭୋଟର । ହେଲେ ଚଳିତବର୍ଷ ନିର୍ବାଚନ ବେଳକୁ ନୂଆ ସମ୍ଭାବନା ସହ ସାମ୍ନାକୁ ଆସିଥିଲା ରାଜ୍ୟ କଂଗ୍ରେସ । ଜାତୀୟ ରାଜନୀତିରେ ରାହୁଲ ଗାନ୍ଧିଙ୍କ ପ୍ରଭାବ ଓ ଅନ୍ୟରାଜ୍ୟରେ ସଫଳତାକୁ ଆଧାର କରି ଓଡିଶାରେ ବଳ ଗୋଟାଇଥିଲା କଂଗ୍ରେସ । ନିରଞ୍ଜନଙ୍କ ନେତୃତ୍ୱରେ ଦଳ ଅଧିକ ସଂଗଠିତ ହୋଇ ଏକ କଡା ମୁକାବିଲା ଦେବାକୁ ପ୍ରସ୍ତୁତି କରିଥିଲା । ହେଲେ ସଫଳତା ଯଦି ନେତୃତ୍ୱର ମାପକାଠି, ତାହାହେଲେ ଏହି ନିର୍ବାଚନରେ ମଧ୍ୟ ବାଜିରେ ଲାଗିଛି ନିରଞ୍ଜନଙ୍କ ସମ୍ମାନ ।
ରେକର୍ଡ ପଂଚମଥର କ୍ଷମତାରେ ରହିବାକୁ ସବୁ ବଳ ଲଗାଇଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ସମାନ ଢଙ୍ଗରେ ଦୁଇ ଦଶନ୍ଧିଧରି କ୍ଷମତାରୁ ଦୂରେଇ ରହିଥିବା କଂଗ୍ରେସ ଦଳ ନୂଆ ନେତୃତ୍ୱ ସହ କ୍ଷମତାକୁ ଫେରିବା ପାଇଁ ସମସ୍ତ ରଣନୀତି କରିଛି । ପଂଚାୟତ ନିର୍ବାଚନରେ ଭଲ ପ୍ରଦର୍ଶନ କରିଥିବା ବିଜେପି ମଧ୍ୟ ପରିବର୍ତନର ନାରା ଦେଇ ବିଜେଡିଠାରୁ କ୍ଷମତା ଛଡାଇ ନେବାକୁ କରିଛି ସଂଘର୍ଷ । ଏବେ ଅପେକ୍ଷା କେବଳ ମେ ୨୩ ତାରିଖକୁ । ଯେତେବେଳେ ସ୍ପଷ୍ଟ ହୋଇଯିବ କାହା ସପକ୍ଷରେ ରହିଛି ଜନମତ । କାହାକୁ ଭରସିଛନ୍ତି ଭୋଟର ?