ଢିଙ୍କିଆରେ ୧୩ ରାଜନୈତିକ ଦଳର ପ୍ରତିନିଧିମଣ୍ଡଳୀ । ପୀଡିତଙ୍କୁ ଭେଟିଲେ, ସମସ୍ୟା ବୁଝିବା ସହ ପୋଲିସ ହଟାଇବାକୁ ଦାବି କଲେ ।

କନକ ବ୍ୟୁରୋ :  ଢିଙ୍କିଆରେ ପୁଲିସର ବର୍ବରତାକୁ ବିରୋଧ କରି ୧୩ଟି ରାଜନୈତିକ ଦଳର ପ୍ରତିନିଧି ଢିଙ୍କିଆ ଯାଇ ଲୋକଙ୍କୁ ଭେଟିଛନ୍ତି । ସେମାନଙ୍କ ସମସ୍ୟା ବୁଝିବା ସହ ପୁଲିସର ମାତ୍ରାଧିକ କାର୍ଯ୍ୟାନୁଷ୍ଠାନ ବାବଦରେ ପଚାରି ବୁଝିଥିଲେ । ଢିଙ୍କିଆ ଗ୍ରାମବାସୀଙ୍କ ସହ ଆଲୋଚନା କରିବା ପରେ ଜଗତସିଂହପୁର ଏସପିଙ୍କୁ ଭେଟି ଆଲୋଚନା କରିଥିଲେ ୧୩ ରାଜନୈତିକ ଦଳର ପ୍ରତିନିଧି । ଏହି ଅବସରରେ ଢିଙ୍କିଆରୁ ପୁଲିସ ବଳ ହଟାଇବା, ଗିରଫ କରିଥିବା ଲୋକଙ୍କୁ ମୁକ୍ତ କରିବା, ଏସପି ନିଜେ ଯାଇ ପୀଡିତ ପରିବାରକୁ ଭେଟି ଭୟ ଦୂର କରିବାକୁ ଦାବି କରିଥିଲେ ରାଜନୈତିକ ଦଳ ପ୍ରତିନିଧି ମଣ୍ଡଳି ।

ଅନ୍ୟପଟେ ଢିଙ୍କିଆରେ ପାନବରଜ ଭଙ୍ଗା ବେଳେ ପୋଲିସର କାର୍ଯ୍ୟାନୁଷ୍ଠାନ ମାମଲାରେ ମୁହଁ ଖୋଲିଛନ୍ତି ଜିନ୍ଦଲ କମ୍ପାନୀ ସିଏସଆର ମୁଖ୍ୟ । ପ୍ରଶାନ୍ତ ବିଶ୍ୱାଳ କହିଛନ୍ତି, ପ୍ରସ୍ତାବିତ ପ୍ରକଳ୍ପ ପାଇଁ ଜମି ଅଧିଗ୍ରହଣ କରୁଛନ୍ତି ରାଜ୍ୟ ସରକାର । ଏଥିରେ ଜିନ୍ଦଲ କମ୍ପାନୀର କୌଣସି ଭୂମିକା ନାହିଁ । କେବଳ କମ୍ପାନୀ ତରଫରୁ ପାନବରଜ ଓ ଶ୍ରମିକ ମାନଙ୍କୁ କ୍ଷତିପୂରଣ ରାଶି ପ୍ରଦାନ କରାଯାଉଛି । ପ୍ରକଳ୍ପ ନିର୍ମାଣରେ ଢିଙ୍କିଆ ଗ୍ରାମବାସୀଙ୍କର କୌଣସି ବେସରକାରୀ ଜମି ଅଧିଗ୍ରହଣ କରାଯାଉନାହିଁ । ଏପରିକି ଢିଙ୍କିଆ ଗାଁର କୌଣସି ପରିବାର ବିସ୍ଥାପିତ ହେଉନାହାନ୍ତି । ଏହା ଶିଳ୍ପ ପାଇଁ ଅନୂପକୂଳ ବୋଲି ଯେଉଁମାନେ ଅଭିଯୋଗ କରୁଛନ୍ତି ସେମାନେ ଏନେଇ ତଥ୍ୟ ପ୍ରଦାନ କରିବାକୁ ଖୋଲାଖୋଲି ଆହ୍ୱାନ କରିଛନ୍ତି । ଗ୍ରାମବାସୀ  ଫାଟକ ନିର୍ମାଣ କରିଥିଲେ । ଏବଂ କିଛି ଗଣ୍ଡଗୋଳ ଆଶଙ୍କା କରି ପ୍ରଶାସନ ତରଫରୁ ପୋଲିସ ମୁତୟନ କରାଯାଇଥିଲା । ଯାହାଫଳରେ ସେହିଭଳି କିଛି ସମସ୍ୟା ସୃଷ୍ଟି ହେବାରୁ ପୋଲିସ ଲାଠି ଚାଳନା କରିବାକୁ ବାଧ୍ୟ ହେଲା ବୋଲି କହିଛନ୍ତି କମ୍ପାନୀ କର୍ତୃପକ୍ଷ ।