ରାଜନୀତିରେ ରୋଚକ ଦୃଶ୍ୟ : ଦୁଇ ଭଉଣୀଙ୍କ ମଧ୍ୟରେ କଡା ଟକ୍କର

କନକ ବ୍ୟୁରୋ : ନବରଙ୍ଗପୁର ରାଜନୀତିରେ ରୋଚକ ଦୃଶ୍ୟ । ରାଜନୀତି ଚିହ୍ନିଲାନି ରକ୍ତ ସମ୍ପର୍କ । ଦୁଇ ଭଉଣୀଙ୍କ ମଧ୍ୟରେ ହେବ ନିର୍ବାଚନୀ ଲଢେଇ । ଦୁଇ ସମ୍ପର୍କୀୟ ଭଉଣୀ ସାଜିଛନ୍ତି ପରସ୍ପରର ପ୍ରତିଦ୍ୱନ୍ଦୀ । ଜଣେ ପେସାରେ ଡାକ୍ତର । ଅନ୍ୟ ଜଣେ ସରପଞ୍ଚ । ନବରଙ୍ଗପୁର ଜିଲ୍ଲା ପାପଡ଼ାହାଣ୍ଡି ବ୍ଲକ୍‌ ‌ଜୋନ୍‌-୨ରେ ହେବାକୁ ଯାଉଛି ଏମିତି ରୋଚକ ଲଢ଼େଇ । କିଏ କାହାକୁ ପରାସ୍ତ କରିବ ତାହାକୁ ନେଇ ରୋମାଞ୍ଚକର ପରିସ୍ଥିତି ସୃଷ୍ଟି ହୋଇଛି । ପାପଡ଼ାହାଣ୍ଡି ଜୋନ୍‌-୨ ଜିଲ୍ଲା ପରିଷଦ ଆସନରୁ କଂଗ୍ରେସ ପ୍ରାର୍ଥୀ ଭାବେ ନାମାଙ୍କନପତ୍ର ଦାଖଲ କରିଛନ୍ତି ପୂର୍ବତନ ବିଧାୟକ ଭୁଜବଳ ମାଝୀଙ୍କ ଡାକ୍ତର ଝିଅ ଲିପିକା ମାଝୀ। ଚିକିତ୍ସକରୁ ରାଜନେତା ହୋଇଥିବାରୁ ରାତାରାତି ଚର୍ଚ୍ଚାକୁ ଆସିଥି‌ଲେ ଲିପିକା ।

ତାଙ୍କ ବିରୋଧରେ କିଏ ବିଜେଡିରୁ ଲଢ଼ିବ ବୋଲି ଚର୍ଚ୍ଚା ଆରମ୍ଭ ହୋଇଥିଲା। ଶେଷରେ ଏହି ଚର୍ଚ୍ଚାରେ ବିରାମ ଲଗାଇ ବିଜେଡି ବଡ଼ ବାଜି ଖେଳିଛି। ମାଉସୀ ଝିଅ ଭଉଣୀ ଭାନୁମତି ପୂଜାରୀଙ୍କୁ ଏହି ଆସନରୁ ବିଜେଡି ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଛି । ଯଦି ରାଜନୈତିକ ଅଭିଜ୍ଞତାକୁ ଦେଖିବା ତେବେ ଲିପିକାଙ୍କ ବାପା ଏହି ଅଞ୍ଚଳରେ ପୂର୍ବରୁ ବିଧାୟକ ଥିଲେ । ତେଣୁ ଭଲ ଲୋକ ସଂପର୍କ ରହିଛି । ଅନ୍ୟପଟେ ଭାନୁମତି ରାଜନୀତିରେ ଆଦୌ ନୂଆ ଖେଳାଳି ନୁହନ୍ତି । କାରଣ ପାପଡ଼ାହାଣ୍ଡି ବ୍ଲକ୍‌ ସେମଳା ପଞ୍ଚାୟତର ସରପଞ୍ଚ ଭାବେ ୨୦୧୭ ମସିହାରେ ନିର୍ବାଚିତ ହୋଇଥିଲେ । ତାଙ୍କୁ ନିର୍ବାଚନରେ ବିଧାୟକ ମନୋହର ରନ୍ଧାରୀ ସହଯୋଗ କରୁଛନ୍ତି । ଦୁଇ ଭଉଣୀ ମୁହାଁମୁହିଁ ହେଉଥିବାରୁ ନିଶ୍ଚିତ ରୂପେ ଲଢ଼େଇ ଜୋରଦାର ହେବ ବୋଲି ସଂକେତ ମିଳୁଛି ।