ପଞ୍ଜାବ ଝିଅ, ଉତ୍ତର ପ୍ରଦେଶ ବୋହୂ । ଦିଲ୍ଲୀରେ କଂଗ୍ରେସକୁ ଦେଇଥିଲେ ନୂଆ ପରିଚୟ, ଗୋଟିଏ କ୍ଲିକରେ ଜାଣନ୍ତୁ ଶୀଲାଙ୍କ ପୂରା ରାଜନୀତି କ୍ୟାରିୟର ।
କନକ ବ୍ୟୁରୋ : ୮୧ ବର୍ଷ ବୟସରେ ଆଖି ବୁଜିଛନ୍ତି କଂଗ୍ରେସର ବରିଷ୍ଠ ନେତ୍ରୀ ଶୀଲା ଦୀକ୍ଷିତ । ଦିଲ୍ଲୀର ଏକ ଘରୋଇ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି ପୂର୍ବତନ ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଶୀଲା ଦୀକ୍ଷିତ । ୧୯୯୮ରୁ ୨୦୧୩ । ଦୀର୍ଘ ୧୫ ବର୍ଷ ଧରି ଦିଲ୍ଲୀର ମୁଖ୍ୟମନ୍ତ୍ରୀ ରହିଛନ୍ତି ଶୀଲା । ଆଉ ଏହାସହ ଦିଲ୍ଲୀର ସର୍ବାଧିକ ସମୟ ଧରି ମୁଖ୍ୟମନ୍ତ୍ରୀ ଆସନ ଅଳଙ୍କୃତ କରିଛନ୍ତି କଂଗ୍ରେସର ଏହି ବରିଷ୍ଠ ନେତ୍ରୀ । ଗାନ୍ଧୀ ପରିବାରର ଖାସ୍ ତଥା ଦିଲ୍ଲୀରେ କଂଗ୍ରେସକୁ ନୂଆ ପରିଚୟ ଦେଇଥିବା ଶୀଲାଙ୍କ ରାଜନୈତିକ କ୍ୟାରିୟର ବେଶ ଲମ୍ବା । ମୁଖ୍ୟମନ୍ତ୍ରୀ ହେବା ପୂର୍ବରୁ ସାଂସଦ ଭାବେ ନିର୍ବାଚିତ ହୋଇଛନ୍ତି ଶୀଲା । ଆଉ ଏହାସହ ରାଜୀବ ଗାନ୍ଧୀ ସରକାରରେ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ମଧ୍ୟ ତୁଲାଇଛନ୍ତି ।
ରାଜନୀତିରେ ଶୀଲା :
୧୯୩୮ ମାର୍ଚ୍ଚ ୩୧ରେ ପଞ୍ଜାବର କପୁରଥଲାରେ ଜନ୍ମଗ୍ରହଣ କରିଥିଲେ ଶୀଲା । ପରେ ଦିଲ୍ଲୀରୁ କଲେଜ ଶିକ୍ଷା ସମାପ୍ତ କରିବା ପରେ ଦିଲ୍ଲୀ ବିଶ୍ୱବିଦ୍ୟାଳୟରୁ ଇତିହାସରେ ପାଠ୍ୟକ୍ରମରେ ଡିଗ୍ରୀ ହାସଲ କରିଥିଲେ । ରାଜନୀତିରେ ରୁଚି ରଖିଥିବା ଶୀଲା କଂଗ୍ରେସ ନେତା ଉମାଶଙ୍କର ଦୀକ୍ଷିତଙ୍କ ପୁଅ ବିନୋଦଙ୍କୁ ବିବାହ କରିଥିଲେ । ଦିଲ୍ଲୀ ବିଶ୍ୱବିଦ୍ୟାଳୟରେ ପଢୁଥିବା ବେଳେ ଶୀଲାଙ୍କର ଭେଟଘାଟ ବିନୋଦଙ୍କ ସହ ହୋଇଥିଲା । ପରେ ବିନୋଦଙ୍କ ସହ ବିବାହ ବନ୍ଧନରେ ବାନ୍ଧି ହୋଇଥିଲେ ଶୀଲା ।
Kanak News is now on WhatsApp
Join and get latest news updates delivered to you via WhatsApp
ଶ୍ୱଶୁର ତଥା ଗାନ୍ଧୀ ପରିବାରର ଖାସ୍ ଥିବା ଉମାଶଙ୍କରଙ୍କ ଠାରୁ ପ୍ରେରଣା ପାଇ ରାଜନୀତିରେ ଏଣ୍ଟ୍ରିି କରିଥିଲେ ଶୀଲା । ଆଉ ଏହି ସମୟରେ କନୌଜରୁ ସାଂସଦ ଭାବେ ନିର୍ବାଚିତ ହୋଇ ରାଜୀବ ଗାନ୍ଧୀ ସରକାରରେ କେନ୍ଦ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇଥିଲେ ଶୀଲା । ତେବେ ୧୯୯୧ରେ ଶ୍ୱଶୁରଙ୍କ ମୃତ୍ୟୁ ପରେ ରାଜନୀତିରେ ପୂରା ସକ୍ରିୟ ରହିଲେ ଶୀଲା । ଆଉ ଏହି ସମୟ ମଧ୍ୟରେ ଗାନ୍ଧୀ ପରିବାରର ବିଶ୍ୱାସଭାଜନ ହେବା ସହ କଂଗ୍ରେସରେ ନିଜର ଦବଦବା ବଢାଇ ଚାଲିଥିଲେ ଶୀଲା । ଯାହାର ଫାଇଦା ତାଙ୍କୁ ପରବର୍ତ୍ତୀ ସମୟରେ ମିଳିଥିଲା ।
ରାଜୀବ ଗାନ୍ଧୀଙ୍କ ମୃତ୍ୟୁ ପରେ ସୋନିଆ ଗାନ୍ଧୀ ଦଳର ମଙ୍ଗ ଧରିଥିଲେ । ଆଉ ଏହି ସମୟରେ ସୋନିଆଙ୍କର ବିଶ୍ୱାସ ଜିତି ପାରିଥିଲେ ଶୀଲା । ଯେଉଁଥିପାଇଁ ୧୯୯୮ରେ ତାଙ୍କୁ ଦିଲ୍ଲୀ କଂଗ୍ରେସର ମୁଖ୍ୟ ଭାବେ ନିଯୁକ୍ତି ଦେଇଥିଲେ ସୋନିଆ । ଆଉ ଏହାସହ ପୂର୍ବ ଦିଲ୍ଲୀରୁ ଲୋକସଭା ପ୍ରାର୍ଥୀ ଭାବେ ନିର୍ବାଚନ ମୈଦାନକୁ ଓହ୍ଳାଇଥିଲେ । କିନ୍ତୁ ଏଥିରେ ସଫଳ ହୋଇପାରିନଥିଲେ ଶୀଲା । କିନ୍ତୁ ଏହାପରେ ମଧ୍ୟ ଶୀଲାଙ୍କ ଉପରୁ ସୋନିଆଙ୍କର ଭରସା ତୁଟିନଥିଲା । ଦିଲ୍ଲୀ ବିଧାନସଭା ନିର୍ବାଚନରେ କଂଗ୍ରେସର ବିପୁଳ ବିଜୟ ପରେ ପ୍ରଥମ ଥର ପାଇଁ ମୁଖ୍ୟମନ୍ତ୍ରୀ ଆସନରେ ବସିଥିଲେ ଶୀଲା ।
ଆଉ ଏହିଠାରୁ ଆରମ୍ଭ ହୋଇଥିଲା ଶୀଲାଙ୍କ ରାଜନୀତି କ୍ୟାରିୟରର ସଫଳ ଅଧ୍ୟାୟ । ଦିଲ୍ଲୀରେ କଂଗ୍ରେସକୁ ଲଗାତାର ୩ ଥର ବିଜୟ ଭେଟି ଦେବା ସହ ମୁଖ୍ୟମନ୍ତ୍ରୀ ଆସନରେ ବସିଥିଲେ ଶୀଲା । ତେବେ ୨୦୧୩ରେ ଶୀଲାଙ୍କ ରାଜନୈତିକ କ୍ୟାରିୟରର ପତନ ଆରମ୍ଭ ହୋଇଥିଲା । ୨୦୧୩ରେ ଆପ୍ ଠାରୁ ପରାଜିତ ହେବା ସହ ଶୀଲାଙ୍କ ହାତରୁ ଖସିଥିଲା ଦିଲ୍ଲୀର କ୍ଷମତା ଡୋରି । ପରେ ତାଙ୍କୁ କେରଳର ରାଜ୍ୟପାଳ ଭାବେ ନିଯୁକ୍ତି ଦିଆଯାଇଥିଲା । ତେବେ ୨୦୧୪ରେ କେନ୍ଦ୍ରରେ ମୋଦି ସରକାର ଆସିବା ପରେ ରାଜ୍ୟପାଳ ପଦରୁ ଇସ୍ତଫା ଦେଇ ପୁଣିଥରେ ସକ୍ରିୟ ରାଜନୀତିରେ ଏଣ୍ଟ୍ରି ମାରିଥିଲେ ଶୀଲା ।
ଦିଲ୍ଲୀରେ କଂଗ୍ରେସକୁ ପୁଣିଥରେ କ୍ଷମତାକୁ ଫେରାଇ ଆଣିବା ପାଇଁ ଅଣ୍ଟା ଭିଡିଥିଲେ ଶୀଲା । ଏଥିପାଇଁ ସେତେବେଳେ କଂଗ୍ରେସର ମୁଖ୍ୟ ଥିବା ରାହୁଲ ଗାନ୍ଧୀ ଶୀଲାଙ୍କୁ ପୁଣିଥରେ ଦିଲ୍ଲୀ କଂଗ୍ରେସର ଅଧ୍ୟକ୍ଷ ପଦରେ ବସାଇଥିଲେ । ତେବେ ୨୦୧୯ ସାଧାରଣ ନିର୍ବାଚନରେ ପୂର୍ବ ଦିଲ୍ଲୀରୁ ପ୍ରାର୍ଥୀ ହୋଇଥିଲେ ମଧ୍ୟ ବିଜେପି ପ୍ରାର୍ଥୀ ମନୋଜ ତିୱାରୀଙ୍କ ଠାରୁ ପରାଜିତ ହୋଇଥିଲେ ଶୀଲା । ତେବେ ନିର୍ବାଚନ ପରେ ଅସୁସ୍ଥ ହୋଇ ପଡିଥିଲେ ଶୀଲା । ଆଉ ଦୀର୍ଘଦିନ ଧରି ଅସୁସ୍ଥ ରହିବା ପରେ ଆଜି ଦିନ ପ୍ରାୟ ୩ଟା ୩୦ ମିନିଟରେ ହୃଦଘାତରେ ଶେଷ ନିଶ୍ୱାସ ତ୍ୟାଗ କରିଥିଲେ ଶୀଲା । ତେବେ ଦିଲ୍ଲୀ ବିକାଶର ଏକ ନୂଆ ଅଧ୍ୟାୟ ଆରମ୍ଭ କରିଥିବା ଶୀଲାଙ୍କୁ ସବୁଦିନ ପାଇଁ ମନେ ରଖିବେ ଦେଶବାସୀ ।