ଉପନିର୍ବାଚନ ପୂର୍ବରୁ ପିପିଲିରୁ ଜବତ ହେଲା ୫୦ଲକ୍ଷ ଟଙ୍କା : ପୋଲିସ କହିଲା, ୨ଜଣଙ୍କୁ ଅଟକ ରଖି କରାଯାଉଛି ପଚରା ଉଚରା
ଫଟୋ ଜାରି କରି ୨ ଯୁବକଙ୍କ ବିଜେପି ସହ ସମ୍ପର୍କ ଥିବା ଅଭିଯୋଗ ଆଣିଲା ବିଜେଡି; ଅଭିଯୋଗକୁ ବିଜେପିର ଖଣ୍ଡନ
କନକ ବ୍ୟୁରୋ : ପିପିଲି ଉପ-ନିର୍ବାଚନ ପୂର୍ବରୁ ଜବତ ହୋଇଛି ବିପୁଳ ପରିମାଣର ଟଙ୍କା । ଆସନ୍ତା ୧୭ ତାରିଖରେ ମତଦାନ ହେବାକୁ ଥିବାବେଳେ ଜବତ ହୋଇଛି ନଗଦ ୫୦ ଲକ୍ଷ ଟଙ୍କା । ନିର୍ବାଚନକୁ ଦୃଷ୍ଟିରେ ରଖି ଯାନବାହାନର କଡା ଚେକିଂ ଚାଲିଥିବା ବେଳେ ୫୦ଲକ୍ଷ ଟଙ୍କା ଜବତ କରିଛି ପୋଲିସ । ତାରା ଛକ ନିକଟରେ ପୋଲିସ ଏହି ଟଙ୍କା ଜବତ କରିଛି ।
Kanak News is now on WhatsApp
Join and get latest news updates delivered to you via WhatsApp
ପୋଲିସର ସୂଚନା ଅନୁସାରେ, ଗୋଟିଏ ବାଇକରେ ୨ଜଣ ବ୍ୟକ୍ତି ଯାଉଥିବା ବେଳେ ପିପିଲି ଟୋଲଗେଟ ନିକଟରେ ଚେକିଂ ଚାଲିଥିଲା । ଏହି ୨ ଯୁବକଙ୍କୁ ପୋଲିସ ଅଟକାଇବାକୁ ଚେଷ୍ଟା କରିଥିବା ବେଳେ ସେମାନେ ଖସି ପଳାଇବାକୁ ଉଦ୍ୟମ କରିଥିଲେ । ପୋଲିସ ସେମାନଙ୍କୁ ପିଛା କରି ତାର କଜା ଛକ ନିକଟରେ ଧରିଥିଲା । ଏହି ୨ ଜଣ ଯୁବକଙ୍କୁ ପୋଲିସ ଥାନାକୁ ଆଣି ପଚରାଉଚରା କରୁଛି । ଆସନ୍ତା ୧୭ ତାରିଖରେ ପିପିଲି ଉପ ନିର୍ବାଚନ ହେବାକୁ ଥିବା ବେଳେ କୌଣସି ଯାନବାହାନରେ ଯେଭଳି ଟଙ୍କା, ମାରଣାସ୍ତ୍ର, ନିଶା ସାମଗ୍ରୀ ପିପିଲି ନିର୍ବାଚନ ମଣ୍ଡଳୀକୁ ନଆସିପାରିବ ସେନେଇ ପିପିଲିର ପ୍ରବେଶ ପଥ ଗୁଡିକରେ ଜୋରଦାର ଯାଂଚ କରାଯାଉଛି । ପିପିଲି ଏସଡିପିଓ ଏହି ସୂଚନା ଦେଇଛନ୍ତି ।
ନିର୍ବାଚନ ପୂର୍ବରୁ ୫୦ ଲକ୍ଷ ଟଙ୍କା ଜବତ ହେବା ଘଟଣାରେ ବିଜେପି ଆଡକୁ ଅଙ୍ଗୁଳି ନିର୍ଦ୍ଦେଶ କରିଛି ବିଜେଡି । ଦଳୀୟ ସାଂସଦ କହିଛନ୍ତି- ଘଟଣାର ତଦନ୍ତ କରାଯାଉ । ଦଳ ଅଭିଯୋଗ କରିଛି ୨ ଜଣ ବିଜେପି କର୍ମୀଙ୍କଠାରୁ ୫୦ ଲକ୍ଷ ଜବତ ହୋଇଛି । ଟଙ୍କା ଖର୍ଚ୍ଚ କରି ନିର୍ବାଚନ ଜିତିବାର ଅପଚେଷ୍ଟା କରାଯାଉଛି ବୋଲି ଦଳ ଅଭିଯୋଗ କରିଛି ।