ପଦାରେ ପଡିଲା ପୁଲିସ ଓ ଅପରାଧୀଙ୍କ ମଧୁର ସମ୍ପର୍କ । ମହଙ୍ଗା ପଡ଼ିଲା ଅଭିଯୁକ୍ତଙ୍କୁ ଅହେତୁକ ଅନୁକମ୍ପା, ନିଲମ୍ବିତ ହେଲେ ବାଳିଆପାଳ ଥାନାର ପୂର୍ବତନ ଇନ୍ସପେକ୍ଟର ।
କନକ ବ୍ୟୁରୋ : ପୋଲିସକୁ ଖୋଜୁଛି ପୋଲିସ । ଇନ୍ସପେକ୍ଟର ବିକ୍ରମ ଜେନା ଓ ରଣଜିତ କୁମାର ସାହୁଙ୍କୁ ଖୋଜୁଛି ପୋଲିସର ସ୍ପେଶାଲ ଟାସ୍କ ଫୋର୍ସ । ଏହି ଦୁଇ ଜଣ, ଖଣି ମାଫିଆ ଓ ନିଶା ବେପାରୀଙ୍କ ସହ ସଂପର୍କ ରଖିଥିବା ଏସଟିଏଫ ତାର ତଦନ୍ତରୁ ଜାଣିବାକୁ ପାଇଛି । ଏହାରି ଭିତରେ ଫେରାର ଥିବା ଦୁଇ ଇନ୍ସପେକ୍ଟରଙ୍କୁ ଆଜି ଡିଜି ନିଲମ୍ବନ କରିଛନ୍ତି । ସେପଟେ ଆଇନ ଅନୁଯାୟୀ ଫେରାର ଥିବା ଅଫିସରଙ୍କ ସମ୍ପତି ବାଜ୍ୟାପ୍ତ କରିହେବ ବୋଲି କହିଛନ୍ତି ଆଇନଜୀବୀ ।
Kanak News is now on WhatsApp
Join and get latest news updates delivered to you via WhatsApp
ଯେଉଁ ପୋଲିସ ଦିନେ ଅପରାଧୀଙ୍କୁ ହାତକଡି ପିନ୍ଧାଉଥିଲା ସେହି ପୁଲିସକୁ ଏବେ ଗଳିକନ୍ଦିରେ ଖୋଜିବା ଆରମ୍ଭ କରିଛି ଏସଟିଏଫ । ଟାର୍ଗେଟରେ ରହିଛନ୍ତି ୨ ଜଣ ଇନ୍ସପେକ୍ଟର ବିକ୍ରମ ଜେନା ଓ ରଣଜିତ କୁମାର ସାହୁ । ଏମାନଙ୍କ ନାଁରେ ଯେଉଁ ସଙ୍ଗୀନ ଓ ସାଙ୍ଘାତିକ ଅଭିଯୋଗ ରହିଛି ତାହା ଶୁଣିଲେ ଆପଣ ବି ଚକିତ ହୋଇଯିବେ । ଏହି ୨ ଅଫିସର ସିଧାସଳଖ ଖଣି ମାଫିଆ ଓ ନିଶା ବେପାରୀଙ୍କ ସହ ସମ୍ପର୍କ ରଖିଥିବା ଏସଟିଏଫ ତାର ତଦନ୍ତରୁ ଜାଣିବାକୁ ପାଇଛି । ତେବେ ପ୍ରଥମ ପର୍ଯ୍ୟାୟର ଜେରା ପରେ, ବିକ୍ରମ ଆଉ ଧରା ଛୁଆଁ ଦେଉ ନଥିବା ବେଳେ, ରଣଜିତଙ୍କ ସହ ଆଉ ଯୋଗାଯୋଗ ହୋଇପାରୁନି । ଏହି ୨ ଅଫିସର ମନଇଛା ଛୁଟିରେ ରହିବା ଏବଂ ଏମାନଙ୍କ ସହ ପୁଲିସ ଯୋଗାଯୋଗ କରି ପାରୁ ନଥିବାରୁ ଦୁଇ ଜଣଙ୍କୁ ଡିଜି ନିଲମ୍ବନ କରିଛନ୍ତି ।
ମିଳିଥିବା ଖବର ଅନୁସାରେ ଏହି ୨ ଅଫିସର ହାଇକୋର୍ଟରେ ଆଗୁଆ ଜାମିନ ପାଇଁ ଆବେଦନ କରିଛନ୍ତି । ଫେରାର ଥିବା ୨ ଅଫିସର ରଣଜିତ ଏବଂ ବିକ୍ରମ, ଖୋର୍ଦ୍ଧା ଟାଉନ ଥାନା ଏବଂ ସଦର ଥାନାରେ ଇନ୍ସପେକ୍ଟର ଥିବା ବେଳେ, ଖଣି ମାଫିଆଙ୍କୁ ଖଣି ଲୁଟ୍ କରିବା ପାଇଁ ସହଯୋଗ କରିଥିବା ଏସଟିଏଫ ଜାଣିବାକୁ ପାଇଛି । ତେବେ ଆଇନ ଅନୁଯାୟୀ ଫେରାର ଥିବା ଅଫିସରଙ୍କ ସମ୍ପତି ବାଜ୍ୟାପ୍ତ କରିହେବ ବୋଲି ଆଇନଜୀବୀ କହିଛନ୍ତି ।
ପୋଲିସ ବର୍ଦ୍ଦିରେ ଲାଗିଛି ଦୁର୍ନୀତିର କଳାଛିଟା । କ୍ଷମତାର ଅପବ୍ୟବହାର କରି ଅପରାଧୀଙ୍କୁ ଅହେତୁକ ଅନୁକମ୍ପା ଦେଖାଇଥିବା ଘଟଣା ସାରା ରାଜ୍ୟରେ ଚାଂଚଲ୍ୟ ଖେଳାଇ ଦେଇଛି । ଆଉ ଏହି ଅଭିଯୋଗରେ ପୁଲିସ ଏହି ୨ ପୁଲିସ ଅଫିସରଙ୍କୁ ଖୋଜୁଛି । ଯେଉଁମାନେ ଏବେ ଫେରାର ।