ନିଖୋଜ ପଛର କାରଣ କହିଲା ପୋଲିସ । ମାନସିକ ଚାପରୁ ନିଖୋଜ ଥିଲେ କଟକ ବଡମ୍ବା କାନାରା ବ୍ୟାଙ୍କ ମ୍ୟାନେଜର ତପନ କୁମାର ସାହୁ ।

କନକ ବ୍ୟୁରୋ: ମାନସିକ ଚାପରୁ ନିଖୋଜ ଥିଲେ କଟକ ବଡମ୍ବା କାନାରା ବ୍ୟାଙ୍କ ମ୍ୟାନେଜର ତପନ କୁମାର ସାହୁ । ସେ ନିଜ ଇଚ୍ଛାରେ ବିଶାଖାପାଟଣା ପଳାଇଥିବା କଟକ ଆଡିସିନାଲ ଏସପି ସୂଚନା ଦେଇଛନ୍ତି । ତାଙ୍କର ଧାରା ୧୬୧ରେ ବୟାନ ରେକର୍ଡ କରାଯାଇଛି । ତାଙ୍କର କ’ଣ ମାନସିକ ଚାପ ଥିବା ସେନେଇ ତଦନ୍ତ କରାଯାଉଥିବା ପୋଲିସ ସୂଚନା ଦେଇଛି ।

ଗତକାଲି ରାତିରେ ବିଶାଖାପାଟଣାରୁ ଫେରୁଥିବା ବେଳେ ଗଞ୍ଜାମ ଗୋଳନ୍ଥରା ଥାନା ନିକଟରେ ଥିବା ଗିରିସୋଲା ଗେଟ୍ ନିକଟରୁ ପୋଲିସ ତାଙ୍କୁ ଠାବ କରିଥିଲା । ତପନଙ୍କୁ ଖୋଜିବା ପାଇଁ କଟକ ଆଡିସିନାଲ ଏସପିଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇଥିଲା । ତପନଙ୍କୁ ଠାବ କରିବା ପରେ ଗୋଳନ୍ଥରା ପୋଲିସ ବୈଦେଶ୍ୱର ଥାନା ପୋଲିସକୁ ହସ୍ତାନ୍ତର କରିଥିଲା ।

ଗତ ଶନିବାର ଓ ରବିବାର ବ୍ୟାଙ୍କ ଛୁଟି ଥିବାରୁ ତପନ ନିଜ ଘର ବ୍ରହ୍ମପୁର ଯାଇଥିଲେ । ସୋମବାର ବାଇକରେ ଫେରୁଥିବା ବେଳେ ବିଳମ୍ବ ହେବ ବୋଲି ଭାବି ବାଙ୍କୀ କଳାପଥର ଶାଖାକୁ ଯାଇଥିଲେ । ଏହା ପରେ ତାଙ୍କର ଆଉ କୌଣସି ପତ୍ତା ମିଳିନଥିଲା । ମୋବାଇଲ ବି ସୁଇଚ ଅଫ ରହିଥିଲା । ପରିବାର ଲୋକେ ଏ ନେଇ ଥାନାରେ ଅଭିଯୋଗ କରିବା ପରେ ଘଟଣାର ତଦନ୍ତ ଆରମ୍ଭ ହୋଇଥିଲା ।