ହଜିଲା ସୁନା ଫେରାଇଲା ପୋଲିସ । ୩ ବର୍ଷ ପରେ ସୁନା ପାଇ ଖୁସି ପ୍ରକଟ କଲେ ଇନ୍ଦୁମତି, କହିଲେ ପୋଲିସ କରିଛି ପୁଅର କର୍ତବ୍ୟ
କନକ ବ୍ୟୁରୋ : ଆଜି ମାତୃଦିବସ । ମାଆଙ୍କ ପାଇଁ ଦିନକୁ ସ୍ୱତନ୍ତ୍ର କରିବାକୁ ପିଲା ଲାଗିପଡନ୍ତି । ହେଲେ ଆଜିର ଦିନରେ ପୋଲିସ ପକ୍ଷରୁ ମାଆକୁ ମିଳିଛି ତାର ହଜିଲା ଜିନିଷ । ଜୟପୁର ଟାଉନ ଥାନାରେ ଦେଖିବାକୁ ମିଳିଛି ଏହି ଘଟଣା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ୨୦୧୯ ମସିହାରେ ସହରର କେଲା ନଗର ସାହିରେ ରହୁଥିବା ଇନ୍ଦୁମତି ସନାଙ୍କ ଘରୁ ୧୨୦ ଗ୍ରାମ ସୁନା ଚୋରି ହୋଇଥିଲା । ଘଟଣାକୁ ନେଇ ଥାନାରେ ଅଭିଯୋଗ ମଧ୍ୟ ହୋଇଥିଲା । ହେଲେ ସମୟ ଗଡ଼ିବା ସହ ସୁନା ମଧ୍ୟ ମିଳିନଥିଲା ଇନ୍ଦୁମତିଙ୍କୁ । ଥାନା ଯେଉଁ ନୂଆ ଅଧିକାରୀ ଆସୁଥିଲେ ପରିବାର ପକ୍ଷରୁ ତାଙ୍କୁ ଜିନିଷ ପାଇଁ ଗୁହାରି କରାଯାଉଥିଲା । ହେଲେ ୨ ଦିନ ତଳେ ପୋଲିସ ପକ୍ଷରୁ ଏହି ପରିବାରକୁ ଏକ ଫୋନ କଲ ଆସିଥିଲା । ସେପଟୁ କୁହାଯାଇଥିଲା କି ଥାନାକୁ ଆସି ସୁନା ନେଇଯାଅ ।
ଏପରି ଖବର ଶୁଣିବା ପରେ ଇନ୍ଦୁମତି ଆଶ୍ଚର୍ଯ୍ୟ ହୋଇଯାଇଥିଲେ । ସୁନା ନେବା ପାଇଁ ଆଜିର ଦିନରେ ଥାନାରେ ପହଂଚିଥିଲେ ଇନ୍ଦୁମତିଙ୍କ ପରିବାର । ପୋଲିସ ଅଧିକାରୀ ସଂଜୟ ମଣ୍ଡକ ଚୋରି ସୁନା ଇନ୍ଦୁମତିଙ୍କୁ ଦେଖାଇଥିଲେ । ନିଜ ଚୋରି ସୁନା ୨ଟି ହାର, ୨ଟି ମାଳି, ୩ ହଳ କାନ ଫୁଲକୁ ଚିହ୍ନିପାରିଥିଲେ ଇନ୍ଦୁମତି । ଆଉ ସୁନା ପାଇବା ପରେ ପୋଲିସ ଅଧିକାରୀ ପୁଅର କର୍ତବ୍ୟ କରିଥିବା କହିଥିଲେ ଇନ୍ଦୁମତି ।