ପ୍ରଶାସନିକ କଟକଣାକୁ ମାନୁନାହାନ୍ତି ଅମାନିଆ : ବେଧଡକ ଚାଲିଛି ବିବାହ ପ୍ରୋସେସନ; ଘୋଡାରେ ବସାଇ ବରଯାତ୍ରୀ ଯାଉଥିବା ବେଳେ ବରକୁ ଉଠାଇନେଲା ପ୍ରଶାସନ
କନକ ବ୍ୟୁରୋ : ଦେଶବାସୀଙ୍କୁ କରୋନା କଲବଲ କରୁଛି । ରାଜ୍ୟରେ ପ୍ରତିଦିନ ୧୦-୧୧ ହଜାରରୁ ଅଧିକ ଆକ୍ରାନ୍ତ ଚିହ୍ନଟ ହେଉଛନ୍ତି । କିଏ ଡାକ୍ତରଖାନାରେ ସଂଘର୍ଷ କରୁଛନ୍ତି ତ ଆଉ କିଏ ମହାମାରୀ ଆଗରେ ମୁଣ୍ଡ ନିଆଁ ମୃତ୍ୟୁ କୋଳରେ ଶୋଇ ଯାଉଛନ୍ତି । ଆଉ ଏହାରି ଭିତରେ ମହାମାରୀ ବିରୋଧରେ ଲଢେଇ ଜାରି ରହିଛି । କରୋନା କଟକଣା ମାନିବାକୁ ସରକାର ବାରମ୍ବାର ଅନୁରୋଧ କରୁଛନ୍ତି । କାର୍ଯ୍ୟାନୁଷ୍ଠାନ ବି ନେଉଛନ୍ତି । କିନ୍ତୁ ଗଂଜାମ ଜିଲ୍ଲାର ଅମାନିଆ ଲୋକଙ୍କୁ ଏଥିରେ କିଛି ଫରକ ପଡୁନାହିଁ । ଡ଼ିଜେ ଲଗାଇ ଡ୍ୟାନ୍ସ କରିବାର ଭିଡ଼ିଓ ଭାଇରାଲ ହେଉଛି ।
Kanak News is now on WhatsApp
Join and get latest news updates delivered to you via WhatsApp
ଗଂଜାମ ହିଂଜିଳିକାଟୁ ବ୍ଲକ ଅନ୍ତର୍ଗତ ଗୋଦାବରିପଲ୍ଲି ଗାଁରେ କରୋନା କଟକଣା ଭାଙ୍ଗି ବାହାଘର ପ୍ରୋସେସନ କରୁଥିବାର ଭିଡ଼ିଓ ଭାଇରାଲ ହୋଇଛି । ଭୂତାଣୁ ସଂକ୍ରମଣର ଭିଡ ଭିତରେ ବାହାଘରରେ ମାତ୍ର ୨୫ଜଣ ଉପସ୍ଥିତ ରହିପାରିବେ ବୋଲି ସରକାରଙ୍କ ପକ୍ଷରୁ କୁହାଯାଇଛି । କିନ୍ତୁ ଏଠାରେ ଏହି ନିୟମ ଉଲ୍ଲଘଂନ ହେଉଥିବା ଦେଖିବାକୁ ମିଳିଛି । ଭାଇରାଲ ହୋଇଥିବା ଏହି ଭିଡ଼ିଓରେ ଶତାଧିକ ଲୋକ ଏକାଠି ହୋଇଥିବା ବେଳେ ଏମାନଙ୍କ ମୁହଁରେ ମାସ୍କ ନାହିଁ କି ସାମାଜିକ ଦୂରତା ମଧ୍ୟ ନାହିଁ ।
ଦୁଇଟି ଘୋଡାରେ ଦୁଇ ଭାଇ ବର ବେଶରେ ବସିଛନ୍ତି । ଶୋଭାଯାତ୍ରା କରାଯାଉଛି । ହେଲେ ଏଠି ବର କି ମାର୍କୁଣ୍ଡୀ କାହାରି ମୁହଁରେ ମାସ୍କ ନାହିଁ । ଏ ଘଟଣା ବି ସେଇ ହିଂଜିଳିକାଟୁ ଅଂଚଳର । ଭୂତାଣୁ ଜୀବନ ନେଉଥିଲେ ବି ଏଠି ଭୟ ନାହିଁ । ପ୍ରଶାସନର ବାରମ୍ବାର ତାଗିଦ ପରେ ବି ଲୋକେ ବିଲକୁଲ୍ ମାନୁନାହାନ୍ତି । ତେଣୁ ଘୋଡା ଉପରୁ ବରକୁ ଉଠାଇ ନେଇଛି ହିଂଜିଳିକାଟୁ ବ୍ଲକ ପ୍ରଶାସନ ।
ଗତକାଲି ରାତିରେ ବରଯାତ୍ରୀ ଶୋଭାଯାତ୍ରା ହେଉଥିବା ନେଇ ଅଭିଯୋଗ ପାଇ ବିଡିଓ ସୁବ୍ରତ କୁମାର ଜେନା. ତହସିଲଦାର ପ୍ରଭାତ କୁମାର ପରିଡା, ଆଇଆଇସି ଅଭିମନ୍ୟୁ ଦାସ ହିଂଜିଳିକାଟୁ ଥାନା ଅନ୍ତର୍ଗତ ଦୁର୍ବନ୍ଧ ପଂଚାୟତର ଗୋଦାରାପଲ୍ଲୀ ଗାଁରେ ପହଂଚିଥିଲେ । ଅମାନିଆ ହୋଇ ବିବାହ ଶୋଭାଯାତ୍ରାର ଆୟୋଜନ କରାଯାଉଥିବା ବିବାହ କରୁଥିବା ଦୁଇ ଭାଇ କେ.ବସନ୍ତ ଓ କେ. ଶୁସାନ୍ତଙ୍କ ସହ ତାଙ୍କ ବାପା କେ. ରାମମୂର୍ତିଙ୍କୁ ଥାନାକୁ ଆଣି ପଚରାଉଚରା କରୁଛି ପୁଲିସ ।