ଲମ୍ବି ଲମ୍ବି ଚାଲିଛି ଗ୍ୟାଙ୍ଗଷ୍ଟରର ଗର୍ଲଫ୍ରେଣ୍ଡ ତାଲିକା । ଶିକ୍ଷିତ ଯୁବତୀଙ୍କୁ ଫସାଇ ଅପରାଧର ନେଟୱର୍କ ଚଲାଉଥିଲା ସକିଲ । ୨ ନଂ ପ୍ରେମିକା ଗିରଫ ପରେ ୩ ନଂ ଉପରେ ପୋଲିସର ନଜର ।
କନକ ବ୍ୟୁରୋ: ଗର୍ଲଫ୍ରେଣ୍ଡ ନମ୍ବର ୧, ଗର୍ଲଫ୍ରେଣ୍ଡ ନମ୍ବର ୨ ଆଉ ଏବେ ଗର୍ଲଫ୍ରେଣ୍ଡ ନମ୍ବର ୩ । ସାମ୍ନାକୁ ଆସୁଛି ଗ୍ୟାଙ୍ଗଷ୍ଟର ସକିଲର ଜଣେ ପରେ ଜଣେ ଗର୍ଲଫ୍ରେଣ୍ଡଙ୍କ ଗୁମର । ତା ସହ ଫିଟୁଛି ଦୁର୍ଦ୍ଦାନ୍ତ ଅପରାଧୀ ଗ୍ୟାଙ୍ଗଷ୍ଟର ସକିଲର ରଂଗୀନ ମିଜାଜର କାହାଣୀ । ମାଳ ମାଳ ପ୍ରେମିକାଙ୍କ ସହ କେବଳ ମଉଜ କରୁନଥିଲା, ସେମାନଙ୍କୁ ନିଜ କ୍ରାଇମ୍ ସିଣ୍ଡିକେଟର ମୋହରା କରିଥିଲା ସକିଲ । ପ୍ରେମିକାଙ୍କ ଜରିଆରେ ଫିଲ୍ମ ଷ୍ଟାଇଲରେ ଅପରାଧର ନେଟ୍ୱର୍କ ଚଳାଇଥିଲା ଏହି ଗାଙ୍ଗଷ୍ଟର । ଗ୍ୟାଙ୍ଗଷ୍ଟର ସକିଲର ଦୁଇ ଦୁଇ ଜଣ ଗର୍ଲଫ୍ରେଣ୍ଡ ଗିରଫ ହେବା ପରେ ଏବେ ତିନି ନମ୍ବର ଗର୍ଲଫ୍ରେଣ୍ଡକୁ ଖୋଜୁଛି କମିସନରେଟ ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଦାଦାବଟି ଆଦାୟ ଠାରୁ ଆରମ୍ଭ କରି ବ୍ୟବସାୟୀଙ୍କୁ ଧମକ ଚମକ ଦେବାରେ ଗାଙ୍ଗଷ୍ଟରର ଏହି ପ୍ରେମିକାମାନେ ନେଉଥିଲେ ପ୍ରମୁଖ ଭୂମିକା । ସବୁଠୁ ବଡ଼ କଥା ହେଉଛି ଶିକ୍ଷିତା ଯୁବତୀମାନଙ୍କୁ ପ୍ରେମିକା ସଜାଇ ନିଜ ଅପରାଧ ସାମ୍ରାଜ୍ୟରେ ମିଶାଇଥିଲା ସକିଲ୍ । ୧ ନମ୍ବର ପ୍ରେମିକା ନସରିନ ଜଣେ ଆଇନ ଛାତ୍ରୀ ହୋଇଥିବା ବେଳେ ଦୁଇ ନମ୍ବର ପ୍ରେମିକା ରେସମ୍ ଜଣେ ଏୟାର ହଷ୍ଟେସ୍ । ସକିଲର ତୃତୀୟ ପ୍ରେମିକା ଉପରେ ନଜର ରଖିଛି କମିସନରେଟ୍ ପୋଲିସ । ସକିଲ କ୍ରାଇମ ସିଣ୍ଡିକେଟରେ ତାଙ୍କର ସମ୍ପୃକ୍ତି ପ୍ରମାଣ ମିଳିଲେ ତାକୁ ମଧ୍ୟ ଗିରଫ କରାଯିବ ବୋଲି କହିଛନ୍ତି କଟକ ଡିସିପି ।
ସେପଟେ ସାମ୍ନାକୁ ଆସିଛି ଜେଲ ଭିତରେ ଗ୍ୟାଙ୍ଗଷ୍ଟର ସକିଲର ସେଲଫି । ତା’ର ପୂରା ନେଟ୍ୱର୍କକୁ ଧରିବା ପାଇଁ ପୋଲିସ ତନାଘନା କରୁଥିବା ବେଳେ ଜେଲ ଭିତରେ ଅୟସ କରୁଛି ସକିଲ୍ । ଚୌଦ୍ୱାର ଜେଲ ଭିତରେ ସ୍ମାର୍ଟ ଫୋନ ବ୍ୟବହାର କରି ସେଲଫି ନେଉଛି, ଫୋନରେ ଦାଦାବଟି ମାଗୁଛି । ହେଲେ ଜେଲ କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ହେଉନଥିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
କଟକର ବ୍ୟବସାୟୀ ଯୋଗେଶ ଅଗ୍ରୱାଲ ଓ ତାଙ୍କ ଭାଇ ସୁରଜ ଅଗ୍ରୱାଲଙ୍କୁ ଧମକ ଦେବା ଘଟଣାରେ ସମ୍ପୃକ୍ତି ଥିବା ଅଭିଯୋଗରେ ଗ୍ୟାଙ୍ଗଷ୍ଟର ସକିଲର ଦୁଇ ପ୍ରେମିକା ସହ ୭ ଜଣଙ୍କୁ ଗିରଫ କରାଯାଇଛି ।