କନକ ବ୍ୟୁରୋ: ତମାଣ୍ଡୋରେ ଡ୍ରାଇଭରଙ୍କ ହାଇଡ୍ରାମା । କେତେବେଳେ ପୋଲିସ ଡ୍ରାଇଭର ମୁହାଁମୁହିଁ ତ ଆଉ କେତେବେଳେ ଡ୍ରାଇଭର-ଡ୍ରାଇଭର ଭିତରେ ହଙ୍ଗାମା । ଷ୍ଟିଅରିଂ ଛାଡ ଆନ୍ଦୋଳନ ଦ୍ୱିତୀୟ ଦିନରେ ଉଗ୍ର ରୂପ ନେଇଛି । ନଛୋଡବନ୍ଦା ହୋଇ ଆନ୍ଦୋଳନ, ପ୍ରତିବାଦକୁ ଆହୁରି ଜୋରଦାର କରିଛି ଡ୍ରାଇଭର ସଂଘ । ଆନ୍ଦୋଳନକାରୀ ଡ୍ରାଇଭର ଓ ବାହାର ରାଜ୍ୟରୁ ଆସିଥିବା ଡ୍ରାଇଭରଙ୍କ ଭିତରେ ଉତେଜନାପୂର୍ଣ୍ଣ ସ୍ଥିତି ଦେଖିବାକୁ ମିଳିଥିଲା । ଗୋଷ୍ଠୀ ଡ୍ରାଇଭର ମୁହାଁମୁହିଁ ହୋଇଥିଲେ । ଡ୍ରାଇଭର ସଂଘର ଆନ୍ଦୋଳନକୁ ବାହାର ରାଜ୍ୟରୁ ଆସୁଥିବା ଡ୍ରାଇଭର ବିରୋଧ କରିଥିଲେ । ଏହାକୁ ନେଇ ଭୁବନେଶ୍ୱର ଉପକଣ୍ଠ ତମାଣ୍ଡୋରେ ଉତେଜନାପୂର୍ଣ୍ଣ ସ୍ଥିତି ଦେଖିବାକୁ ମିଳିଛି । ଦୁଇ ଗୋଷ୍ଠୀ ଡ୍ରାଇଭରଙ୍କ ଭିତରେ ଠେଲାପେଲା ସହ ମାରପିଟ୍ର ଚିତ୍ର ସାମ୍ନାକୁ ଆସିଥିଲା । ରାଜରାସ୍ତା ଉପରେ ଠେଲାପେଲା, ଗଣ୍ଡଗୋଳ ହେବାରୁ ରାସ୍ତାର ଦୁଇ ପଟେ ଅଟକି ଯାଇଥିଲା ଶହ ଶହ ଗାଡି । ଫଳରେ ଜାତୀୟ ରାଜପଥ କିଛି ସମୟ ପାଇଁ ଜାମ ହୋଇଯାଇଥିଲା । ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିଛି ।
Kanak News is now on WhatsApp
Join and get latest news updates delivered to you via WhatsApp
ଗଣ୍ଡଗୋଳ ପରେ ରାସ୍ତା ଉପରେ ବସି ବିରୋଧ ପ୍ରଦର୍ଶନ କରୁଥିବା ଡ୍ରାଇଭରଙ୍କୁ ବୁଝାସୁଝା କରି ରାସ୍ତା ଉପରୁ ହଟାଇଛି । ଡ୍ରାଇଭର ରାସ୍ତାରୁ ହଟିବା ପରେ ତମାଣ୍ଡୋରେ ଗାଡି ଚଳାଚଳ ସ୍ୱାଭାବିକ ହୋଇଛି । ସେପଟେ ଆନ୍ଦୋଳନକାରୀ ଡ୍ରାଇଭର ଓ ବାହାର ରାଜ୍ୟର ଡ୍ରାଇଭରଙ୍କ ମଧ୍ୟରେ ସଂଘର୍ଷର ଖବର ପାଇ ଜଟଣୀ ବିଧାୟକ ସୁରେଶ ରାଉତରାୟ ପହଞ୍ଚିିଥିଲେ । ସେ ଡ୍ରାଇଭରମାନଙ୍କ ସହ ଆଲୋଚନା କରିଛନ୍ତି । ସେହିପରି ରାଜ୍ୟ ବିଜେପିର ଏକ ପ୍ରତିନିଧି ଦଳ ମଧ୍ୟ ତମାଣ୍ଡୋ ଯାଇ ଆନ୍ଦୋଳନକାରୀଙ୍କ ସହ ଆଲୋଚନା କରିଛନ୍ତି । ତମାଣ୍ଡୋ ରାଜରାସ୍ତାରେ ଏବେ ବି ସ୍ଥିତି ଉତ୍ତେଜନାପୂର୍ଣ୍ଣ ରହିଛି । ରାଜଧାନୀରେ ଡ୍ରାଇଭରଙ୍କ ଆନ୍ଦୋଳନକୁ ବିରୋଧ କରିଥିଲେ ବାହାରୁ ଆସୁଥିବା ଡ୍ରାଇଭର । ଫଳରେ ରାଜରାସ୍ତାରେ ବେଶ କିଛି ସମୟ ଧରି ଜାମ୍ ହୋଇଥିଲା । ସ୍ଥିତି ଏଭଳି ହୋଇଥିଲା ଯେ, ପୋଲିସ ପହଁଚି ଲୋକଙ୍କୁ ବୁଝାସୁଝା କରି ରାସ୍ତା ଖାଲି କରିଛି ।