ଆଇପିଏସ ଆଶିଷ ସିଂହଙ୍କୁ ନେଇ ସ୍ପଷ୍ଟୀକରଣ ରଖିଲେ ପୋଲିସ ଡିଜି । ଜୁନ ୩ରୁ କାର୍ଯ୍ୟରେ ଯୋଗଦେଲେଣି ଆଶିଷ । ସମନ୍ୱୟ ଅଭାବରୁ ଗୃହ ବିଭାଗକୁ ଯାଇପାରିନଥିଲା ଚିଠି
କନକ ବ୍ୟୁରୋ: ବରିଷ୍ଠ ଆଇପିଏସ ଅଧିକାରୀ ଆଶିଷ ସିଂଙ୍କୁ ନେଇ ପୁଣି ଚର୍ଚ୍ଚା ସୃଷ୍ଟି ହୋଇଛି । ହେଲେ ଏଥର ଗୃହ ବିଭାଗର ଏକ ଚିଠିକୁ ନେଇ ଚର୍ଚ୍ଚାକୁ ଆସିଛନ୍ତି ଏହି ବରିଷ୍ଠ ଆଇପିଏସ ଅଧିକାରୀ । ତେବେ ଯାହାଙ୍କୁ ଗୃହ ବିଭାଗ ଚିଠି ଲେଖି ଖୋଜୁଛି, ସେଇ ଆଇପିଏସ୍ ଅଧିକାରୀ ଆଶିଷ ସିଂହ, ଖୋଦ୍ ଡିଜିପିଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ସାମିଲ ହୋଇଛନ୍ତି । ସ୍ୱାସ୍ଥ୍ୟଗତ କାରଣରୁ ଏକ ମାସ ଧରି ଛୁଟିରେ ଥିବା ଆଶିଷ ସିଂହ, ଛୁଟିରୁ ଫେରିଲେଣି ନା ନାହିଁ, ଡ୍ୟୁଟିରେ ଯୋଗ ଦେଲେଣି ନାହିଁ ଜାଣିବା ପାଇଁ ପୁଲିସ୍ ଡିଜିପିଙ୍କୁ ଚିଠି ଲେଖିବା ପରେ ପୁରା ଘଟଣା ସାମ୍ନାକୁ ଆସିଛି । ଆଉ ଗୃହ ବିଭାଗର ଚିଠି ଉପରେ ଉତ୍ତର ରଖିଛନ୍ତି ପୁଲିସ ଡିଜି ।
Kanak News is now on WhatsApp
Join and get latest news updates delivered to you via WhatsApp
ଛୁଟି ପରେ କୌଣସି ଅଧିକାରୀ ଫେରିଲେଣି ନା ନାହିଁ, ସେ ନେଇ ବିଭାଗ ଚିଠି ଲେଖିବା କିମ୍ବା ଜାଣିବାକୁ ଚେଷ୍ଟା କରିବା କିଛି ବଡ଼ କଥା ନୁହେଁ କିମ୍ବା ନୂଆ କଥା ନୁହେଁ । କିନ୍ତୁ ଆଶିଷ ସିଂଙ୍କ ସମ୍ପର୍କରେ ଚିଠି ଆସିବା ସ୍ୱାଭାବିକ ଭାବେ ଚର୍ଚ୍ଚା ସୃଷ୍ଟି କରିଛି । କାରଣ ନିର୍ବାଚନ ସମୟଠାରୁ ସେ, ବିବାଦ ଘେରରେ ରହି ଆସିଛନ୍ତି । ଶାସକ ଦଳ ପାଇଁ କାମ କରୁଥିବା ଅଭିଯୋଗ ଘଟଣାରେ ତାଙ୍କୁ କେନ୍ଦ୍ରାଞ୍ଚଳ ପଦରୁ ହଟାଇ ଦିଆଯାଇଥିଲା । ସେହିପରି ସ୍ୱାସ୍ଥ୍ୟଗତ କାରଣ ଦର୍ଶାଇ ଛୁଟିରେ ରହିବା ସହ ବିଜେଡି ପାଇଁ କାମ କରୁଥିବା ଅଭିଯୋଗ ହୋଇଥିଲା । ଯେଉଁଥିପାଇଁ ଏମ୍ସର ଡାକ୍ତରୀ ଦଳକୁ ସ୍ୱାସ୍ଥ୍ୟ ପରୀକ୍ଷା କରିବା ପାଇଁ ନିର୍ଦ୍ଦେଶ ଦେଇଥିଲେ ନିର୍ବାଚନ କମିଶନ । ତେଣୁ ଆଶିଷ ସିଂଙ୍କୁ ନେଇ ଚିଠି ଆସିବା ଚର୍ଚ୍ଚା ସୃଷ୍ଟି କରିଥିଲା ।
ବର୍ତ୍ତମାନ ସମସ୍ତ ଦ୍ୱନ୍ଦ୍ୱ ଦୂର କରିଛନ୍ତି ପୁଲିସ୍ ଡିଜି । ଏମିତି କି ଜୁନ୍-୩ ତାରିଖରୁ କାର୍ଯ୍ୟରେ ଯୋଗ ଦେଇଥିବା ନେଇ ସ୍ପଷ୍ଟ କରିବା ସହ କେଉଁ କେଉଁ ବୈଠକରେ ସାମିଲ ହୋଇଥିଲେ, ସେନେଇ ମଧ୍ୟ ସୂଚନା ଦିଆଯାଇଛି । କିନ୍ତୁ ଜଣେ ବରିଷ୍ଠ ଆଇପିଏସ୍ ଅଧିକାରୀଙ୍କ ସମ୍ପର୍କରେ ଗୃହ ବିଭାଗ ଜାଣି ନପାରିବା ପ୍ରଶାସନିକ ମହଲରେ ଚର୍ଚ୍ଚା ସୃଷ୍ଟି କରିଛି । ମୋବାଇଲ, ଇଣ୍ଟରନେଟ୍, ଡିଜିଟାଲ ଦୁନିଆରେ ଯୋଗାଯୋଗ ହୋଇନପାରିବା ଅନେକଙ୍କୁ ଆଶ୍ଚର୍ଯ୍ୟ-ଚକିତ କରିଛି ।