ଲକଡାଉନରେ ସାଇକେଲରେ ଯାଉଥିଲେ ଜିଲ୍ଲାପାଳ । ପୋଲିସ କରୁଥିଲା ଚେକିଂ । କଲେକ୍ଟରଙ୍କୁ ଅଟକାଇ କୁଆଡେ ଯାଉଛ ବୋଲି ପଚାରିଲେ କନେଷ୍ଟବଳ ।
କନକ ବ୍ୟୁରୋ : କଲେକ୍ଟରଙ୍କୁ ଅଟକାଇଲେ ଲେଡି କନେଷ୍ଟବଳ । ଲକଡାଉନରେ ସାଇକେଲରେ ଯାଉଥିଲେ ଜିଲ୍ଲାପାଳ । କରୋନା ସଂକ୍ରମଣର ଚେନ୍ ଭାଙ୍ଗିବା ପାଇଁ, ସରକାର ଅନେକ ପଦକ୍ଷେପ ନେଉଛନ୍ତି । ନାଇଟ୍ କର୍ଫ୍ୟୁ, ସଟଡାଉନ୍, ସାପ୍ତାହିକ ସଟଡାଉନ୍, ଲକଡାଉନ୍ ଭଳି ଅନେକ କଟକଣା ଜାରିକରାଯାଇଛି । ଏହି ସମୟରେ କାହାରିକୁ ଘରୁ ନବାହାରିବା ପାଇଁ ନିର୍ଦ୍ଦେଶ ରହିଥିବା ବେଳେ, କେବଳ ଅତ୍ୟାବଶ୍ୟକ ସାମଗ୍ରୀ ପାଇଁ ଦୋକାନବଜାରକୁ ମଧ୍ୟ ନିର୍ଦ୍ଦିଷ୍ଟ ସମୟ ପାଇଁ ଖୋଲାଯାଉଛି । ଏଭଳି ସମୟରେ ରାଜସ୍ଥାନରୁ ଆସିଛି ରୋଚକ ଦୃଶ୍ୟ ।
Kanak News is now on WhatsApp
Join and get latest news updates delivered to you via WhatsApp
ରାଜସ୍ଥାନ ବସ୍ତ୍ରନଗରୀ ଭିଲୱାଡାରେ ଲକଡାଉନ୍ କଟକଣା କେମିତି ପାଳନ ହେଉଚି, ତାର ତଦାରଖ କରିବା ପାଇଁ ସକାଳୁ ସକାଳୁ ସାଇକେଲ ଧରି ବାହାରକୁ ବାହାରିଥିଲେ କଲେକ୍ଟର ଶିବପ୍ରସାଦ । ତେବେ ସହରରେ ଜିଲ୍ଲାପାଳ ରାଉଣ୍ଡ ମାରିବାକୁ ଯାଉଥିବାର ଖବର ପୋଲିସକୁ ମିଳିଯାଇଥିଲା । କିନ୍ତୁ କଲେକ୍ଟର ସାଇକେଲରେ ବୁଲୁଛନ୍ତି ବୋଲି କେହି ଜାଣିନଥିଲେ ।
ଚାରିଆଡେ ଶୁନଶାନ ଥିଲା, ବାଟରେ ବାଟରେ ପୋଲିସ ଚେକିଂ ମଧ୍ୟ ଚାଲିଥିଲା । ଆଉ ଏତିକିବେଳେ ସାଇକେଲରେ ଯାଉଥିବା କଲେକ୍ଟରଙ୍କୁ ଅଟକାଇଦେଇଥିଲେ ଡ୍ୟୁଟିରେ ଥିବା ଜଣେ ମହିଳା କନେଷ୍ଟବଲ ନିର୍ମଳା ସ୍ୱାମୀ । ତେବେ ଯେତେବେଳେ ସେ ଜାଣିଥିଲେ ଯେ, ସେ ଅଟକାଇଥିବା ବ୍ୟକ୍ତିଜଣଙ୍କ ହେଉଛନ୍ତି କଲେକ୍ଟର, ସେତେବେଳେ ସେ ଟିକେ ନର୍ଭସ ହୋଇଯାଇଥିଲେ । କିନ୍ତୁ କନେଷ୍ଟବଳଙ୍କ ଏଭଳି କାର୍ଯ୍ୟଶୈଳୀକୁ ପ୍ରଂଶସା କରିଥିଲେ ଜିଲ୍ଲାପାଳ ।
ଟି-ସାର୍ଟ ପିନ୍ଧି ସାଇକେଲ୍ ଧରି ଯାଉଥିବାକୁ କଲେକ୍ଟରଙ୍କୁ ଚିହ୍ନିପାରିନଥିଲେ କନେଷ୍ଟବଳ । ଆଉ କହିଥିଲେ, ଭାଇ କୁଆଡେ ଯାଉଛନ୍ତି, ଦୟାକରି ଘରେ ରୁହନ୍ତୁ । ଏହି ସମୟରେ ଜିଲ୍ଲାପାଳଙ୍କ ପଛରେ ତାଙ୍କର ସୁରକ୍ଷାକର୍ମୀ ଆସୁଥିଲେ । ଏବଂ ମହିଳା କନେଷ୍ଟବଳଙ୍କୁ ଜିଲ୍ଲାପାଳଙ୍କ ପରିଚୟ ଦେଇଥିଲେ । ଆଉ ଏହା ଶୁଣିବା ପରେ ଆଶ୍ଚର୍ଯ୍ୟ ହୋଇଯାଇଥିଲେ କନେଷ୍ଟବଳ । କିନ୍ତୁ ମହିଳା କନେଷ୍ଟବଳଙ୍କ ଏପରି କାର୍ଯ୍ୟରେ ଖୁସି ହୋଇଥିଲେ ଜିଲ୍ଲାପାଳ, ଏବଂ ତାଙ୍କୁ ସାବାସୀ ବି ଦେଇଥିଲେ । ଏହାପରେ କଲେକ୍ଟର ବିଭିନ୍ନ ଚେକିଂ ପଏଂଟକୁ ଯାଇଥିଲେ, ଏବଂ ପୋଲିସ କର୍ମଚାରୀ ମାନଙ୍କର ପ୍ରଂଶସା କରିଥିଲେ ।
ତେବେ ଦୁଃଖର କଥା ହେଉଛି, ମହାମାରୀ ଭଳି ସଙ୍କଟ ବେଳେ ନିସ୍ୱାର୍ଥପର ଭାବେ ସେବା କରୁଥିବା ଏହି ମହିଳା କନେଷ୍ଟବଳ ନିର୍ମଳା ସ୍ୱାମୀ ଏବଂ ତାଙ୍କ ପୁଅ ଏବେ କରୋନାରେ ସଂକ୍ରମିତ ହୋଇଛନ୍ତି । ନିର୍ମଳାଙ୍କ କହିବା କଥା, ସଂଖ୍ୟା କମିଛି କିନ୍ତୁ କରୋନା କମିନି । ସେ କରୋନାର କଷ୍ଟକୁ ଜାଣିଛନ୍ତି । ଏଥିପାଇଁ ଲୋକଙ୍କୁ ଘରେ ରହିବାକୁ ସେ ପରାମର୍ଶ ଦେଇଛନ୍ତି ।
ତେବେ କରୋନା ଭାଇରସର ଗମ୍ଭୀରତାକୁ ବୁଝିବାର ସମସ୍ତଙ୍କୁ ଆବଶ୍ୟକତା ରହିଛି । କରୋନାର ଦ୍ୱିତୀୟ ଲହର ସଂକ୍ରମଣ ଅଧିକ ଭୟଙ୍କର ହେଉଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବଢୁଛି । ସଂକ୍ରମଣର ଚେନ୍ ଭାଙ୍ଗିବାକୁ କଟକଣା ଜାରି କରୁଛନ୍ତି ସରକାର । କିନ୍ତୁ କିଛି ଅମାନିଆ ନିୟମ ନମାନୁଥିବାର ସଂକ୍ରମଣ କମିବାର ନାଁ ଧରୁନାହିଁ । ତେଣୁ ସମସ୍ତଙ୍କୁ ନିୟମ ମାନିବାର ଆବଶ୍ୟକତା ରହିଛି । ମାସ୍କ ପିନ୍ଧନ୍ତୁ, ସାମାଜିକ ଦୂରତା ବଜାୟ ରଖନ୍ତୁ ।