କରୋନା ବେଳେ ବୋଝ ଉପରେ ନଳିତା ବିଡା ସାଜିଛି ପୁଲିସ ଫାଇନ୍ । ଅଫିସରୁ ବାହାରିବା ବିଳମ୍ବ ହେଲେ ରାସ୍ତାରେ ଗଣିବାକୁ ପଡୁଛି ଫାଇନ୍, ସେପଟେ ନିୟମ ଉଲଂଘନ ଅଭିଯୋଗରେ ଜରିମାନା ଦେଲେ ଟିକଟିକ୍ ପିଲା ।
କନକ ବ୍ୟୁରୋ : ଲୋକମାନେ ଯେତେବେଳେ ଆଗକୁ କ’ଣ ହେବ ସେନେଇ ସନ୍ଦିହାନ ଅଛନ୍ତି, ସେତେବେଳେ ଲୋକଙ୍କ ଭିତରେ ଆଉ ଏକ ଭୟ ସୃଷ୍ଟି ହୋଇଛି । ପଦାକୁ ବାହାରିଲେ ପୋଲିସକୁ ଫାଇନ ଦେବା ସହ କଡା ଯାଂଚର ସମ୍ମୁଖୀନ ହେବା ଆଶଙ୍କା କରୁଛନ୍ତି ସାଧାରଣ ଲୋକ । ନାଇଟ୍ କର୍ଫ୍ୟୁ ବେଳେ ଏହି ଭୟ ଆହୁରି ବଢ଼ିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଓଡିଶାରେ ସନ୍ଧ୍ୟା ୭ଟା ପରେ ଆପଣ ଯଦି ମୁଖ୍ୟ ରାସ୍ତାରେ ଯାଉଛନ୍ତି ତେବେ ଆପଣଙ୍କୁ ପୋଲିସ ଯାଂଚର ସାମ୍ନା କରିବାକୁ ପଡିବ । ପୋଲିସ ବାବୁ ଆପଣଙ୍କୁ ପଚାରିବେ କୁଆଡେ ଯାଇଥିଲେ କାହିଁକି ଯାଇଥିଲେ, ଏମିତି ଅନେକ ପ୍ରଶ୍ନ । ସନ୍ଧ୍ୟା ୭ଟା ପରେ ହଠାତ୍ ଆପଣଙ୍କ ଅଧିକାର ସଂକୁଚିତ ହୋଇଯାଉଛି ।
ଭାରତ ସରକାର ରାତି ୯ଟାରୁ ସକାଳ ୫ଟା ଯାଏଁ ରାତ୍ରୀକାଳିନ କର୍ଫ୍ୟୁ ଜାରି କରିଥିବାବେଳେ ଓଡିଶା ସରକାର ସନ୍ଧ୍ୟା ୭ଟାରୁ ସକାଳ ୫ଟା ଯାଏଁ ରାତ୍ରୀକାଳିନ କର୍ଫ୍ୟୁ ଜାରି କରିଛନ୍ତି । ସରକାରୀ ଅଧିକାରୀମାନେ କହୁଛନ୍ତି ସଂକ୍ରମଣ ସମ୍ଭାବନାକୁ ଏହି କଟକଣା ଦ୍ୱାରା କିଛି ମାତ୍ରାରେ କମ୍ କରିହେବ । କିନ୍ତୁ ଏହି ଥିଓରୀର ବାସ୍ତବତା କେତେ ତାହା କେହି ଜାଣନ୍ତି ନାହିଁ ।
ଭୁବନେଶ୍ୱରର ଇନ୍ଦିରାଗାନ୍ଧି ପାର୍କରେ କିଛି ପିଲା ଟିକଟକ୍ ଭିଡିଓ ସୁଟ୍ କରୁଥିବାବେଳେ ସେଠାରେ ପହଁଚି ଯାଇଥିଲେ ପୋଲିସ୍ ବାବୁ । ତାଙ୍କୁ ଟିକଟକ୍ ଭିଡିଓ ସୁଟ୍ କରିବାକୁ କିଏ ଅନୁମତି ଦେଲା, ଏଭଳି ଅନେକ ପ୍ରଶ୍ନ କରି ଧମକ ଚମକ ମଧ୍ୟ ଦେଲେ । ଫାଇନ ବି ନେଲେ ଆଉ ପୋଲିସ ଗାଡିରେ ବସାଇ ଥାନାବି ନେଇଗଲେ । ପ୍ରଶ୍ନ ଉଠୁଛି ଏସବୁ ଅଧିକାର କଣ ଜନସାଧାରଣଙ୍କର ଆଉ ନାହିଁ । ଆଉ ଏବେ ଯେଉଁଠି ଚାହିଁବେ ଆପଣଙ୍କୁ ପୋଲିସ ବାବୁ ଧମକାଇବେ ଏବଂ ଥାନାକୁ ନେଇଯିବେ । ଯେଉଁ ସ୍ୱାଧୀନତା, ଗଣତନ୍ତ୍ରର ସଫଳତାର ସବୁଠାରୁ ବଡ ଚାବି କାଠି ସେସବୁ ଅଧିକାର କଣ ଚାଲିଯାଇଛି । ଏଭଳି ଅନେକ ପ୍ରଶ୍ନ ଏବେ ଅନେକଙ୍କୁ ଆନ୍ଦୋଳିତ କରୁଛି ।