ସୋରଡ଼ା ପୋଲିସର ସଫଳତା । ମୃତ ମହିଳାର ସ୍କେଚ୍ ବନାଇ ମହିଳାଙ୍କ ପରିଚୟ ଜାଣିଲା ପୋଲିସ । ଶେଷରେ ଅପରାଧୀ ଦିଅର ପାଖରେ ପହଁଚି ପାରିଲା ତଦନ୍ତକାରୀ ଟିମ୍
କନକ ବ୍ୟୁରୋ : ଜଣେ ଗର୍ଭବତୀ ମହିଳାଙ୍କର ଏହି ଦୁଇଟି ଚିତ୍ର ଆଙ୍କିଥିଲା ସୋରଡା ପୁଲିସ । ପରୀ ହତ୍ୟା ଘଟଣା ପରି ଏହି ମହିଳାଙ୍କର ମଧ୍ୟ କିଛି ସୁରାଗ୍ ମିଳୁନଥିଲା । ଗାଁ ବିଲରୁ ଅଧା ପୋଡା ମୃତଦେହ ପାଇ ମହିଳାଙ୍କ ବିଷୟରେ ଜାଣିବା ପାଇଁ ଚେଷ୍ଟା କରାଯାଉଥିଲା । ଆଉ ଶେଷରେ ପୁଲିସର ଉଦ୍ୟମ ସଫଳ ହେଲା । ଏହି ଚିତ୍ରରୁ ପ୍ରକୃତ ମହିଳାଙ୍କ ପରିଚୟ ମିଳିଗଲା ।
Kanak News is now on WhatsApp
Join and get latest news updates delivered to you via WhatsApp
ଗଂଜାମ ଜିଲ୍ଲା ସୋରଡା ଅଂଚଳର ଏହି ରୋମାଂଚକର କାହାଣୀ ପୁଲିସ ବିଭାଗକୁ ପ୍ରେରଣା ଦେଲା ଭଳି ଏକ କାହାଣୀ । ପରୀ ହତ୍ୟା ମାମଲାରେ କିଛି ନପାଇ ଯେମିତି ନୟାଗଡ ପୁଲିସ ନିରବ ହୋଇ ଶୋଇଗଲା, କିନ୍ତୁ ଏହି ଘଟଣାରେ ସୋରଡା ପୁଲିସ ସତ ଖୋଜିବା ପାଇଁ ମହିଳାଙ୍କ ସ୍କେଚ୍ ତିଆରି କରି ଶେଷରେ ପ୍ରକୃତ ପରିଚୟ ପାଇଛି ।
ଦିଅର ସାଜିଥିଲା ସଇତାନ । ଭାଉଜଙ୍କୁ ଚତୁରତାର ସହ କାବୁ କରି ସଂପର୍କ ରଖିଥିଲା ସୀମାଂଚଳ । କୋଲକାତା ନେଇ ରଖିବା ପରେ ଅର୍ଚନା ନିଜ ପିଲାଙ୍କୁ ଦେଖିବା ପାଇଁ ଜିଦ୍ ଧରିଥିଲେ । କିନ୍ତୁ ସୀମାଂଚଳର ଯୋଜନା କିଛି ଅଲଗା ଥିଲା, ଗାଁକୁ ନେଇ ଯିବ କହି, ଗାଁ ବିଲ ପାଖରେ ତଂଟି ଚିପି ହତ୍ୟା କରିଥିଲା । ଏବଂ ପ୍ରମାଣ ନଷ୍ଟ କରିବା ପାଇଁ ମୁହଁରେ କିରୋସିନ ଢାଳି ପୋଡି ଦେଇଥିଲା ।
ଘଟଣା ଘଟାଇବା ପରେ ଓଡିଶା ବାହାରକୁ ଚାଲିଯାଇଥିଲା ଅଭିଯୁକ୍ତ । ଚୋର ଯେତେ ଚାଲାକ୍ ହେଲେ ବି ପୁଲିସକୁ ଚକମା ଦେବା ଏତେ ସହଜ ନଥିଲା । କଲ୍ ଡିଟେଲ୍ସ ରେକର୍ଡ ଓ ମୋବାଇଲ୍ ଲୋକେସନରୁ ପ୍ରଥମେ ଦୁଇ ସହଯୋଗୀ ଓ ପରେ ଅଭିଯୁକ୍ତ ସୀମାଂଚଳକୁ ହାତକଡି ପିନ୍ଧାଇଥିଲା ସୋରଡା ପୁଲିସ ।