ମୋଦିଙ୍କ ସ୍ପେଶାଲ୍ ପ୍ଲେନ୍: କ’ଣ ରହିଛି ଏହାର ବିଶେଷତ୍ୱ ଆପଣ ଜାଣିଲେ ହୋଇଯିବେ ଆଶ୍ଚର୍ଯ୍ୟ ।
କନକ ବ୍ୟୁରୋ: ଆମେରିକାରୁ ଆସିଲା ମୋଦିଙ୍କ ସୁରକ୍ଷାକବଚ । ଆମେରିକାରୁ ଆସି ଦିଲ୍ଲୀରେ ପହଂଚିଲା ସ୍ୱତନ୍ତ୍ର ଏୟାର ଇଣ୍ଡିଆ ୱାନ ବିମାନ । ରାଷ୍ଟ୍ରପତି, ଉପରାଷ୍ଟ୍ରପତି ଓ ପ୍ରଧାନମନ୍ତ୍ରୀ ଏହି ସ୍ୱତନ୍ତ୍ର ବିମାନରେ ଗସ୍ତ କରିବେ । ଆସନ୍ତୁ ଜାଣିବା ୧୨୦୦ କୋଟି ଟଙ୍କା ଖର୍ଚ୍ଚରେ ନିର୍ମାଣ ହୋଇଥିବା ଏହି ବିମାନରେ କଣ ରହିଛି ସ୍ୱତନ୍ତ୍ରତା ।
Kanak News is now on WhatsApp
Join and get latest news updates delivered to you via WhatsApp
ଏହି ଅତ୍ୟାଧୁନିକ ବିମାନରେ ଏଭଳି କିଛି ଉପକରଣର ବ୍ୟବହାର କରାଯାଇଛି, ଯାହାଦ୍ୱାରା ଆକାଶପଥରେ ଯେକୌଣସି କ୍ଷେପଣାସ୍ତ୍ର ଆକ୍ରମଣକୁ ପ୍ରତିହତ କରିପାରିବ । ଏହି ବିମାନକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଏୟାରଫୋର୍ସ ୱାନ୍ ଭଳି ଢାଂଚାରେ ନିର୍ମିତ କରାଯାଇଛି । ଯାହା ଆକାଶପଥରେ ସମ୍ପୂର୍ଣ୍ଣ ଅଭେଦ୍ୟ ରହିବ । ଆକାଶପଥରେ ଯେକୌଣସି ଆକ୍ରମଣର ମୁକାବିଲା କରିବାରେ ସକ୍ଷମ ଏୟାର ଇଣ୍ଡିଆ ୱାନ୍ ।
ଏହି ବିମାନରେ ମଝି ଆକାଶରେ ହୋଇପାରିବ ଅଡିଓ ଓ ଭିଡିଓ ମାଧ୍ୟମରେ ଯୋଗାଯୋଗ । ତେବେ ବିନା ହ୍ୟାକିଂରେ ମଝି ଆକାଶରେ ଅଡିଓ ଓ ଭିଡିଓ ମାଧ୍ୟମରେ ନିରବଚ୍ଛିନ ଯୋଗାଯୋଗ ହୋଇପାରିବ । ସ୍ୱତନ୍ତ୍ର ଅତ୍ୟାଧୁନିକ ଜ୍ଞାନକୌଶଳରେ ଏହି ବିମାନରେ ଯୋଗାଯୋଗ ବ୍ୟବସ୍ଥା କରାଯାଇଛି । ଯାହାକୁ ଟ୍ୟାପ କିମ୍ବା ହ୍ୟାକ କରିବା ଅସମ୍ଭବ ।
ଆମେରିକାରୁ ଆସିଥିବା ଏହି ଏୟାର ଇଣ୍ଡିଆ ବିମାନ ଆଜି ଦିଲ୍ଲୀର ଆର୍ନ୍ତଜାତୀୟ ବିମାନ ବନ୍ଦରରେ ଅବତରଣ କରିଛି । ଏହି ବିମାନରେ ଅଫିସ ରୁମ୍, ମିଟିଂ ରୁମ୍ ସହ ବିଭିନ୍ନ ପ୍ରକାରର ଅତ୍ୟାଧୁନିକ କମ୍ୟୁନିକେସନ ବ୍ୟବସ୍ଥା ରହିଛି । ଜରୁରୀକାଳୀନ ମେଡିକାଲ ସେବା ପାଇଁ ବିମାନ ଭିତରେ ଦୁଇଟି ଭିନ୍ନ ଭିନ୍ନ ସେକ୍ସନ ରହିଛି । ଭିଭିଆଇପିଙ୍କ ସୁରକ୍ଷା ପାଇଁ ଅତ୍ୟାଧୁନିକ କ୍ଷେପଣାସ୍ତ୍ର ପ୍ରଣାଳୀ, ଆତ୍ମରକ୍ଷା କଠୋରୀ ମଧ୍ୟ ରହିଛି । ସବୁଠାରୁ ବଡ କଥା ହେଉଛି, ଥରେ ଇନ୍ଧନ ଭରିଲେ, ଏହି ବିମାନ ଆମେରିକାରୁ ଭାରତ ପର୍ଯ୍ୟନ୍ତ ଉଡାଣ ଭରିପାରିବ ।