ଗୋଆରେ କଂଗ୍ରେସ ଉପରେ ବର୍ଷିଲେ ମାମତା, ରାଜନୀତିକୁ ନେଇ କହିଲେ ଏମିତି କଥା
କନକ ବ୍ୟୁରୋ : ଏବେ ଗୋଆ ଗସ୍ତରେ ଅଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଏକ ସାମ୍ବାଦିକ ସମ୍ମିଳନୀରେ ମମତା କହିଛନ୍ତି କି ଦେଶରେ ରାଜନୀତି ଯେଭଳି ଚାଲିଛି ତାହା ନରେନ୍ଦ୍ର ମୋଦୀଙ୍କୁ ଆହୁରି ଶକ୍ତିଶାଳୀ କରିବ । ଏହାର କାରଣ ଭାବେ ମମତା କହିଛନ୍ତି କି କଂଗ୍ରେସ ଏବେ ରାଜନୀତିକୁ ଯେତେ ହାଲକା ଭାବେ ନେଉଛି ତାହା ହିଁ ମୋଦୀଙ୍କୁ ଶକ୍ତିଶାଳୀ କରାଇବାରେ ସହାୟକ ହେବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ଗୋଆ ଗସ୍ତର ଶେଷ ଦିନରେ ମମତା ବାନାର୍ଜୀ କଂଗ୍ରେସକୁ ଏଭଳି ପରାମର୍ଶ ଦେଇଥିବା ବେଳେ ବିଜେପିକୁ ଟାର୍ଗେଟ କରି କହିଛନ୍ତି କି ଦିଲ୍ଲୀରେ ଦାଦାଗୀରି ବହୁତ ହେଲା । ଏବେ ଏହାର ପରିସମାପ୍ତି ହେବା ଦରକାର ।
୩ ଦିନିଆ ଗୋଆ ଗସ୍ତର ଶେଷ ଦିନରେ ପାନାଜୀ ଠାରେ ଏକ ସାମ୍ବାଦିକ ସମ୍ମିଳନୀକୁ ସମ୍ବୋଦ୍ଧିତ କରିବା ଅବସରରେ ମମତା କହିଛନ୍ତି କି କଂଗ୍ରେସ ନିଷ୍ପତ୍ତି ନନେଇ ପାରିବାର ଦୁର୍ବଳତା ଏବେ ଦେଶବାସୀ ଭୋଗୁଛନ୍ତି । ଏବେ ବି କଂଗ୍ରେସ ରାଜନୀତିକୁ ଗମ୍ଭୀରତାର ସହ ନନେଉଥିବା କଥା ମମତା ଅଭିଯୋଗ କରିଛନ୍ତି । କଂଗ୍ରେସର ଦୁର୍ବଳ ନେତୃତ୍ୱ ପାଇଁ ମୋଦୀ ଶକ୍ତିଶାଳୀ ହେବାରେ ଲାଗିଛନ୍ତି । ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ନେଇ ମମତା କହିଛନ୍ତି କି କଂଗ୍ରେସକୁ ବିଜେପି ସହିତ ଲଢିବାର ସୁଯୋଗ ମିଳିଥିଲା । କିନ୍ତୁ ପଶ୍ଚିମବଙ୍ଗ ନିର୍ବାଚନ ବେଳେ ସେ ବିଜେପି ସହିତ ଲଢିବା ପରିବର୍ତ୍ତେ ମୋ ସହିତ ଲଢେଇ କରିଥିଲା ବୋଲି ମମତା କହିଛନ୍ତି ।
ଅନ୍ୟପଟେ ଗୋଆ ବିଧାନସଭା ନିର୍ବାଚନ ନେଇ ମମତା କହିଛନ୍ତି କି ଆଗାମୀ ବିଧାନସଭା ନିର୍ବାଚନରେ ଟିଏମସି ଗୋଆର ସମସ୍ତ ୪୦ ଆସନରେ ପ୍ରତିଦ୍ୱନ୍ଦିତା କରିବ । ଅନ୍ୟପଟେ ଯଦି କୌଣସି ଆଞ୍ଚଳିକ ଦଳ ସେମାନଙ୍କ ସହ ମେଣ୍ଟ କରିବାକୁ ଚାହିଁବ ତେବେ ସେମାନଙ୍କୁ ସ୍ୱାଗତ କରାଯିବ । କାରଣ ଦେଶରେ ଆଞ୍ଚଳିକ ଦଳମାନେ ମଜବୁତ ହେବା ଦରକାର ବୋଲି ମମତା କହିଛନ୍ତି । ଯଦି ରାଜ୍ୟମାନେ ମଜବୁତ ହେବେ ତେବେ ଦିଲ୍ଲୀର ଦାଦାଗୀରୀ ବନ୍ଦ ହୋଇଯିବ ବୋଲି ସେ କହିଥିଲେ ।