ଜାନୁଆରୀ ୧୬ରୁ ସାରା ଦେଶରେ କରୋନା ଟିକାକରଣ : ପ୍ରଧାନମନ୍ତ୍ରୀ ମୋଦୀ କରିବେ ଟିକାକରଣର ଶୁଭାରମ୍ଭ

62

କନକ ବ୍ୟୁରୋ : ଜାନୁଆରୀ ୧୬ରେ ପ୍ରଧାନମନ୍ତ୍ରୀ ମୋଦି ସବୁଠାରୁ ବଡ ଟିକାକରଣ ଅଭିଯାନର ଶୁଭାରମ୍ଭ କରିବେ । ଓଡିଶା ମଧ୍ୟ ଏଥିପାଇଁ ପ୍ରସ୍ତୁତ ଥିବା, ସରକାରଙ୍କ ପକ୍ଷରୁ କୁହାଯାଇଛି । ଓଡିଶାରେ ଦୁଇ ପ୍ରକାରର ଟିକା ଦିଆଯିବ । ଅକ୍ସଫୋର୍ଡର କୋଭିସିଲଡ ଏବଂ ଭାରତ ବାୟୋଟେକର କୋଭାକ୍ସିନ୍ । କେବଳ ରାଜଧାନୀ ଭୁବନେଶ୍ୱରରେ ଭାରତ ବାୟୋଟେକର କୋଭାକ୍ସିନ୍ ଟିକା ଏବଂ ଅନ୍ୟ ଜିଲ୍ଲାରେ କୋଭିସିଲଡ ଟିକା ଦିଆଯିବା ନେଇ ସରକାର ନିଷ୍ପତି ନେଇଛନ୍ତି । ସରକାରଙ୍କ ନିଷ୍ପତି ଅନୁସାରେ ରାଜ୍ୟ କୋଭିଡ ଟିକା କେନ୍ଦ୍ରରୁ ବିଭିନ୍ନ ଜିଲ୍ଲାକୁ ଟିକା ପଠାଇବା କାର୍ଯ୍ୟ ଆରମ୍ଭ ହୋଇଯାଇଛି । କଡା ସୁରକ୍ଷାବଳୟରେ କୋଭିସିଲ୍ଡ ଟିକା ଗଜପତି ଜିଲ୍ଲାରେ ପହଂଚିଛି ।

ପ୍ରଥମ ପର୍ଯ୍ୟାୟରେ ଆସିଥିବା ୪୫ଶହ ଟିକାକୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ପରିସରରେଥିବା ଜିଲ୍ଲା ଟିକା କେନ୍ଦ୍ରରେ ରଖାଯାଇଛି । ପ୍ରଥମ ପର୍ଯ୍ୟାୟରେ ଗଜପତି ଜିଲ୍ଲାରେ ୬ ହଜାର ୯୫୩ ଜଣଙ୍କୁ ଟିକା ଦିଆଯିବ । ଗଂଜାମ ଜିଲ୍ଲାକୁ ଗତକାଲି ସନ୍ଧ୍ୟାରେ ୨୧ ହଜାର ୩୦୦ କୋଭିସିଲ୍ଡ ଟିକା ପହଂଚିଛି । ଜିଲ୍ଲା ଚିକିତ୍ସାଧିକାରୀଙ୍କ କାର୍ଯ୍ୟାଳୟ ପରିସରରେ ଥିବା ଭ୍ୟାକ୍ସିନ ଷ୍ଟୋରରେ ଟିକା ମହଜୁଦ ରଖାଯାଇଛି । ଟିକାକରଣ ପାଇଁ ପୂର୍ବରୁ ଜିଲ୍ଲାରେ ଡାଟାବେସ ତିଆରି ହେବା ସହ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି । ସେପଟେ ରାଜ୍ୟ ଟିକା ସଂରକ୍ଷଣ କେନ୍ଦ୍ରରୁ ରାୟଗଡା ଜିଲ୍ଲାକୁ ପ୍ରଥମ ପର୍ଯ୍ୟାୟରେ ୫ହଜାର ୪ଶହ ଟିକା ଆସି ପହଂଚିଛି । ଜିଲ୍ଲା ଟିକା ସଂରକ୍ଷଣ ଟିକା ରଖାଯାଇଥିବା ବେଳେ ପର୍ଯ୍ୟାୟକ୍ରମେ ଜିଲ୍ଲାର ଅନ୍ୟାନ୍ୟ ସ୍ଥାନକୁ ପଠାଯିବ ।

ଦ୍ୱିତୀୟ ପର୍ଯ୍ୟାୟରେ ରାୟଗଡା ଜିଲ୍ଲାକୁ ୩ ହଜାର ଟିକା ଆସିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି । ସେହିପରି ମୟୂରଭଂଜ ଜିଲ୍ଲାକୁ ମଧ୍ୟ ଗତକାଲି ପ୍ରଥମ ପର୍ଯ୍ୟାୟ କୋଭିସିଲ୍ଡ ଟିକା ପହଂଚିଛି । ରାଜ୍ୟ କରୋନା ଟିକା କେନ୍ଦ୍ରରୁ ଟିକା ଆସିବା ପରେ ଜିଲ୍ଲା ଟିକା ଭଣ୍ଡାରରେ ମହଜୁଦ ରଖାଯାଇଛି । ପ୍ରଥମ ପର୍ଯ୍ୟାୟ ଟିକାକରଣ ପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ କରିଛି ଜିଲ୍ଲାପ୍ରଶାସନ । ପୂର୍ବରୁ ପୁରୀ, କଟକ, ଜଗତସିଂହପୁର ଆଦି ଜିଲ୍ଲାକୁ ପ୍ରଥମ ପର୍ଯ୍ୟାୟ ଟିକା ପହଂଚି ସାରିଛି ।

Comments are closed.