କରୋନା ସହ ଲଢେଇ ନେଇ ବିରୋଧୀଙ୍କ ସହ ଆଲୋଚନା କଲେ ମୋଦି । ଫୋନ କରି ନବୀନ ପଟ୍ଟନାୟକ, ସୋନିଆ ଗାନ୍ଧୀ, ମନମୋହନ ସିଂହ, ପ୍ରଣବ ମୁଖାର୍ଜୀ, ଦେବଗୌଡ଼ାଙ୍କ ସହ କଥା ହେଲେ ପ୍ରଧାନମନ୍ତ୍ରୀ
କନକ ବ୍ୟୁରୋ: ଭୟାବହ କରୋନା ଭୂତାଣୁର ପ୍ରକୋପ ଭିତରେ ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଫୋନ କରି କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କରୋନା ମୁକାବିଲା ନେଇ ମୋଦି ଆଲୋଚନା କରିଥିବା ଜଣାପଡିଛି । ଏଥିସହ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ ଏବଂ ପ୍ରତିଭା ପାଟିଲଙ୍କ ସମେତ ପୂର୍ବତନ ପ୍ରଧାନମନ୍ତ୍ରୀ ମନୋମୋହନ ସିଂହ ଓ ଏଚ. ଡି ଦେବେଗୌଡାଙ୍କ ସହ ଏହି ପ୍ରସଙ୍ଗରେ ମୋଦି ଆଲୋଚନା କରିଛନ୍ତି । କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଏବଂ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହ ମଧ୍ୟ କଥା ହୋଇଛନ୍ତି ମୋଦୀ ।
Kanak News is now on WhatsApp
Join and get latest news updates delivered to you via WhatsApp
ଶତାବ୍ଦୀର ସବୁଠୁ ବଡ଼ ସଂକଟ ଦେଇ ଗତି କରୁଥିବା ବେଳେ ଦେଶର ତୁଙ୍ଗ ନେତାମାନଙ୍କ ସହ କଥା ହୋଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଦୁଇ ଜଣ ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀ ଓ ପ୍ରତିଭା ପାଟିଲଙ୍କ ସହ କରୋନା ସଂକ୍ରମଣର ସ୍ଥିତି ନେଇ ଆଲୋଚନା କରିଛନ୍ତି । ଦୁଇ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂହ ଓ ଏଚ୍.ଡି. ଦେବେଗୌଡ଼ାଙ୍କୁ ବର୍ତମାନର ସ୍ଥିତି ସଂପର୍କରେ ଜଣାଇଛନ୍ତି । ସେହିପରି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସହ ମଧ୍ୟ କଥା ହୋଇଛନ୍ତି ମୋଦୀ ।
ଦେଶର ୨୧ ଦିନିଆ ଲକ୍ ଡାଉନର ଆଜି ୧୧ ତମ ଦିନ । ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ଧୀରେ ଧୀରେ ବଢ଼ୁଥିବା ବେଳେ ଲକ୍ ଡାଉନ୍ ଯୋଗୁଁ ଠପ୍ ହୋଇଯାଇଛି ଅର୍ଥନୀତି । ଏପରି ସଂକଟଜନକ ସ୍ଥିତିର କିପରି ମୁକାବିଲା କରାଯିବ, ଏ ନେଇ ସରକାରଙ୍କ ଚିନ୍ତା ବଢ଼ିଯାଇଛି ।
ଦେଶର ଏହି ଘଡ଼ିସନ୍ଧି ମୁହୂର୍ତ୍ତରେ ବିରୋଧୀ ଦଳ ଓ ଦେଶର ପ୍ରମୁଖ ଦଳର ନେତାଙ୍କ ସହ ଫୋନରେ କଥା ହୋଇଛନ୍ତି ପ୍ରଧାନମନ୍ତ୍ରୀ । ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ସହ କଥା ହୋଇ ରାଜ୍ୟର ସ୍ଥିତି ସଂପର୍କରେ ଅବଗତ ହୋଇଛନ୍ତି ମୋଦୀ । ସମାଜବାଦୀ ନେତା ମୁଲାୟମ ସିଂହ ଯାଦବ, ଅଖିଲେଶ ଯାଦବ, ତୃଣମୂଳ କଂଗ୍ରେସ ମୁଖ୍ୟ ମମତା ବାନାର୍ଜି, ଟିଆରଏସ୍ ମୁଖ୍ୟ କେ ଚନ୍ଦ୍ରଶେଖର ରାଓ, ଡିଏମକେ ମୁଖ୍ୟ ଏମକେ ଷ୍ଟାଲିନ୍ ଓ ଅକାଳି ଦଳ ସୁପ୍ରିମୋ ପ୍ରକାଶ ସିଂହ ବାଦଲଙ୍କ ସହ ମଧ୍ୟ ଫୋନରେ କଥା ହୋଇଛନ୍ତି ପ୍ରଧାନମନ୍ତ୍ରୀ ।
ଏହାରି ଭିତରେ ଭିଡିଓ କନଫରେନ୍ସିଂ ଜରିଆରେ କରୋନା ମୁକାବିଲା ନେଇ ମୁଖ୍ୟମନ୍ତ୍ରୀମାନଙ୍କ ସହ ଦୁଇ ଥର ଆଲୋଚନା କରି ସାରିଛନ୍ତି ମୋଦୀ । ସବୁ ପ୍ରମୁଖ ଦଳର ନେତାଙ୍କ ମତାମତ ନେବା, ଏକାଠି ଏହି ବଡ଼ ବିପଦର ମୁକାବିଲା କରୁଥିବା ନେଇ ସେ ଏକ ବାର୍ତା ଦେଇଛନ୍ତି ।