ଭାରତ-ଚୀନ ସୀମା ବିବାଦକୁ ନେଇ ଟ୍ରମ୍ପଙ୍କ ବଡ ବୟାନ: ଲଦାଖ ସୀମା ବିବାଦ ସମ୍ପର୍କରେ ଭାରତ ପ୍ରଧାନମନ୍ତ୍ରୀଙ୍କ ସହ ହୋଇଛି କଥାବାର୍ତ୍ତା; ଚୀନକୁ ନେଇ ମୋଦୀଙ୍କ ମୁଡ୍ ଭଲ ନାହିଁ
କନକ ବ୍ୟୁରୋ: ଭାରତ-ଚୀନ ସୀମା ବିବାଦ ଏବେ ପୁଣି ଚର୍ଚାର ବିଷୟ ହୋଇଛି । ଏହାକୁ ନେଇ ଦୁଇ ଦେଶ ମଧ୍ୟରେ ସମ୍ପର୍କ ଉଷ୍ଣ ହୋଇଛି । ଏତିକି ବେଳେ ଲଦାଖ ସୀମା ବିବାଦକୁ ନେଇ ବଡ ବୟାନ ରଖିଛନ୍ତି ଆମେରିକା ରାଷ୍ଟ୍ରପତି । ଟ୍ରମ୍ପ କହିଛନ୍ତି ଲଦାଖ ସୀମା ବିବାଦ ସମ୍ପର୍କରେ ସେ ଭାରତ ପ୍ରଧାନମନ୍ତ୍ରୀଙ୍କ ସହ କଥା ହୋଇଛନ୍ତି । ଏହି ବିବାଦ ଉଭୟ ଦେଶ ପାଇଁ ଶୁଭଙ୍କର ନୁହଁ । ଚୀନକୁ ନେଇ ମୋଦୀଙ୍କ ମୁଡ୍ ଭଲ ନାହିଁ ବୋଲି କହିଛନ୍ତି ଟ୍ରମ୍ପ । ଭାରତ ଓ ଚୀନ ବହୁତ ଜନସଂଖ୍ୟା ଥିବା ଦେଶ । ଉଭୟ ଦେଶ ପାଖରେ ୧.୪ ଅରବ ଜନସଂଖ୍ୟା ରହିଛି । ଏହାଛଡା ଦୁଇ ଦେଶର ସେନା ଶକ୍ତିଶାଳୀ ।
Kanak News is now on WhatsApp
Join and get latest news updates delivered to you via WhatsApp
ତେବେ ସୀମା ଉତେଜନାକୁ ନେଇ ଭାରତ ଖୁସି ନାହିଁ, ଆଉ ଚୀନ ମଧ୍ୟ ଖୁସି ନଥାଇ ପାରେ ବୋଲି କହିଛନ୍ତି ଆମେରିକା ରାଷ୍ଟ୍ରପତି । ଏଥିସହ ଦୁଇ ଦେଶ ମଧ୍ୟରେ ମଧ୍ୟସ୍ଥତାକୁ ନେଇ ଦେଇଥିବା ପ୍ରସ୍ତାବକୁ ଦୋହରାଇଥିଲେ ଟ୍ରମ୍ପ । କହିଥିଲେ, ଯଦି ଭାରତ-ଚୀନ ବିବାଦର ସମାଧାନ ପାଇଁ ତାଙ୍କର ସହାୟତା ଲୋଡନ୍ତି, ତେବେ ମଧ୍ୟସ୍ଥି ସାଜିବାକୁ ସେ ପ୍ରସ୍ତୁତ ।
ସେପଟେ ଭାରତ ବିଦେଶ ମନ୍ତ୍ରାଳୟ ସ୍ପଷ୍ଟ କରିଛି ଚୀନ ସହ ସୀମା ପ୍ରସଙ୍ଗରେ ଆମେରିକାର ସହାୟତା ଦରକାର ନାହିଁ । ଗତକାଲି ଭିଡିଓ କନଫରେନ୍ସିଂରେ ପ୍ରେସମିଟ କରି ଏହି ସୂଚନା ଦେଇଛନ୍ତି ବିଦେଶ ମନ୍ତ୍ରାଳୟ ମୁଖପାତ୍ର ଅନୁରାଗ ଶ୍ରୀବାସ୍ତବ । ସେ କହିଛନ୍ତି, ଆମେ ଚୀନ ସହ ସୀମା ବିବାଦର ଶାନ୍ତିପୂର୍ଣ୍ଣ ସମାଧାନ ପାଇଁ ଚୀନ ସହ ସଂପର୍କରେ ରହିଛୁ ।