ଜାତିସଂଘ ଜଳବାୟୁ ସମ୍ମିଳନୀରେ ମୋଦିଙ୍କ ଉଦବୋଧନ । କହିଲେ, ଭାରତରେ ଖୁବଶୀଘ୍ର ପ୍ଲାଷ୍ଟିକ ଉପରେ ପଡିବ ପୂର୍ଣ୍ଣଚ୍ଛେଦ
କନକ ବ୍ୟୁରୋ : ନ୍ୟୁୟର୍କରେ ଜାତିସଂଘ ଜୟବାୟୁ ସମ୍ମିଳନୀରେ ଉଦବୋଧନ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଅବସରରେ ବିଶ୍ୱନେତାଙ୍କୁ ମୋଦି କହିଛନ୍ତି, ଜଳବାୟୁ ସଙ୍କଟକୁ ନିୟନ୍ତ୍ରଣ କରିବା ପାଇଁ ସାରା ବିଶ୍ୱ ଯଥେଷ୍ଟ ପଦକ୍ଷେପ ଗ୍ରହଣ କରୁନାହିଁ । ଏବେ ଆଉ କିଛି କହିବାର ସମୟ ନାହିଁ , କାମ କରିବାର ବେଳ ଆସିଛି । ଜଳବାୟୁ ସଙ୍କଟର ମୁକାବିଲା ଦିଗରେ ଭାରତ ବଳିଷ୍ଠ ପଦକ୍ଷେପ ଗ୍ରହଣ କରୁଥିବା ଦର୍ଶାଇ ମୋଦି କହିଛନ୍ତି, ଆମେ ୧୫ କୋଟି ପରିବାର ପାଇଁ ସ୍ୱଚ୍ଛ ଜାଳେଣି ଗ୍ୟାସ ସଂଯୋଗ କରିଛୁ ।
Kanak News is now on WhatsApp
Join and get latest news updates delivered to you via WhatsApp
ଜଳ ସମ୍ପଦ ବିକାଶ, ଜଳ ସଂରକ୍ଷଣ ଏବଂ ବର୍ଷା ଜଳ ସଂରକ୍ଷଣ ପାଇଁ ଆମେ ଜୀବନ ମିସନ ଆରମ୍ଭ କରିଛୁ । ଆସନ୍ତା ସ୍ୱାଧୀନତା ଦିବସରେ ଭାରତ, ସିଙ୍ଗଲ ୟୁଜ୍ ପ୍ଲାଷ୍ଟିକରେ ପୂର୍ଣ୍ଣଚ୍ଛେଦ ପକାଇବ ବୋଲି ମୋଦି ଦୃଢୋକ୍ତି ବାଢିଛନ୍ତି । ଭାରତର ସୌର ଅଭିଯାନରେ ୮୦ ଦେଶ ସାମିଲ ଅଛନ୍ତି ବୋଲି ମୋଦି କହିଛନ୍ତି । ଅଧିବେଶନରେ ମୋଦି ଅକ୍ଷୟ ଶକ୍ତିର ବ୍ୟବହାର ଉପରେ ଗୁରୁତ୍ୱାରୋପ କରିଛନ୍ତି । ପରିସ୍ଥିତି ଦିନକୁ ଦିନ ବିଗିଡା ଯାଉଥିବାରୁ ମୋଦି ପରିବେଶ ସୁରକ୍ଷା ଦିଗରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ବିଶ୍ୱନେତାଙ୍କୁ ଅନୁରୋଧ କରିଛନ୍ତି ।