ନ୍ୟାସନାଲ୍ ଡିଜିଟାଲ୍ ହେଲଥ ମିଶନର ଘୋଷଣା କଲେ ନରେନ୍ଦ୍ର ମୋଦୀ । ଦେଶର ସମସ୍ତ ଭାରତୀୟଙ୍କ ଡାଟା ରଖାଯିବ । ପ୍ରତ୍ୟେକ ଭାରତୀୟଙ୍କୁ ମିଳିବ ସ୍ୱାସ୍ଥ୍ୟସେବା

ସେପଟେ ଦେଶରେ ୩ଟି ଭ୍ୟାକ୍ସିନ ପାଇଁ ଚାଲିଛି ପରୀକ୍ଷା । ପ୍ରତ୍ୟେକ ଭାରତୀୟଙ୍କ ପାଖରେ ପହଞ୍ଚିବ ଭ୍ୟାକ୍ସିନ

259

କନକ ବ୍ୟୁରୋ: ୭୪ତମ ସ୍ବାଧୀନତା ଦିବସ ଅବସରରେ ଜାତୀୟ ରାଜଧାନୀ ନୂଆଦିଲ୍ଲୀର ଲାଲକିଲ୍ଲାରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ପତାକା ଉତ୍ତୋଳନ କରିଥିଲେ। ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲାଲକିଲ୍ଲାରୁ ଦେଶବାସୀଙ୍କୁ ସମ୍ବୋଧିତ କରି ଦେଶକୁ ବିକାଶ ପଥରେ ନେବା ପାଇଁ କରାଯାଇଥିବା ବିଭିନ୍ନ ଯୋଜନା ଉପରେ ଆଲୋକପାତ କରିଥିଲେ । ଆତ୍ମନିର୍ଭର ଭାରତ ଅଭିଯାନ ସହ ଦେଶରେ ମହିଳାଙ୍କ ବିବାହ ବୟସ ଧାର୍ଯ୍ୟ କରିବାଠାରୁ ଆରମ୍ଭ କରି କୋଭିଡ୍ ଯୋଦ୍ଧାଙ୍କୁ ତାଙ୍କ ସେବା ପାଇଁ ଧନ୍ୟବାଦ୍ ଜଣାଇବା ପର୍ଯ୍ୟନ୍ତ ବହୁ ପ୍ରସଙ୍ଗ ଉପରେ ବକ୍ତବ୍ୟ ରଖିଥିଲେ । ତେବେ ପ୍ରଧାନମନ୍ତ୍ରୀ ନିଜ ଭାଷଣରେ ନିମ୍ନଲିଖିତ ଗୁରୁତ୍ବପୂର୍ଣ୍ଣ ବିଷୟ ଉପରେ ଆଲୋଚନା କରିଛନ୍ତି ଯେ,

୧. ଦେଶକୁ ସ୍ବାଧୀନତା ଦେବା ପାଇଁ ନିଜ ଜୀବନକୁ ବାଜି ଲଗାଇଥିବା ସ୍ବାଧୀନତା ସଂଗ୍ରାମୀମାନଙ୍କୁ ଶ୍ରଦ୍ଧାଞ୍ଜଳି ଦେଇ ପ୍ରଧାନମନ୍ତ୍ରୀ କହିଥିଲେ, ସ୍ୱାଧୀନତା ସଂଗ୍ରାମୀଙ୍କ ବଳିଦାନକୁ ମନେ ରଖିବା ପାଇଁ ଆମେ ଏହି ଦିନକୁ ପାଳନ କରୁଛେ। ଆମର ସୁରକ୍ଷା ସୁନିଶ୍ଚିତ କରୁଥିବା ସେନା, ପାରାମିଲିଟାରୀ ଏବଂ ପୁଲିସ ସମେତ ସୁରକ୍ଷା କର୍ମୀଙ୍କୁ କୃତଜ୍ଞତା ଜଣାଇବା ପାଇଁ ମଧ୍ୟ ଆମେ ଏହି ଦିନକୁ ପାଳନ କରୁଛେ।

୨. କରୋନା ମହାମାରୀ ବିଷୟରେ ଆଲୋଚନା କରି ପ୍ରଧାନମନ୍ତ୍ରୀ କହିଥିଲେ, “ଆମେ ଭିନ୍ନ ସମୟ ଦେଇ ଗତି କରୁଛୁ। ମୁଁ ଆଜି ଛୋଟ ପିଲାମାନଙ୍କୁ ଦେଖିପାରୁ ନାହିଁ। କରୋନା ସମସ୍ତଙ୍କୁ ଅଟକାଇ ଦେଇଛି। କୋଭିଡର ଏହି ସମୟରେ କରୋନା ଯୋଦ୍ଧାମାନେ ‘ସେବା ପରମ ଧର୍ମ’ର ମନ୍ତ୍ର ମନରେ ନେଇ ଦେଶବାସୀଙ୍କ ସେବାରେ ଲାଗି ପଡ଼ିଛନ୍ତି। ଏ ନେଇ ମୁଁ ସେମାନଙ୍କୁ କୃତଜ୍ଞତା ଜଣାଉଛି। ଏବେ ଭାରତରେ ୩ଟି କରୋନା ଟିକା ଉପରେ ପରୀକ୍ଷା ଚାଲୁ ରହିଛି। ବୈଜ୍ଞାନିକମାନଙ୍କଠାରୁ ସବୁଜ ସଙ୍କେତ ପାଇବା ମାତ୍ରେ ଆମେ ସେହି ଟିକାଗୁଡ଼ିକର ବହୁଳ ଉତ୍ପାଦନ ଆରମ୍ଭ କରିବୁ ।

୩. ମହିଳାମାନଙ୍କ ସାମର୍ଥ୍ୟ ବିଷୟରେ ପ୍ରଧାନମନ୍ତ୍ରୀ କହିଛନ୍ତି ଯେ, ଯେତେବେଳେ ବି ମହିଳାମାନେ ସୁଯୋଗ ପାଇଛନ୍ତି, ସେମାନେ ଭାରତକୁ ଗର୍ବିତ କରିଛନ୍ତି | ଆଜି, ରାଷ୍ଟ୍ର ସେମାନଙ୍କୁ ଆତ୍ମନିର୍ଭରଶୀଳତା ଏବଂ ରୋଜଗାରର ସମାନ ସୁଯୋଗ ଯୋଗାଇବାକୁ ସ୍ଥିର କରିଛି | ଆଜି ମହିଳାମାନେ କୋଇଲା ଖଣିରେ କାମ କରୁଛନ୍ତି, ଆମର ଝିଅମାନେ ଯୁଦ୍ଧ ବିମାନ ଉଡ଼ାଇ ଆକାଶକୁ ମଧ୍ୟ ସ୍ପର୍ଶ କରୁଛନ୍ତି | ଏ ନେଇ ଆମ ଦେଶରେ ମହିଳାମାନଙ୍କ ବିବାହ ପାଇଁ ସର୍ବନିମ୍ନ ବୟସକୁ ପୁନର୍ବିଚାର କରିବାକୁ ଆମେ ଏକ କମିଟି ଗଠନ କରିଛୁ। କମିଟି ଏହାର ରିପୋର୍ଟ ଦାଖଲ କରିବା ପରେ ଆମେ ଉପଯୁକ୍ତ ନିଷ୍ପତ୍ତି ନେବୁ ବୋଲି ଲାଲ କିଲାରୁ ଦେଶକୁ ସମ୍ବୋଧିତ କରିବାବେଳେ ପ୍ରଧାନମନ୍ତ୍ରୀ କହିଛନ୍ତି।

୪. ପ୍ରଧାନମନ୍ତ୍ରୀ ମୋଦୀ ଶନିବାର ସ୍ବାଧୀନତା ଦିବସ ଅବସରରରେ ଜାତୀୟ ଡିଜିଟାଲ ସ୍ୱାସ୍ଥ୍ୟ ମିଶନର ଉଦଘାଟନ କରିଛନ୍ତି। ଏହି ମିଶନ ଅଧୀନରେ ପ୍ରତ୍ୟେକ ଭାରତୀୟ ଏକ ସ୍ୱତନ୍ତ୍ର ସ୍ୱାସ୍ଥ୍ୟ ଆଇଡି ପାଇବେ। ଆପଣଙ୍କ ପ୍ରତ୍ୟେକ ପରୀକ୍ଷା, ପ୍ରତ୍ୟେକ ରୋଗ, କେଉଁ ଡାକ୍ତର ତୁମକୁ କେଉଁ ଔଷଧ ଦେଇଥିଲେ, କେବେ ଦେଇଥିଲେ, ତୁମର ରିପୋର୍ଟ କ’ଣ, ଏହି ସମସ୍ତ ସୂଚନା ଏହି ସ୍ୱାସ୍ଥ୍ୟ ଆଇଡିରେ ରହିବ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି।

୫. ଆଗାମୀ ୧,୦୦୦ଦିନରେ ଦେଶର ପ୍ରତ୍ୟେକ ଗାଁ ଅପ୍ଟିକାଲ ଫାଇବର ସହିତ ସଂଯୁକ୍ତ ହେବ। ୨୦୧୪ ପୂର୍ବରୁ ଦେଶର କେବଳ ୫ ଡଜନ ପଞ୍ଚାୟତ ଅପ୍ଟିକାଲ ଫାଇବର ସହିତ ସଂଯୁକ୍ତ ଥିଲା। ଗତ ପାଞ୍ଚ ବର୍ଷ ମଧ୍ୟରେ ଦେଶରେ ୧.୫ ଲକ୍ଷ ଗ୍ରାମ ପଞ୍ଚାୟତ ଅପ୍ଟିକାଲ ଫାଇବର ସହିତ ସଂଯୁକ୍ତ ହୋଇଛି ବୋଲି କହିଛନ୍ତି ପ୍ରଧାନମନ୍ତ୍ରୀ।

୬.ଆଧୁନିକ, ନୂତନ ଏବଂ ସମୃଦ୍ଧ ଭାରତ ନିର୍ମାଣରେ ଶିକ୍ଷା ଏକ ପ୍ରମୁଖ ଭୂମିକା ଗ୍ରହଣ କରିଥାଏ । ତେଣୁ, ଆମେ ତିନି ଦଶନ୍ଧି ପରେ ନୂତନ ଶିକ୍ଷା ନୀତି ଆଣିଛୁ ଯାହା ସାରା ଦେଶରେ ସ୍ୱାଗତଯୋଗ୍ୟ, ଯାହା ନୂତନ ଆତ୍ମବିଶ୍ୱାସ ସୃଷ୍ଟି କରିଛି।