ଯୁକ୍ତ୨ ଦ୍ୱିତୀୟ ପର୍ଯ୍ୟାୟ କଟ୍‌ ଅଫ୍‌ ମାର୍କ : କଳାରେ ବିଜେବି, ବିଜ୍ଞାନରେ ରେଭେନ୍ସା ଆଗରେ

ଦ୍ବିତୀୟ ପର୍ଯ୍ୟାୟରେ କଳା ବିଭାଗରେ ସାଧାରଣ ବର୍ଗର କଟ୍‌ ଅଫ୍‌ ମାର୍କ ତାଲିକାରେ ବିଜେବି ଜୁନିଅର କଲେଜ ଶୀର୍ଷରେ ରହିଛି। ଏଠାରେ କଟ୍‌ ଅଫ୍‌ ମାର୍କ ୭୦% ଥିବା ବେଳେ ରେଭେନ୍ସା କଲେଜର ୬୮.୪%, ଶୈଳବାଳା ମହିଳା ମହାବିଦ୍ୟାଳୟର ୬୭.୧୭%, ପୁରୀ ଏସ୍‌ସିଏସ୍‌ କଲେଜର ୬୪.୮୩%, ରାଉରକେଲା ସରକାରୀ କଲେଜର କଟ୍‌ ଅଫ୍‌ ମାର୍କ ୬୪.୬୭% ରହିଛି। ସେହିପରି ବିଜ୍ଞାନ ବିଭାଗରେ ରେଭେନ୍ସା କଲେଜର କଟ୍‌ ଅଫ୍‌ ମାର୍କ ୮୬.୩୩ % ରହିଥିବା ବେଳେ ବିଜେବି କଲେଜର ୮୬%, ବ୍ରହ୍ମପୁରସ୍ଥିତ ସରସ୍ବତୀ ବିଦ୍ୟାମନ୍ଦିର, ନୀଳକଣ୍ଠନଗରର ୮୪.୮୩%, ବାଲେଶ୍ବର ଜିଲ୍ଲା ଉପେନ୍ଦ୍ର ନାଥ କଲେଜ, ସୋରର ୮୪%, ଭୁବନେଶ୍ବରସ୍ଥିତ ବେସିକ୍‌ ସାଇନ୍ସର କଟ୍‌ ଅଫ୍‌ ମାର୍କ ୮୧.୮୩% ରହିଛି। ବାଣିଜ୍ୟ ବିଭାଗରେ ଯାଜପୁର ଜିଲ୍ଲାର ବ୍ୟାସନଗର କଲେଜର ୭୯.୬୭%, ରେଭେନ୍ସା କଲେଜର ୭୩.୩୩%, ରାଉରକେଲା ସରକାରୀ କଲେଜର ୭୨.୩୩%, ବିଜେବି କଲେଜର ୭୦ ଓ ବ୍ରହ୍ମପୁରସ୍ଥିତ ସରସ୍ବତୀ ବିଦ୍ୟାମନ୍ଦିର, ନୀଳକଣ୍ଠନଗରର କଟ୍‌ ଅଫ୍‌ ମାର୍କ ୬୮.୮% ରହିଛି।

ସୂଚନାଯୋଗ୍ୟ ଯେ, ୨୦୨୮ଟି ଯୁକ୍ତ୨ କଲେଜର ୪ ଲକ୍ଷ ୫୩ ହଜାର ୬୪୦ ସିଟ୍‌ ମଧ୍ୟରୁ ୨ ଲକ୍ଷ ୯୬ ହଜାର ୬୧ଟି ସିଟ୍‌ ପୂରଣ ହୋଇଛି। ଆହୁରି ୧ ଲକ୍ଷ ୫୭ ହଜାର ୫୭୯ ଖାଲି ପଡ଼ିଛି। ବିଜ୍ଞାନ ବିଭାଗରେ ସର୍ବାଧିକ ୭୪ ହଜାର ୪୮୧ ସିଟ୍‌ ଖାଲି ରହିଛି। କଳା ବିଭାଗରେ ୪୯ ହଜାର ୮୮୭, ବାଣିଜ୍ୟରେ ୨୨ ହଜାର ୪୩୯, ସଂସ୍କୃତରେ ୪ ହଜାର ୬୪୦, ଧନ୍ଦାମୂଳକ ଶିକ୍ଷାରେ ୬ହଜାର ୧୩୨ ସିଟ୍‌ ଖାଲିପଡ଼ିଛି।