କନକ ବ୍ୟୁରୋ : କପା ଏକ ଅର୍ଥକାରୀ ଫସଲ ରୂପେ ଖ୍ୟାତି ଲାଭ କରିଥିବା ବେଳେ କପା ଚାଷ କରି ଚାଷୀ ଏବେ ହରଡଘଣାରେ । ଅମଳ କପାକୁ ଚାଷୀ ମଣ୍ଡିରେ ବିକ୍ରି କରି ଦୁଇ ପଇସା ରୋଜଗାର କରିବା ନେଇ ଆଶା ରଖିଥିବା ଚାଷୀ ଏବେ ଚିନ୍ତାରେ । ମଣ୍ଡିରେ କପାର କୁଇଣ୍ଟାଲ ପିଛା ସର୍ବନିମ୍ନ ସହାୟକ ମୂଲ୍ୟ ଖୋଲା ବଜାର ଠାରୁ କମ ରହିଛି । ଫଳରେ ଓଡ଼ିଶା ଚାଷୀ ଆନ୍ଧ୍ର ବ୍ୟବସାୟୀଙ୍କ ନିକଟରେ ସମର୍ପି ଦେଉଛନ୍ତି ନିଜର ଉତ୍ପାଦିତ କପା ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟରେ ଧାନ ଚାଷୀ ସର୍ବନିମ୍ନ ସହାୟକ ମୂଲ୍ୟ(ଏମଏସପି)ରେ ଧାନ ବିକିବା ପାଇଁ ଲଢେଇ କରୁଥିବା ବେଳେ ଓଡ଼ିଶା ରାୟଗଡ଼ାର କପା ଚାଷୀ ଏମଏସପିରେ କପା ବିକିବାକୁ କୁଣ୍ଠାବୋଧ କରୁଛନ୍ତି । କାରଣ ଏମଏସପି ଦର କମ ଅଛି ଏବଂ ସେମାନେ ଅଧିକା ଦାମରେ ବାହାର ଲୋକଙ୍କୁ ବିକ୍ରି କରୁଛନ୍ତି । ସରକାରୀ ମଣ୍ଡିରେ କପା କୁଇଣ୍ଟାଲ ପିଛା ଏମଏସପି ୬ ହଜାର ୨୫ ଟଙ୍କା ରହିଛି, ହେଲେ ଆନ୍ଧ୍ର ବ୍ୟବସାୟୀଙ୍କୁ କପା କୁଇଣ୍ଟାଲ ପିଛା ୭ ହଜାର ୫ ଶହରୁ ଅଧିକ ଟଙ୍କାରେ ବିକ୍ରି କରୁଛନ୍ତି ଚାଷୀ ।
ରାୟଗଡ଼ା ଜିଲ୍ଲାର ଗୁଣୁପୁର ସମେତ ରାୟଗଡା, ମୁନିଗୁଡା, ପଦ୍ମପୁର, ଗୁଡାରି, ରାମାନାଗୁଡା ବ୍ଲକ ଅଞ୍ଚଳରେ ପାଖାପାଖି ୪୫.୮୪ହଜାର ହେକ୍ଟର ଜମିରେ କପା ଚାଷ କରାଯାଇଛି । ଗୁଣୁପୁରରେ ୭ ହଜାର ୧୦୦, ରାମାନାଗୁଡାରେ ୯ହଜାର, ଗୁଡାରିରେ ୩ହଜାର ୮୦୦ ଓ ପଦ୍ମପୁରରେ ୨ହଜାର ୭୦୦ ହେକ୍ଟର ଜମିରେ ଏଥର କପା ଚାଷ ହୋଇଛି । ଆନ୍ଧ୍ରର ବ୍ୟବସାୟୀ ଓଡ଼ିଶା ସରକାରଙ୍କ କୁଇଣ୍ଟାଲ ପିଛା ଏମଏସପି ଠାରୁ ପାଖାପାଖି ଦେଢ ହଜାର ଅଧିକ ଟଙ୍କାରେ କପା କିଣୁଛନ୍ତି । ଅଧିକ ଲାଭ ଆଶାରେ ଚାଷୀ ଆନ୍ଧ୍ର ବ୍ୟବସାୟୀଙ୍କୁ ବିକ୍ରି କରୁଛନ୍ତି ସତ ହେଲେ ଟଙ୍କା ପାଇବା ଉପରେ ସେମାନଙ୍କର ସନ୍ଦେହ ରହୁଛି । ଅମଳ କପାକୁ ଅଧିକ ଦିନ ସଂରକ୍ଷିତ କରିପାରିଲେ ପରେ ଅଧିକ ଦାମରେ ଚାଷୀ ବିକ୍ରି କରିପାରନ୍ତା । ହେଲେ ଋଣ କରି କପା ଚାଷ କରିଥିବା ଚାଷୀ ଅମଳ କପାକୁ ଘରେ ରଖିବା ଅବସ୍ଥାରେ ନାହିଁ । ତେଣୁ ଯଥାଶିଘ୍ର ବିକ୍ରି ପାଇଁ ଚେଷ୍ଟା କରୁଛନ୍ତି ।