ବଢିପାରେ ପ୍ଲାଟଫର୍ମ ଟିକେଟ୍ ଚାର୍ଜ । ଦେଶର ୧୦୦ରୁ ଅଧିକ ରେଳ ଷ୍ଟେସନରେ ଦୁଇଗୁଣା ହୋଇପାରେ ପ୍ଲାଟଫର୍ମ ଟିକେଟ୍ ମୂଲ୍ୟ ।
କନକ ବ୍ୟୁରୋ: ଦେଶର ୧୦୦ ରୁ ଅଧିକ ରେଳ ଷ୍ଟେସନରେ ୟୁଜର ଡେଭଲପମେଣ୍ଟ ଫି ସ୍କିମ୍ କାର୍ଯ୍ୟକାରୀ କରିବାକୁ ଭାରତୀୟ ରେଳ ପ୍ରସ୍ତୁତ ହେଉଛି । ଏହା ଅଧୀନରେ, ଏହି ଷ୍ଟେସନରେ ଆସୁଥିବା ଉପଭୋକ୍ତାଙ୍କ ଠାରୁ ୟୁଜର ଚାର୍ଜ ନିଆଯିବ । ବାସ୍ତବରେ, ରେଳବାଇ ଚଳିତବର୍ଷ ନଭେମ୍ବର ମାସରେ ପ୍ରଥମ ପର୍ଯ୍ୟାୟରେ ଦେଶର ୧୨୧ ଷ୍ଟେସନରେ ୟୁଡିଏଫ(ୟୁଜର୍ ଡେଭଲପମେଣ୍ଟ ଫି) କାର୍ଯ୍ୟକାରୀ କରିବ । ଅଧିକାଂଶ ଷ୍ଟେସନରେ ପ୍ଲାଟଫର୍ମ ଟିକେଟ୍ ମୂଲ୍ୟ ୧୦ ଟଙ୍କା ଥିବାବେଳେ ୟୁଡିଏଫ ଲାଗୁହେଲେ ଏହାର ମୂଲ୍ୟ ୨୦ ଟଙ୍କାକୁ ବୃଦ୍ଧି କରାଯିବ । ଅର୍ଥାତ୍ ଲୋକମାନେ ଷ୍ଟେସନ ଭିତରକୁ ଆସିଲେ ପ୍ଲାଟଫର୍ମ ଟିକେଟ ବାବଦକୁ ଦୁଇଗୁଣ ଅଧିକ ଅର୍ଥ ଦେବାକୁ ପଡିବ ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ ୧୨୧ ଷ୍ଟେସନରେ କେବଳ ପ୍ଲାଟଫର୍ମ ଟିକେଟ ବୃଦ୍ଧି କରାଯିବ ନାହିଁ ବରଂ ଏହି ଷ୍ଟେସନରେ ଟ୍ରେନରେ ଚଢ଼ୁଥିବା ଯାତ୍ରୀଙ୍କ ଭଡା ମଧ୍ୟ ବୃଦ୍ଧି କରାଯାଇପାରେ । ଯାତ୍ରୀଙ୍କୁ ଅଧିକ ସୁବିଧା ଦେବାକୁ ଉପଭୋକ୍ତା ଚାର୍ଜ ଆଦାୟ କରାଯାଏ । ବର୍ତ୍ତମାନ ଏହା କେବଳ ବିମାନବନ୍ଦରରେ ଆଦାୟ କରାଯାଉଛି ।
ବିମାନ ବନ୍ଦରରେ ଆଦାୟ କରାଯାଉଥିବା ଏହି ଚାର୍ଜକୁ ବିମାନ ଟିକେଟ୍ ସହିତ ଯୋଡା ଯାଇଥାଏ । ଅର୍ଥାତ୍ ଆପଣ ବିମାନ ଟିକେଟ୍ ପାଇଁ ଯେଉଁ ମୂଲ୍ୟ ଦେଇଥାନ୍ତି ସେଥିରେ ଉପଭୋକ୍ତା ଚାର୍ଜ ଅନ୍ତର୍ଭୁକ୍ତ ହୋଇ ରହିଥାଏ । ଆଉ ଭାରତୀୟ ରେଳ ଏହି ପନ୍ଥା ଆପଣାଇବାକୁ ଯାଉଛି । ଏହା ପୂର୍ବରୁ ଭାରତୀୟ ରେଳ ଚେୟାରମ୍ୟାନ୍ ଭି.କେ ଯାଦବ କହିଥିଲେ ଯେ ଯେଉଁ ରେଳ ଷ୍ଟେସନରେ ଅଧିକ ଭିଡ଼ ରହୁଛି ସେହି ଷ୍ଟେସନରେ ସାମାନ୍ୟ ଉପଭୋକ୍ତା ଚାର୍ଜ ଆଦାୟ କରାଯିବ । ଏହି ସ୍ଥାନଗୁଡିକରେ ବିଶ୍ୱ ସ୍ତରୀୟ ଭିତ୍ତିଭୂମି ଯୋଗାଇବାର ଆବଶ୍ୟକତା ଅଛି ।